Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ditaba tše Dibotse tše di Tšwago go Modimo!

 Thuto 8

Ke ka Baka la Eng Modimo a Dumelela Bobe le Tlaišego?

Ke ka Baka la Eng Modimo a Dumelela Bobe le Tlaišego?

Modimo o dumeletše batho gore ba buše nako e lekanego bakeng sa go bontšha gore ba ka se kgone go rarolla mathata a batho

1. Bobe bo thomile bjang?

Bobe bo thomile lefaseng ge Sathane a be a bolela maaka a mathomo. Sathane e be e le morongwa yo a phethagetšego mathomong, eupša “ga se a ka a ema a tiile therešong.” (Johane 8:44) O ile a thoma go kganyoga borapedi bjo bo bego bo swanetše go lebišwa go Modimo feela. Sathane o ile a botša mosadi wa pele e lego Efa maaka gomme a mo kgodiša gore a kwe yena go e na le go kwa Modimo. Adama o ile a thekga Efa tabeng ya go se kwe Modimo. Phetho ya Adama e ile ya feleletša ka tlaišego le lehu.Bala Genesi 3:1-6, 19.

Ge Sathane a be a šišinya gore Efa a se ke a kwa Modimo, o be a thoma borabele kgahlanong le bogoši bja Modimo, goba boemo bja gagwe bja go ba Yo Godimodimo. Batho ba bantši ba thekgile Sathane tabeng ya go gana gore Modimo e be Mmuši wa bona. Ka go re’alo, Sathane o ile a ba “mmuši wa lefase.”Bala Johane 14:30; 1 Johane 5:19.

2. Na tlholo ya Modimo e be e fokola?

Mediro ya Modimo ka moka e phethagetše. Batho le barongwa bao Modimo a ba hlodilego ba be ba ka kgona go kwa Modimo ka mo go phethagetšego. (Doiteronomio 32:4, 5) Modimo o re bopile re ena le tokologo ya go ikgethela go dira se se lokilego goba se sebe. Tokologo yeo e re dumelela gore re bontšhe lerato la rena la go rata Modimo.Bala Jakobo 1:13-15; 1 Johane 5:3.

3. Ke ka baka la eng Modimo a dumeletše tlaišego go fihla gona bjale?

Jehofa o dumeletše borabele bjo bo lego kgahlanong le bogoši bja gagwe ka nakwana. Ka baka la’ng? Bakeng sa go bontšha gore ga go na boiteko bja go buša ntle le yena bjo  bo ka holago batho. (Mmoledi 7:29; 8:9) Ka morago ga nywaga e 6 000 ya go phela ga motho, bohlatse bo molaleng. Babuši ba batho ba paletšwe ke go fediša ntwa, bosenyi, go hloka toka le malwetši.Bala Jeremia 10:23; Baroma 9:17.

Go fapana le pušo ya batho, pušo ya Modimo e hola bao ba e amogelago. (Jesaya 48:17, 18) Kgauswinyane, Jehofa o tla fediša mebušo ka moka ya batho. Batho bao ba kgethago go bušwa ke Modimo ke bona feela bao ba tlago go dula lefaseng.—Jesaya 11:9.Bala Daniele 2:44.

Dikgetho tša rena di bontšha gore re nyaka Modimo e eba Mmuši wa rena

4. Go se fele pelo ga Modimo go re nea sebaka sa go dira eng?

Sathane o ile a bolela gore ga go motho yoo a ka hlankelago Jehofa ka lerato la go hloka boithati. Na o ka rata go hlatsela gore taba ye ke maaka? O ka kgona! Go se fele pelo ga Modimo go re nea sebaka sa gore ka moka ga rena re bontšhe ge e ba re rata go bušwa ke Modimo goba ke batho. Tsela yeo re phelago ka yona e bontšha gore re eme ka lehlakoreng lefe.Bala Jobo 1:8-12; Diema 27:11.

5. Re ka kgetha Modimo e le Mmuši wa rena bjang?

Re ka kgetha Modimo e le Mmuši wa rena ka go tsoma borapedi bja therešo bjo bo theilwego Lentšung la gagwe, Beibele, le go ba go bjona. (Johane 4:23) Re ka gana go bušwa ke Sathane ka go se kgathe tema dipolitiking le dintweng, go swana le Jesu.Bala Johane 17:14.

Sathane o diriša matla a gagwe go kgothaletša boitshwaro bjo bo gobogilego le ditiro tše mpe. Ge re phema mekgwa e bjalo, ba bangwe ba bagwera ba rena le ba leloko ba ka re kwera goba ba re ganetša. (1 Petro 4:3, 4) Ka gona re swanetše go dira kgetho. Na re tla gwerana le batho bao ba ratago Modimo? Na re tla latela melao ya gagwe e bohlale le e lerato? Ge e ba re dira bjalo, re tla be re hlatsela gore Sathane o be a bolela maaka ge a be a re ga go motho yoo ge a le ka tlase ga kgatelelo a ka dirago seo Modimo a se bolelago.Bala 1 Bakorinthe 6:9, 10; 15:33.

Go rata ga Modimo batho ke tiišetšo ya gore bobe le tlaišego di tla fela. Bao ba bontšhago gore ba dumela se ba tla phela ka mo go sa felego mo lefaseng.Bala Johane 3:16.

 

Ithute ka mo go oketšegilego

Ke ka Baka La’ng Modimo a Dumelela Tlaišego?

Batho ba bantši ba nagana gore Modimo ke yena a bakago tlaišego. Wena o nagana’ng? Ithute ka seo Modimo a rego se re bakela tlaišego