Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Dikarabo tše 10 tša Dipotšišo Tšeo Bafsa ba di Botšišago

 POTŠIŠO 6

Nka Dira Eng Gore ke se ke ka Laolwa ke Dithaka tša ka?

Nka Dira Eng Gore ke se ke ka Laolwa ke Dithaka tša ka?

KE KA BAKA LA ENG GO TSEBA GO LE BOHLOKWA?

Ge o ikemela o tla kgona go laola bophelo bja gago, go e na le gore bo laolwe ke ba bangwe.

O BE O TLA DIRA ENG?

Bona ka leihlo la kgopolo tiragalo ye: Ge Brian a sa re, . . . o kopana le bašemanyana ba babedi bao a tsenago le bona sekolo gomme o kwa a bolawa ke mala a masese. Bašemanyana ba ba lekile ka makga a mabedi go mo kgogiša mo bekeng, gomme le e tla ba lekga la boraro.

Mošemanyana wa pele o re go yena:

“O sa le tšhikanoši? E re ke go fe mogwera.”

O ponyetša Brian leihlo ge a re mogwera, ke moka o ntšha selo se sengwe ka potleng ya gagwe o mo nea sona.

Brian o bona sekerete seo mošemanyana yoo a mo neago. Ke moka mala a gagwe a loma le go feta.

Brian o re: “Ke lokile. Akere ke šetše ke go boditše gore ga ke . . . ”

Mošemane wa bobedi o mo tsena ganong o re: “Tlogela go ba setlaela!”

Brian o bolela a tiišitše eupša a tšhogile o re: “Ga ke sona.”

Mošemane wa bobedi o a mo khabara gomme o bolela le yena ka lentšu le boleta o re: “E no se tšea.”

Mošemane wa pele o iša sekerete molomong wa Brian gomme o a mo sebela o re: “Re ka se botše motho. Taba ye e tla felela mo.”

Ge nkabe o le Brian, o be o tla dira’ng?

 EMA GOMME O NAGANE!

Na dithaka tša Brian di be di tseba seo di se dirago? Na di itiretše diphetho? Go ka no se be bjalo. Gantši o ka hwetša e le gore di dumeletše gore batho ba bangwe ba di laole. Ka ge di nyaka go ratwa, di dumelela batho ba bangwe gore ba laole seo di se dirago.

Ge nkabe o le boemong bjo, o be o ka dira’ng gore o pheme go laolwa ke dithaka tša gago?

  1. ITOKIŠE

    Beibele e re: “Yo bohlale ke yo a bonego kotsi a ikuta, eupša ba se nago temogo ba fetile ba wela kotsing.”Diema 22:3.

    Gantši o ka bona kotsi e sa le kgole. Ka mohlala, a re re o bona sehlopha sa bana bao o tsenago le bona sekolo se le kua kgojana gomme se kgoga. Ge o ka bona bothata bjo, o tla kgona go tseba seo o ka se dirago.

  2. NAGANA

    Beibele e re: “Ebang le letswalo le lebotse.”1 Petro 3:16.

    Ipotšiše gore: ‘Ge nka dumela dithaka di ntaola, ke tlo ikwa bjang ka morago?’ Ke nnete gore o tla ba o kgahlišitše dithaka tša gago ka nakwana. Eupša o tla ikwa bjang ka morago? Na o nyaka go itira motho yo o sego yena e le feela gore o kgahliše dithaka tša gago?Ekisodo 23:2.

  3. DIRA PHETHO

    Beibele e re: “Yo bohlale o a boifa.”Diema 14:16.

    Nengneng re swanetše go dira phetho gomme re lebeletšane le ditlamorago tša phetho yeo. Beibele e re botša ka banna ba go swana le Josefa, Jobo le Jesu, bao ba ilego ba dira diphetho tše dibotse. E re botša gape ka Kaine, Esau le Judase, bao ba ilego ba dira diphetho tše di sego bohlale. Wena o tla dira’ng?

Beibele e re: “O dire tša potego.” (Psalme 37:3) Ge e ba o šetše o naganne ka ditlamorago tša diphetho tša gago gomme o tseba seo o tlago go se dira, o tla makatšwa ke kamoo go emela diphetho tšeo go ka bago bonolo ka gona le go ba le mafelelo a mabotse.

O se tshwenyege, ga se gore o swanetše go rerela dithaka tša gago. Go no bolela gore AOWA eupša o tiišitše go lekane. Goba go bontšha gore o ka se fetoše monagano, o ka re:

  • “Tšeo di tla mpalela!”

  • “Ga ke dire dilo tšeo!”

  • “Ke be ke nagana gore le a ntseba!”

Tharollo ke gore o arabe kapejana e bile o kgodišegile. Ge o ka dira bjalo, o ka makatšwa ke go bona kamoo dithaka tša gago di tlago go tlogela go go šala morago!

 SEO O KA SE DIRAGO GE O KWERWA

Ge o dumelela dithaka tša gago di go laola, o tla swana le roboto yeo di e laolago

O ka dira’ng ge dithaka tša gago di go kwera? O ka re’ng ge di ka re: “Bothata bja gago ke’ng—kgane o setlaela?” Ge dithaka tša gago di go kwera ka tsela ye, tseba gore di fo ba di nyaka go go laola. O ka dira’ng? Go na le dilo tše pedi tšeo o ka di dirago.

  • O se ke wa di ganetša. O ka re: “Le bolela nnete, ke lefšega!” Ka morago ga moo o bolele mabaka a gago.

  • O ka di araba ka tsela yeo di bego di sa nagane. Botša dithaka tša gago gore ke ka baka la eng o gana ke moka o bolele gore di go tlabile. O ka re: “Ke be ke nagana gore le bohlale kudu go ka kgoga!”

Ge e ba dithaka tša gago di tšwela pele di go kwera, itshepelele! Gopola gore ge o ka dula le tšona nako e telele, di tla go gapeletša le go feta. Ka go sepela, o bontšha gore ga o nyake gore ba bangwe ba go fetoše.

Therešo ke gore o ka se tšhabele go laolwa ke dithaka. Eupša o ka itirela phetho ya seo o nyakago go se dira, wa bolela gore o eme kae gomme wa se dumele motho a go fetoša. Taba ke gore ke wena o swanetšego go itirela phetho!Joshua 24:15.