Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ditaba tše Dibotse tše di Tšwago go Modimo!

 Thuto 9

Lapa la Gago e ka ba Leo le Thabilego Bjang?

Lapa la Gago e ka ba Leo le Thabilego Bjang?

1. Ke ka baka la eng go nyakega gore batho ba nyalane e le gore lapa e be leo le thabilego?

Ditaba tše dibotse di tšwa go Jehofa, Modimo yo a thabilego, yoo a nyakago gore malapa a thabe. (1 Timotheo 1:11) Ke mothomi wa lenyalo. Lenyalo le le ngwadišitšwego ka molao le a nyakega gore lapa e be leo le thabilego ka gobane le dira gore go be le boemo bjo bo šireletšegilego bja go godišetša bana.

Modimo o lebelela lenyalo bjang? O nyaka gore e be tswalano ya sa ruri ya monna le mosadi. Bakriste ba swanetše go hlompha melao ya naga ya gabo bona ya mabapi le go ngwadiša lenyalo. (Luka 2:1, 4, 5) Jehofa o nyaka gore banna le basadi bao ba nyalanego ba botegelane. (Baheberu 13:4) O hloile tlhalo. (Maleaki 2:16) Eupša o dumelela Bakriste go hlala goba go tsena lenyalong gape ge feela balekane ba bona ba dira bohlotlolo.Bala Mateo 19:3-6, 9.

2. Monna le mosadi ba swanetše go swarana bjang?

Jehofa o bopile banna le basadi gore ba tlatšane lenyalong. (Genesi 2:18) Ka ge e le hlogo ya lapa, monna o swanetše go etelela pele go hlokomeleng lapa la gagwe ka dilo tše di bonagalago le go le ruteng ka Modimo. O swanetše go bontšha mosadi wa gagwe lerato la boikgafo. Banna le basadi ba swanetše go ratana le go hlomphana. Ka ge banna ka moka gotee le basadi ba se ba phethagala, go ithuta go lebalela ke tsela ya go hwetša lethabo lenyalong.Bala Baefeso 4:31, 32; 5:22-25, 33; 1 Petro 3:7.

3. Na o swanetše go tšwa lenyalong leo le sego la thaba?

Ge e ba le ena le mathata lenyalong la lena, le swanetše go katanela go swarana ka lerato. (1 Bakorinthe 13:4, 5) Lentšu la  Modimo ga le kgothaletše karogano e le tsela ya go rarolla mathata a tlwaelegilego a lenyalo.Bala 1 Bakorinthe 7:10-13.

4. Bana, Modimo o le kganyogela eng?

Jehofa o nyaka gore le thabe. O le nea keletšo e di phalago tšohle mabapi le tsela ya go thabela bofsa bja lena. O nyaka gore le holwe ke bohlale le phihlelo tša batswadi ba lena. (Bakolose 3:20) Jehofa gape o nyaka gore le hwetše lethabo la go direla Mmopi wa lena le Morwa wa gagwe.Bala Mmoledi 11:9–12:1; Mateo 19:13-15; 21:15, 16.

5. Batswadi, bana ba lena ba ka hwetša bjang lethabo?

Le swanetše go šoma ka thata go nea bana ba lena dijo, bodulo le diaparo. (1 Timotheo 5:8) Eupša e le gore bana ba lena ba hwetše lethabo, gape le swanetše go ba ruta go rata Modimo le go ithuta go yena. (Baefeso 6:4) Mohlala wa lena wa go bontšha go rata Modimo o ka kgoma dipelo tša bana ba lena ka mo go tseneletšego. Ge thuto ya lena e theilwe Lentšung la Modimo, e ka dira gore tsela ya bana ba lena ya go nagana e be e kgahlišago.Bala Doiteronomio 6:4-7; Diema 22:6.

Bana ba a holega ge le ba kgothatša le go ba reta. Le gona ba nyaka go phošollwa le go laiwa. Tlwaetšo e bjalo e ba šireletša boitshwarong bjoo bo ka ba amogago lethabo. (Diema 22:15) Lega go le bjalo, tayo le ka mohla ga se ya swanela go ba e thata goba e sehlogo.Bala Bakolose 3:21.

Dihlatse tša Jehofa di gatiša dipuku tše mmalwa tšeo ka go lebanya di ngwaletšwego go thuša batswadi le bana. Dipuku tše di theilwe Beibeleng.Bala Psalme 19:7, 11.

 

Ithute ka mo go oketšegilego

Kgopela Thušo ya Modimo Gore o be le Lenyalo le le Thabilego

Go diriša dipotšišo tše pedi tše bonolo go ka go thuša go kaonefatša lenyalo la gago.

Kamoo le ka Rarollago Mathata

Tsela e botse ya go rarolla bothata e ka dira gore lenyalo leo le tiilego le le thabilego le fapane le lenyalo le fokolago le leo le nolago mooko.

Kamoo o ka Dirago Bophelo bja Lapa la Gago Gore bo Thabiše

Lerato leo Jesu a le bontšhitšego ke mohlala wo o swanetšego go ekišwa ke banna bao ba nyetšego, basadi bao ba nyetšwego, batswadi le bana. Rena re ithuta eng go yena?