Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Dikarabo tše 10 tša Dipotšišo Tšeo Bafsa ba di Botšišago

 POTŠIŠO 10

Beibele e ka Nthuša Bjang?

Beibele e ka Nthuša Bjang?

KE KA BAKA LA ENG GO TSEBA GO LE BOHLOKWA?

Beibele e re: “Lengwalo ka moka le buduletšwe ke Modimo.” (2 Timotheo 3:16) Ge e ba se e le therešo, gona Beibele e ka go nea tlhahlo yeo o e nyakago.

O BE O TLA DIRA ENG?

Bona ka leihlo la kgopolo tiragalo e latelago: David o otlela lefelong leo go sa bonagalego selo seo a se tsebago. Maswao a diterata le dilo tšeo a di bonago di bontšha gore ga a moo a swanetšego go ba gona. David o lemoga gore o timetše. Go swanetše go ba go na le moo a khonnego a se a swanela.

O be o tla dira’ng ge o be o le David?

EMA GOMME O NAGANE!

Go na le dilo tše mmalwa tšeo o ka di dirago:

  1. O ka botšiša tsela go batho ba bangwe.

  2. O ka lebelela mmapa goba wa diriša GPS.

  3. O ka no tšwela pele o otlela, o ipotša gore o tla hwetša tsela kaekae.

Go bolela therešo, go dira selo seo se lego go C ga se gantši go ka go thuša.

Go na le seo tharollo ya B e phalago tharollo ya mathomo ka sona. Go ba gona, o tla ba o swere mmapa goba GPS leetong la gago ka moka gore di go thuše go hwetša tsela.

Beibele le yona e ka go thuša ka tsela e swanago!

Puku ye yeo e ratwago kudu

  • e ka go hlahla ge o na le mathata bophelong

  • e ka go thuša go itseba le gore o be motho yo mokaone

  • e ka go bontšha kamoo o ka phelago bophelo bjo bokaonekaone

GO ARABA DIPOTŠIŠO TŠE BOHLOKWA TŠEO RE IPOTŠIŠAGO TŠONA

Gateetee ge re thoma go bolela, re botšiša dipotšišo.

  • Go re’ng leratadima e le le letalalerata?

  • Dinaledi di dirilwe ka’ng?

Ka morago re thoma go ipotšiša ka dilo tšeo di diregago mo lefaseng.

O ka re’ng ge re ka re dikarabo di be di dutše di le gona ka Beibeleng?

Batho ba bantši ba re Beibele e tletše ka dinonwane, e fetilwe ke nako goba go thata kudu go e kwešiša. Eupša na ruri bothata ke Beibele, goba bothata ke seo batho ba se kwelego ka Beibele? Na e ka ba e le gore ga se ba botšwa therešo?

Ka mohlala, batho ba nagana gore Beibele e re Modimo ke yena a laolago lefase. Eupša seo se ka kgonega bjang? Lefase le ga le laolege! Le tletše bohloko le tlaišego, bolwetši le lehu, bodiidi le dikotsi. Na Modimo yo lerato a ka dira dilo tša mohuta wo?

Na o ka rata go tseba karabo? Seo Beibele e re botšago sona mabapi le gore ke mang yo a laolago lefase se ka go makatša!

O swanetše go ba o šetše o lemogile gore keletšo yeo e lego ka poroutšheng ye e tšwa ka Beibeleng. Dihlatse tša Jehofa di kgodišegile gore Beibele e nea tlhahlo yeo re ka e botago. Di kgodišegile ka seo ka gobane e “buduletšwe ke Modimo gomme [e] hola ka go ruta, go kgala, go phošolla le go laya ka toko.” (2 Timotheo 3:16, 17) O swanetše go hlahloba puku ye ya kgale kudu yeo e nago le tlhahlo yeo e šomago lehono!

Ithute ka mo go Oketšegilego

MOROKAMI

Ke ka Baka la Eng o Swanetše go Ithuta Beibele?

Na o kile wa ipotša gore, ‘Ke tloga ke swaregile’ goba ‘Ga ke nyake go itlama’?

Kgopela Thuto ya Mahala ya Beibele

Ke Eng Seo se Diregago Thutong ya Beibele?

Lefaseng ka bophara, Dihlatse tša Jehofa di tsebega ka go etela batho magaeng a bona go ba swarela thuto ya mahala ya Beibele. Bona kamoo e swarwago ka gona.