Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ditaba tše Dibotse tše di Tšwago go Modimo!

 Thuto 6

Go na le Kholofelo Efe ka Bahu?

Go na le Kholofelo Efe ka Bahu?

Modimo o boditše Adama gore: “O lerole gomme o tla boela leroleng.”—GENESI 3:19.

1. Ditaba tše dibotse ka bahu ke dife?

Ge Jesu a be a fihla Bethania kgauswi le Jerusalema, mogwera wa gagwe Latsaro o be a šetše a na le matšatši a mane a hwile. Jesu o ile a ya mabitleng a na le Mareta le Maria, e lego dikgaetšedi tša monna yo a hwilego. Go se go ye kae, ke ge lešaba le kgobokana. Na o ka akanya ka lethabo leo Mareta le Maria ba bilego le lona ge Jesu a be a tsoša Latsaro bahung?Bala Johane 11:21-24, 38-44.

Mareta o be a šetše a tseba ditaba tše dibotse ka bahu. O be a šetše a tseba gore Jehofa o tla tsoša bahu e le gore ba tlo phela lefaseng gape.Bala Jobo 14:14, 15.

2. Boemo bja bahu ke bofe?

Batho ba bopilwe ka lerole. (Genesi 2:7; 3:19) Ga re meoya yeo e dulago mmeleng wa nama. Re dibopiwa tša nama, ka gona ga go na le karolo ya rena yeo e phologago lehu. Ge re ehwa, bjoko bja rena le bjona bo a hwa, gomme menagano ya rena e a fela. Ka baka leo, Latsaro ga se a ka a bolela selo mabapi le seo a se kwelego lehung ka gobane bahu ga ba tsebe selo.Bala Psalme 146:4; Mmoledi 9:5, 6, 10.

Na Modimo o tlaiša batho ka mollo ka morago ga lehu? Ka ge Beibele e bontšha gore bahu ga ba tsebe selo, go molaleng gore thuto ya mollo wa dihele ke ya maaka le yeo e thomeletšago Modimo. O selekišwa ke kgopolo yeo ya go tlaišwa ga batho mollong.Bala Jeremia 7:31.

 3. Na bahu ba ka kgona go bolela le rena?

Bahu ga ba kgone go bolela goba go kwa. (Psalme 115:17) Eupša barongwa ba bangwe ke ba kgopo, gomme ba ka bolela le batho ba itira bahu. (2 Petro 2:4) Jehofa o iletša go leka go boledišana le bahu.Bala Doiteronomio 18:10, 11.

4. Ke bomang bao ba tlago go tsošwa?

Bahu ba dimilione bao ba lego mabitleng ba tla tsošetšwa bophelong mo lefaseng. Go tla tsošwa gaešita le ba bangwe bao ba bego ba sa tsebe Modimo e bile ba be ba dira dilo tše mpe.Bala Luka 23:43; Ditiro 24:15.

Batho bao ba tsošitšwego ba tla kgona go ithuta therešo mabapi le Modimo le go bontšha tumelo go Jesu ka go mo kwa. (Kutollo 20:11-13) Bao ba tsošetšwago bophelong gomme ba dira dilo tše di lokilego ba tla kgona go phela ka mo go sa felego mo lefaseng.Bala Johane 5:28, 29.

5. Tsogo e re botša eng ka Jehofa?

Modimo o dirile gore go be le kholofelo ka bahu ka go romela Morwa wa gagwe gore a re hwele. Ka go re’alo, tsogo e re botša ka lerato la Jehofa le botho bja gagwe. Ke mang yo o nyakago go mmona ge bahu ba tsošetšwa bophelong?Bala Johane 3:16; Baroma 6:23.

 

Ithute ka mo go oketšegilego

Bahu ba Kae?

Ithute seo Beibele e se bolelago ka gore bahu ba kae le gore ke ka baka la’ng batho ba ehwa.

Kholofelo ya Kgonthe Bakeng sa Baratiwa ba Gago ba ba Hwilego

Na o hlokofaletše ke motho yo o mo ratago? Na go a kgonega go ba bona gape? Ithute seo Beibele e se bolelago ka tsogo.

Dibopiwa tša Moya—Kamoo di re Kgomago ka Gona

Beibele e bolela ka barongwa le batemona. Na dibopiwa tše tša moya di gona? Di ka go kgoma bjang?