Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ditaba tše Dibotse tše di Tšwago go Modimo!

 Thuto 14

Ke ka Baka la Eng Modimo a Ena le Mokgatlo?

Ke ka Baka la Eng Modimo a Ena le Mokgatlo?

1. Ke ka baka la eng Modimo a ile a rulaganya Baisiraele ba bogologolo?

Modimo o ile a rulaganya ditlogolo tša mopatriareka Aborahama gore e be setšhaba gomme a di nea sehlopha sa melao. O ile a bitša setšhaba seo gore ke “Isiraele” gomme a dira gore se hlokomele borapedi bja therešo le lentšu la gagwe. (Psalme 147:19, 20) Ka baka leo, batho ba ditšhaba ka moka ba be ba ka holwa ke Isiraele.Bala Genesi 22:18.

Modimo o ile a kgetha Baisiraele gore e be dihlatse tša gagwe. Histori ya bona ya bogologolo e bontšha kamoo batho ba holegago ka gona ge ba ekwa melao ya Modimo. (Doiteronomio 4:6) Ka gona, batho ba bangwe ba be ba ka kgona go tseba Modimo wa therešo ka go ithuta go Baisiraele.Bala Jesaya 43:10, 12.

2. Ke ka baka la eng Bakriste ba therešo ba rulagantšwe?

Ge nako e dutše e eya, Isiraele e ile ya se sa amogelwa ke Modimo, gomme Jehofa o ile a bea phuthego ya Bokriste legatong la setšhaba seo. (Mateo 21:43; 23:37, 38) Ga bjale, Bakriste ba therešo ba hlankela e le dihlatse tša Jehofa legatong la Baisiraele.Bala Ditiro 15:14, 17.

Jesu o ile a rulaganya balatedi ba gagwe gore ba dire boboledi le go dira barutiwa ditšhabeng ka moka. (Mateo 10:7, 11; 24:14; 28:19, 20) Modiro wo o fihla seremong sa wona ga bjale, bofelong bja tshepedišo ya gona bjale ya dilo. Ke la mathomo Jehofa a kopanya batho ba dimilione ba tšwago ditšhabeng ka moka borapeding bja therešo. (Kutollo 7:9, 10) Bakriste ba therešo ba rulagantšwe gore ba kgothatšane le go thušana. Lefaseng ka moka ba na le lenaneo le le swanago la thuto ya Beibele dibokeng tša bona.Bala Baheberu 10:24, 25.

 3. Mokgatlo wa mehleng yeno wa Dihlatse tša Jehofa o thomile bjang?

Nywageng ya bo-1870, sehlopha se senyenyane sa barutwana ba Beibele se ile sa thoma go utolla lefsa ditherešo tša Beibele tšeo e bego e le kgale di timetše. Ba be ba tseba gore Jesu o be a rulagantše phuthego ya Bokriste gore e dire boboledi, ka baka leo, ba ile ba thoma lesolo la ditšhabatšhaba la go bolela ka Mmušo. Ka 1931 ba ile ba amogela leina la Dihlatse tša Jehofa.Bala Ditiro 1:8; 2:1, 4; 5:42.

4. Dihlatse tša Jehofa di rulagantšwe bjang?

Lekgolong la pele la nywaga, diphuthego tša Bokriste dinageng tše dintši di be di holwa ke sehlopha sa motheo se bušago seo se bego se lemoga gore Jesu ke Hlogo ya phuthego. (Ditiro 16:4, 5) Ka mo go swanago lehono, Dihlatse tša Jehofa di holwa ke tlhahlo ya Sehlopha se Bušago sa bagolo ba nago le phihlelo. Se okamela diofisi tša makala tša Dihlatse tša Jehofa tšeo di fetolelago, di gatišago le go aba didirišwa tša go ithuta Beibele ka maleme a ka godimo ga a 600. Ka baka leo, Sehlopha se Bušago se kgona go nea diphuthego tša ka godimo ga tše 100 000 lefaseng ka bophara kgothatšo le tlhahlo ya Mangwalo. Phuthegong e nngwe le e nngwe, banna ba swanelegago ba hlankela e le bagolo, goba balebeledi. Banna ba ba hlokomela mohlape wa Modimo ka lerato.Bala 1 Petro 5:2, 3.

Dihlatse tša Jehofa di rulagantšwe gore di bolele ditaba tše dibotse le go dira barutiwa. Go swana le baapostola, re dira boboledi ka ntlo le ntlo. (Ditiro 20:20) Gape re ithaopela go ithuta Beibele le batho bao ba tlogago ba rata therešo. Eupša Dihlatse tša Jehofa ga se mokgatlo feela. Re lapa leo le nago le Tate yo lerato. Re bana ba motho bao ba hlokomelanago. (2 Bathesalonika 1:3) Ka ge batho ba Jehofa ba rulaganyeditšwe go kgahla Modimo le go thuša ba bangwe, ba bopa lapa leo le thabilego kudu lefaseng.Bala Psalme 33:12; Ditiro 20:35.

 

Ithute ka mo go oketšegilego

Dula Leratong la Modimo

Re ka bontšha lerato le tebogo bjang dilong ka moka tšeo Modimo a re diretšego tšona?

Dihlatse tša Jehofa ke Batho ba Mohuta Mang?

O tseba Dihlatse tša Jehofa tše kae? O tseba’ng ka rena?