Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ditaba tše Dibotse tše di Tšwago go Modimo!

 Thuto 4

Jesu Kriste ke Mang?

Jesu Kriste ke Mang?

Ke dika dife tšeo di begi di dira gore Jesu a batamelege?—MATEO 11:29; MAREKA 10:13-16.

1. Bophelo bja Jesu bo thomile bjang?

Go fapana le motho le ge e le ofe, Jesu o phetše legodimong e le motho wa moya pele a ka belegwa lefaseng. (Johane 8:23) E be e le tlholo ya pele ya Modimo, gomme o ile a thuša ge go hlolwa dilo tše dingwe ka moka. Ke yena feela yo Jehofa a mo hlodilego ka go lebanya gomme ke ka baka leo a bitšwago ka mo go swanetšego gore ke Morwa “yo a tswetšwego a nnoši” wa Modimo. (Johane 1:14) Jesu o ile a šoma e le Mmoleledi wa Modimo, ka gona o bitšwa gape gore ke “Lentšu.”Bala Diema 8:22, 23, 30; Bakolose 1:15, 16.

2. Ke ka baka la eng Jesu a ile a tla lefaseng?

Modimo o rometše Morwa wa gagwe lefaseng go tšwa legodimong ka go fetišetša bophelo bja gagwe ka popelong ya kgarebe ya Mojuda yeo e bitšwago Maria. Ka gona, Jesu ga se a ka a ba le tate wa motho. (Luka 1:30-35) Jesu o tlile lefaseng (1) go tlo ruta therešo ka Modimo, (2) go re beela mohlala wa go dira thato ya Modimo le ge re ena le mathata gotee le (3) go nea bophelo bja gagwe bjo bo phethagetšego e le “topollo.”Bala Mateo 20:28.

3. Ke ka baka la eng re nyaka topollo?

Topollo ke tefo yeo e lefšago bakeng sa go lokolla motho kotsing ya lehu. (Ekisodo 21:29, 30) Lehu le botšofadi e be e se karolo ya morero wa Modimo wa mathomong bakeng sa batho. Re tseba seo bjang? Modimo o ile a botša motho wa pele, Adama, gore ge a ka dira seo Beibele e se bitšago sebe, o be a tla hwa. Ka gona, ge nkabe Adama a se a ka a dira sebe, nkabe a se a ka a hwa. (Genesi 2:16, 17; 5:5) Go ya ka Beibele, lehu le “tsene” bathong ka moka ka Adama. Ka gona, Adama o ile a fetišetša ditlogolong tša gagwe ka moka sebe le kotlo ya sona, e lego lehu.  Re nyaka topollo gore e re lokolle kotlong ya lehu yeo re e abetšego go Adama.Bala Baroma 5:12; 6:23.

Ke mang yo a bego a ka lefa topollo ya go re lokolla lehung? Ge re ehwa, re lefa molato wa dibe tša rena feela. Ga go na motho yo a sego a phethagala yo a ka lefelelago dibe tša batho ba bangwe.Bala Psalme 49:7-9.

4. Ke ka baka la eng Jesu a ile a hwa?

Ka go se swane le rena, Jesu o be a phethagetše. Ka gona, go be go sa nyakege gore a hwele dibe tša gagwe—o be a se a ka a dira dibe. Go e na le moo, Jesu o hwetše dibe tša ba bangwe. Modimo o ile a bontšha gore o rata batho kudu ka go romela Morwa wa gagwe gore a re hwele. Jesu le yena o ile a bontšha gore o a re rata ka go ikokobeletša Tatagwe le go gafa bophelo bja gagwe bakeng sa dibe tša rena.Bala Johane 3:16; Baroma 5:18, 19.

5. Ke eng seo Jesu a se dirago gona bjale?

Ge a be a le mo lefaseng, Jesu o ile a fodiša balwetši, a tsoša bahu le go ntšha batho tlaišegong. Ka go re’alo, o bontšhitše seo a tlago go se direla batho ka moka ba kwago nakong e tlago. (Mateo 15:30, 31; Johane 5:28) Ka morago ga gore Jesu a hwe, Modimo o ile a mo tsoša e le sebopiwa sa moya. (1 Petro 3:18) Ke moka Jesu o ile a leta a le ka letsogong le letona la Modimo go fihlela ge Jehofa a mo nea matla a go buša e le Kgoši godimo ga lefase ka moka. (Baheberu 10:12, 13) Ga bjale Jesu o buša e le Kgoši legodimong, gomme balatedi ba gagwe ba tsebatša ditaba tšeo tše dibotse lefaseng ka bophara.Bala Daniele 7:13, 14; Mateo 24:14.

Go se go ye kae, Jesu o tla diriša matla a gagwe e le Kgoši go fediša tlaišego le bao ba e bakago. Bohle bao ba bontšhago tumelo go Jesu ka go mo kwa ba tla phela paradeiseng mo lefaseng.Bala Psalme 37:9-11.

 

Ithute ka mo go oketšegilego

Topollo—Mpho e Kgolo Kudu ya Modimo

Topollo ke eng? E bolela’ng go wena?