Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ditaba tše Dibotse tše di Tšwago go Modimo!

 Thuto 11

Melao ya Motheo ya Beibele e re Hola Bjang?

Melao ya Motheo ya Beibele e re Hola Bjang?

Melao ya motheo ya Beibele e ka re šušumeletša bjang go gata megato ya tšhireletšego?—PSALME 36:9.

1. Ke ka baka la eng re nyaka tlhahlo?

Mmopi wa rena o bohlale go re feta. Bjalo ka Tate yo lerato, o a re hlokomela. Le gona, ga se a re bopela gore re ipuše. (Jeremia 10:23) Ka gona, go swana le ge ngwana yo monyenyane a nyaka tlhahlo ya batswadi, ka moka ga rena re nyaka tlhahlo ya Modimo. (Jesaya 48:17, 18) Melao ya motheo ya Beibele e re nea tlhahlo yeo e lego mpho e tšwago go Modimo.Bala 2 Timotheo 3:16.

Melao ya Jehofa le melao ya gagwe ya motheo e re ruta tsela e kaonekaone ya bophelo gona bjale le go re bontšha kamoo re ka hwetšago mehola ya ka mo go sa felego nakong e tlago. Ka ge Modimo a re bopile, go tloga go swanetše gore re arabele tlhahlong ya gagwe ka tebogo.Bala Psalme 19:7, 11; Kutollo 4:11.

2. Melao ya motheo ya Beibele ke eng?

Melao ya motheo ya Beibele ke ditherešo tša motheo. Ka lehlakoreng le lengwe, melao e ka dirišwa maemong a lebanyago. (Doiteronomio 22:8) Re swanetše go diriša tlhaologanyo gore re kwešiše kamoo molao wa motheo o šomago ka gona boemong bjo itšego. (Diema 2:10-12) Ka mohlala, Beibele e ruta gore bophelo ke mpho e tšwago go Modimo. Molao woo wa motheo o ka re hlahla ge re le mošomong, ka gae le ge re le leetong. O re dira gore re gate megato ya tšhireletšego.Bala Ditiro 17:28.

3. Ke melao efe ya motheo e mebedi yeo e lego e megolo kudu?

Jesu o boletše ka melao e mebedi ya motheo yeo e lego bohlokwa kudu. Wa pele o utolla morero wa bophelo bja motho—go tseba Modimo, go mo rata, gotee le go mo hlankela ka potego. Re swanetše go ela hloko molao wo wa pele wa motheo diphethong  tša rena ka moka. (Diema 3:6) Bao ba dirago dilo ka go dumelelana le molao wo wa motheo ba ba le segwera le Modimo, lethabo la kgonthe gotee le bophelo bjo bo sa felego.Bala Mateo 22:36-38.

Molao wa bobedi wa motheo o ka re hlahla gore re be le ditswalano tša khutšo le ba bangwe. (1 Bakorinthe 13:4-7) Go diriša molao wo wa bobedi wa motheo go akaretša go ekiša tsela yeo Modimo a swarago ba bangwe ka yona.Bala Mateo 7:12; 22:39, 40.

4. Melao ya motheo ya Beibele e re hola bjang?

Melao ya motheo ya Beibele e ruta malapa tsela ya go tlemaganywa ke lerato. (Bakolose 3:12-14) Lentšu la Modimo gape le thuša malapa ka go a ruta molao o mongwe wa motheo woo o a hlahlago—wa gore lenyalo e swanetše go ba la sa ruri.Bala Genesi 2:24.

Ge re latela dithuto tša Beibele, re ka šireletšega nameng le maikwelong. Ka mohlala, bathwadi gantši ba rata bašomi bao ba phelago ka melao ya motheo ya Beibele ya go botega le go ba mafolofolo. (Diema 10:4, 26; Baheberu 13:18) Lentšu la Modimo gape le re ruta go kgotsofalela dilo tšeo di nyakegago gotee le go tšeela bogwera bja rena le Modimo godimo go feta dilo tše di bonagalago.Bala Mateo 6:24, 25, 33; 1 Timotheo 6:8-10.

Go diriša melao ya motheo ya Beibele go ka šireletša boemo bja rena bja tša maphelo. (Diema 14:30; 22:24, 25) Ka mohlala, go kgomarela molao wa Modimo kgahlanong le botagwa go re šireletša malwetšing a bolayago le dikotsing. (Diema 23:20) Jehofa o re dumelela go nwa dinotagi eupša ka go lekanyetša. (Psalme 104:15; 1 Bakorinthe 6:10) Melao ya motheo ya Modimo e re hola ka go re ruta gore re diše ditiro tša rena le menagano ya rena. (Psalme 119:97-100) Lega go le bjalo, Bakriste ba therešo ga ba fo hlompha ditekanyetšo tša Modimo bakeng sa go ikhola. Ba dira bjalo bakeng sa go godiša Jehofa.Bala Mateo 5:14-16.

 

Ithute ka mo go oketšegilego

Go Phela ka Tsela Yeo e Kgahlišago Modimo

Go a kgonega go phela bophelo bjo bo kgahlišago Jehofa. Ge e le gabotse, o ka ba mogwera wa gagwe..

Pono ya Modimo ka Bophelo

Modimo o lebelela go ntšha mpa, go tšhela madi le bophelo bja phoofolo bjang?

Kgopela Thuto ya Beibele

Hwetša thuto ya mahala ya Beibele ka nako yeo e go swanetšego le lefelong leo le go swanetšego.