Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Dikarabo tše 10 tša Dipotšišo Tšeo Bafsa ba di Botšišago

 POTŠIŠO 7

Nka Dira Eng ge ke Gapeletšwa go Dira Thobalano?

Nka Dira Eng ge ke Gapeletšwa go Dira Thobalano?

KE KA BAKA LA ENG GO TSEBA GO LE BOHLOKWA?

Diphetho tšeo o di dirago ka taba ya go dira thobalano di tla go kgoma bophelong bja gago ka moka.

O BE O TLA DIRA ENG?

Bona ka leihlo la kgopolo tiragalo ye: Heather o na le dikgwedi tše pedi feela a ratana le Mike, eupša Heather o ikwa eka ke kgale a mo tseba. Ba dula ba romelana melaetša, ba fetša diiri tše dintši ba bolela founong, le gona ba kgona go tseba seo yo mongwe a se naganago le pele a ka se bolela! Eupša ga bjale Mike ga a sa nyaka gore ba felele moo.

Dikgweding tše pedi tša ge ba ratana, Mike le Heather ba be ba no swarana ka matsogo le go khisana. Heather ga a nyake go feta mo. Le gona ga a nyake go kgaogana le Mike. Mike ke yena feela a mo dirago gore a ikwe a le botse e bile a ratwa kudu. E bile o ipotša gore: ‘Nna le Mike re a ratana . . .’

Ge e ba o gotše ka mo go lekanego gore o ka ratana gomme o le boemong bja Heather, o be o tla dira’ng?

EMA GOMME O NAGANE!

Thobalano ke mpho yeo Modimo a e neilego banyalani feela. Ge e ba o dira thobalano pele ga lenyalo, ga o hlomphe mpho yeo. Go swana le go tšea seaparo se sebotse seo motho a go reketšego gomme wa hlwekiša ka sona

Ge o ka taboga mohlareng gomme wa leka go fofa bjalo ka nonyana, o tlo gobala ka ge o tla ba o tshetše molao wa tlhago. Ka mo go swanago, ge o ka se latele molao wa boitshwaro wo o rego, “le ile bootswa [goba, thobalano pele ga lenyalo],” o tla ba le ditlamorago tše di sa kgahlišego.1 Bathesalonika 4:3.

Ditlamorago tša go se latele molao woo ke dife? Beibele e re: “Yo a tlwaetšego go dira bootswa o direla mmele wa gagwe sebe.” (1 Bakorinthe 6:18) Na seo ke nnete?

 Ee, banyakišiši ba hweditše gore bafsa ba bantši bao ba dirilego thobalano pele ga lenyalo ba lebeletšana le tše dingwe tša ditlamorago tše di latelago:

  • KGATELETŠEGO. Bafsa ba bantši bao ba dirilego thobalano pele ga lenyalo ba re ba itshotše kudu ka morago.

  • GO SE TSHEPANE. Ka morago ga go robalana, yo mongwe le yo mongwe o ipotšiša gore: ‘O robetše le mang o mongwe ntle le nna?’

  • GO NYAMA. Banenyana ba bantši ka pelong ba a tseba gore ba nyaka motho yo a tlago go ba šireletša, e sego wa go raloka ka bona. Le gona bašemane ba bantši ga ba sa kgahlwa ke ngwanenyana ka morago ga gore ba robale le yena.

  • Therešo e sa fetogego ke gore: Ge o ka dumela go dira thobalano pele ga lenyalo, o tla dula o inyatša ka ge o tla be o lahlegetšwe ke selo sa bohlokwa kudu. (Baroma 1:24) Mmele wa gago o bohlokwa kudu gore o ka o fa motho yo mongwe!

Bontšha gore o ka kgona go ‘ila bootswa.’ (1 Bathesalonika 4:3) Ka gona, ge ka letšatši le lengwe o ka nyala goba wa nyalwa, o tla dira thobalano. O tla e thabela kudu, o se na dipelaelo, o sa itshole le go se itshepe, tšeo gantši e lego ditlamorago tša thobalano ya pele ga lenyalo.Diema 7:22, 23; 1 Bakorinthe 7:3.

 O NAGANA ENG?

  • Na motho yo a tlogago a go rata a ka go kweša bohloko mmeleng le maikwelong?

  • Na motho yo a tlogago a go rata a ka nyaka gore o senye tswalano ya gago le Modimo?Baheberu 13:4.