Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ditaba tše Dibotse tše di Tšwago go Modimo!

 Thuto 5

Morero wa Modimo ka Lefase ke Ofe?

Morero wa Modimo ka Lefase ke Ofe?

1. Ke ka baka la eng Modimo a ile a bopa lefase?

Jehofa o neile banna le basadi lefase. Ke legae la rena. Ka baka leo, batho ba babedi ba pele, Adama le Efa, ba be ba se ba bopelwa go dula legodimong—Modimo o be a šetše a hlotše barongwa gore ba dule legodimong. (Jobo 38:4, 7) Go e na le moo, Modimo o ile a tšea motho wa pele a mmea paradeiseng e kgahlišago yeo e bitšwago serapa sa Edene. (Genesi 2:15-17) Jehofa o ile a mo nea tebelelo ya go phela ka mo go sa felego lefaseng gotee le ditlogolwana tša gagwe tša ka moso.Bala Psalme 37:29; 115:16.

Mathomong, serapa sa Edene ke sona feela e bego e le paradeise. Batho ba babedi ba pele ba be ba swanetše go tlatša lefase ka bana ba bona. Ge nako e dutše e eya, ba be ba tla fenya lefase ka moka gomme ba le dira paradeise. (Genesi 1:28) Lefase ka bolona le ka se tsoge le fedišitšwe. Le tla dula e le legae la batho.Bala Psalme 104:5.

2. Ke ka baka la eng lefase e se paradeise gona bjale?

Adama le Efa ba ile ba se kwe Modimo, ka baka leo Jehofa o ile a ba raka moo serapeng. Paradeise e ile ya lahlega, gomme ga go motho yo a ilego a atlega go e tsošološa. Beibele e re: “Lefase lona le gafetšwe seatleng sa yo kgopo.”—Jobo 9:24.Bala Genesi 3:23, 24.

Na Jehofa o lebetše morero wa gagwe wa mathomong ka batho? Aowa! Ke Ramatlaohle. A ka se tsoge a paletšwe. (Jesaya 45:18) O tla tsošološa moloko wa batho gore o be ka mokgwa woo a bego a o rerile mathomong.Bala Psalme 37:11, 34.

3. Paradeise e tla tsošološwa bjang?

Paradeise e tla tsošološwa lefaseng nakong ya ge Jesu a buša bjalo ka Kgoši yeo e beilwego ke Modimo. Ntweng yeo e bitšwago Haramagedone, Jesu o tla etelela pele barongwa ba Modimo gomme ba fediša bohle bao ba ganetšago Modimo. Ke moka  Jesu o tla golega Sathane nywaga e 1 000. Batho ba Modimo ba tla phologa phedišo ka gobane Jesu o tla ba hlahla le go ba šireletša. Ba tla thabela bophelo bjo bo sa felego Paradeiseng mo lefaseng.Bala Kutollo 20:1-3; 21:3, 4.

4. Tlaišego e tla fela neng?

Modimo o tla fediša bobe neng lefaseng? Jesu o ile a nea “pontšho” ya go bontšha ge bofelo bo le kgauswi. Maemo a gona bjale a lefase a bontšha gore batho ba kotsing le gore ga bjale re phela mehleng “ya bofelo bja tshepedišo ya dilo.”Bala Mateo 24:3, 7-14, 21, 22.

Jesu o tla fediša tlaišego ka moka nakong ya nywaga e 1 000 ya ge a buša lefase a le legodimong. (Jesaya 9:6, 7; 11:9) Ka ntle le go hlankela e le Kgoši, Jesu o tla hlankela e le Moperisita yo a Phagamego gomme a phumola dibe tša bao ba ratago Modimo. Ka gona, Modimo o tla fediša bolwetši, botšofadi le lehu a diriša Jesu.Bala Jesaya 25:8; 33:24.

5. Ke bomang bao ba tlago go phela Paradeiseng ya nakong e tlago?

Holong ya Mmušo o tla hwetša batho bao ba ratago Modimo e bile ba nyaka go ithuta kamoo ba ka mo kgahlišago ka gona

Batho bao ba kwago Modimo ba tla phela Paradeiseng. (1 Johane 2:17) Jesu o ile a romela balatedi ba gagwe gore ba tsome batho ba boleta gomme ba ba rute kamoo ba ka amogelwago ke Modimo ka gona. Lehono, Jehofa o lokišetša batho lefaseng ka bophara gore ba tle ba phele Paradeiseng mo lefaseng nakong e tlago. (Tsefanya 2:3) Batho Diholong tša Mmušo tša Dihlatse tša Jehofa ba ithuta go ba banna ba bakaone le botate ba bakaone le go ba basadi ba bakaone le bomma ba bakaone. Bana le batswadi ba rapela gotee le go ithuta kamoo ba ka holwago ka gona ke ditaba tše dibotse.Bala Mika 4:1-4.

 

Ithute ka mo go oketšegilego

Morero wa Modimo ka Lefase ke Ofe?

Na morero wa Modimo ka lefase o tla ka wa phethagala? Ge e ba go le bjalo o tla phethagala neng?