Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Dikarabo tše 10 tša Dipotšišo Tšeo Bafsa ba di Botšišago

 POTŠIŠO 9

Na ke Swanetše go Dumela Gore Dilo di Itirile?

Na ke Swanetše go Dumela Gore Dilo di Itirile?

KE KA BAKA LA ENG GO TSEBA GO LE BOHLOKWA?

Ge e ba thuto ya gore dilo di itirile e le therešo, gona go ra gore bophelo ga bo na mohola. Ge e ba taba ya gore Modimo ke yena a bopilego dilo e le therešo, gona re ka hwetša dikarabo tše di kgotsofatšago mabapi le bophelo le bokamoso.

O BE O TLA DIRA ENG?

Nagana ka boemo bjo: Alex o gakanegile. Ka mehla o be a dumela gore Modimo o gona le gore ke yena a bopilego dilo. Eupša lehono morutiši wa gagwe wa biology o ba ruta a kgodišegile gore taba ya gore dilo di itirile ke therešo, gore e theilwe bohlatseng bjo bo hweditšwego ke banyakišiši ba tša thutamahlale. Alex ga a nyake gore ba bangwe ba nagane gore ke setlaela. O ipotšiša gore: ‘Ge e ba borathutamahlale ba hlatsetše gore ke nnete gore dilo di itirile, go re’ng nna ke sa ba kgolwe?’

Ge nkabe o be o le Alex, na o be o ka dumela gore dilo di itirile feela ka gobane dipuku tša sekolong di ruta seo?

EMA GOMME O NAGANE!

Batho bao ba dumelago gore dilo di itirile le bao ba sa dumelego seo, gantši ba akgofela go bolela seo ba se dumelago ba sa tsebe gore ke ka baka la eng ba dumela seo.

  • Batho ba bangwe ba dumela gore Modimo o bopile dilo feela ka gobane ba rutilwe seo kerekeng.

  • Batho ba bangwe ba dumela gore dilo di itirile feela ka gobane ba rutilwe bjalo sekolong.

 DIPOTŠIŠO TŠE TSHELELAGO TŠEO O KA IPOTŠIŠAGO TŠONA

Beibele e re: “Ntlo e nngwe le e nngwe e agwa ke motho, eupša yo a agilego dilo ka moka ke Modimo.” (Baheberu 3:4) Na ke mo go kwagalago go dumela seo?

Taba ya gore dilo di itirile ke yeo e sa kwagalego go swana le go bolela gore ga go na motho yo a agilego ntlo ye

MAAKA: Selo se sengwe le se sengwe seo se lego gona se tlile ka morago ga mothuthupo o mogolo.

1. Ke mang goba ke eng seo se bakilego mothuthupo woo?

2. Ke taba efe yeo e kwagalago gakaone? Na ke gore dilo ka moka di tšwa lefeeleng goba na ke gore go na le motho yo a bopilego dilo ka moka?

MAAKA: Batho ba tšwa diphoofolong.

3. Ge e ba batho ba etšwa diphoofolong—ka mohlala, go ditšhwene—ke ka baka la’ng bohlale bja batho le bja ditšhwene bo fapana gakaakaa?

4. Ke ka baka la’ng gaešita le diphedi tše dinyenyane di dirilwe ka tsela e raraganego gakaakaa?

MAAKA: Go na le bohlatse bja gore dilo di itirile.

5. Na motho yo a bolelago taba ye o ikhweleditše bohlatse ka boyena?

6. Ke batho ba bakae bao ba dumelago gore dilo di itirile e le feela ka gobane ba boditšwe gore batho ka moka ba bohlale ba dumela seo?

Julia o re: “Ge o ka re o sepela lešokeng gomme wa bona ntlo e botse, na o ka re: ‘Se se a makatša! Ntlo ye e swanetše go ba e ikagile.’ O ka se bolele bjalo! Seo ga se kgonege. Bjale ke ka baka la’ng re dumela gore dilo ka moka tšeo di lego gona legohleng di itirile?”

Gwen o re: “Nagana motho yo a itšego a go botša gore lefelo la go phrintha dipuku le thuthupile gomme enke ya tšhela maboto le siling ke moka gwa ba le pukuntšu e feletšego. Na o tla mo kgolwa?”

 KE KA BAKA LA ENG O SWANETŠE GO DUMELA GORE MODIMO O GONA?

Beibele e go kgothaletša gore o diriše ‘matla a gago a tlhaologanyo.’ (Baroma 12:1) Se se ra gore ga se wa swanela go dumela gore Modimo o gona feela ka baka la

  • MAIKWELO (Ke no nagana gore go swanetše go ba go na le yo a nago le matla a magolo)

  • TUTUETŠO YA BA BANGWE (Ke phela setšhabeng sa badumedi)

  • KGATELETŠO (Batswadi ba ka ba nthutile gore Modimo o gona, go be go se na seo nka se dirago)

Go e na le moo, o swanetše go ba le mabaka a kwagalago a go dumela seo o se dumelago.

Teresa o re: “Ge ke be ke le ka klaseng ke theeditše morutiši a hlalosa kamoo re bopilwego ka gona, ke be ke tloga ke kgodišegile ka mo go feletšego gore Modimo o gona. Setho se sengwe le se sengwe sa mmele se na le mošomo wa sona, go fihlela ka se senyenyanenyenyane, gomme mešomo yeo re e dira re sa nagane. Ruri mmele wa motho o bopilwe ka tsela e makatšago!”

Richard o re: “Ge ke bona moago o moteleletelele, sekepe se segolo goba koloi, ke ipotšiša gore: ‘Ke mang a dirilego selo se?’ Ka mohlala, gore koloi e be gona, go nyakega batho ba bohlale ka gobane go na le dilo tše dintši tše dinyenyane tšeo di swanetšego go šoma gore koloi e kgone go sepela gabotse. Ge e ba go nyakega motho yo a itšego go hlama dikoloi, gona le rena go swanetše go ba go na le motho yo a re bopilego.”

Anthony o re: “Ge ke dutše ke ithuta thutamahlale, ke ile ka bona gore taba ya gore dilo di itirile ga e kgonege. . . . Ke bona motho a swanetše go ba le tumelo e kgolo gore a dumele gore dilo di itirile go feta go dumela gore go na le Mmopi.”

SEO O KA NAGANAGO KA SONA

Le ge e le kgale kudu go dirwa nyakišišo, borathutamahlale ba sa nyaka tlhaloso yeo ka moka ga bona ba ka dumelelanago ka yona ya gore dilo di itirile. Ge e ba borathutamahlale ba sa dumelelane ka thuto ya gore dilo di itirile—mola e le bona ba swanetšego go tseba gakaone—na o tla ba o fošitše ge o sa dumele thuto yeo?

Ithute ka mo go oketšegilego

Ke Eng Seo Beibele e se Bolelago Mabapi le Tlholo?

Beibele e hlalosa “matšatši” a tshelelago ao ka ona Modimo a bopilego dilo tše di phelago. Na a e be e le matšatši a diiri tše 24?