Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Boela go Jehofa

 KAROLO YA PELE

“Ke tla Tsoma Yeo e Timetšego”

“Ke tla Tsoma Yeo e Timetšego”

Nku e timetše. Go ka direga gore e ile ya arogana le dinku tše dingwe ge e be e fula bjang. Ga bjale ga e kgone go bona mohlape goba modiši wa yona. Leswiswi le thoma go swara. Ka ge e lahlegile moeding woo go phelago dibata, di ka e hlasela gabonolo. Go sa letelwa, ekwa lentšu leo e le tsebago—la modiši wa yona yoo a tlago go yona a kitima, o a e kuka ke moka a e tatetša ka seaparo sa gagwe a e iša gae.

GANTŠI Jehofa o itshwantšha le modiši yo bjalo. O re kgonthišetša ka Lentšung la gagwe gore: “Ke tla tsoma dinku tša ka gomme ka di hlokomela.”—Hesekiele 34:11, 12.

“Dinku tša Mafulo a ka”

Dinku tša Jehofa ke bomang? Ge re bolela ka dinku tša Jehofa, re ra batho bao ba mo ratago le bao ba mo rapelago. Beibele e re: “A re inameng re be re rapeleng; a re khunameng pele ga Jehofa Modiri wa rena. Gobane ke yena Modimo wa rena, gomme rena re batho ba mafulo a gagwe le dinku tšeo di hlahlwago ke seatla sa gagwe.” (Psalme 95:6, 7) Go swana le dinku tšeo di šalago modiši morago, barapedi ba Jehofa ba fagahlela go latela Modiši wa bona. Na se se ra gore ba phethagetše? Aowa. Ka dinako tše dingwe bahlanka ba Modimo e ile ya ba dinku tše ‘gašanego gohle’ le “dinku tše di timetšego.” (Hesekiele 34:12; Mateo 15:24) Lega go le bjalo, Jehofa o dula a holofela  gore motho yo a tlogelago phuthego o tla boa.

Na Jehofa e sa le Modiši wa gago? Jehofa o re diša ka tsela efe lehono? Ela hloko ditsela tše tharo:

O re fepa moyeng. Jehofa o re: “Ke tla di fudiša mafulong a mabotse . . . Moo di tla robala lefelong le lebotse la bodulo gomme tša fula mafulong a matala.” (Hesekiele 34:14) Jehofa o re fa dijo tša moya tšeo di lapološago ka nako e swanetšego. Mohlomongwe o ka ba o gopola sehlogo se itšego, polelo goba bidio yeo e ilego ya araba thapelo ya gago. Na ga se ya go kgodiša gore Jehofa o tshwenyegile ka wena?

O a re šireletša le go re thekga. Jehofa o re holofetša gore: ‘Ke buša yeo e arogilego, yeo e robegilego ka e tlema ka mašela ka ba ka matlafatša yeo e fokolago.’ (Hesekiele 34:16) Jehofa o matlafatša bao ba fokolago goba bao ba imetšwego ke dipelaelo. O tlema dinku tšeo di robegilego ka mašela, a di oka ge e ba di gobetše, mohlomongwe ka go diriša badumedigotee. Le gona o buša bao ba arogilego le bao ba ka bago ba lwantšhana le dikgopolo tšeo di fošagetšego.

O tshwenyega ka rena. Jehofa o re: “Ke tla di hlakodiša mafelong ka moka ao di gašanyeditšwego go ona letšatšing la maru le la leswiswi le leso . . . Ke tla tsoma yeo e timetšego.” (Hesekiele 34:12, 16) Jehofa ga a hloboge nku yeo e timetšego. O kgona go bona ge go na le nku yeo e timetšego, a e tsoma gomme a thaba ge a e hwetša. (Mateo 18:12-14) Gopola gore o bitša barapedi ba gagwe ba therešo gore ke ‘dinku tša gagwe, dinku tša mafulo a gagwe.’ (Hesekiele 34:31) Le wena o yo mongwe wa dinku tšeo.

Jehofa ga a hloboge nku yeo e timetšego. O a thaba ge a e hwetša

“Re Tlišetše Matšatši a Mafsa go Etša Mehleng ya Kgalekgale”

Ke ka baka la’ng Jehofa a go tsoma le gona a go kgopela gore o boele go yena? Ka gobane a nyaka gore o thabe. O holofetša gore o tla nešetša dinku tša gagwe “dipula tša tšhegofatšo.” (Hesekiele 34:26) Kholofetšo yeo ga se toro. Le wena o šetše o na le bohlatse bja seo.

Gopola dilo tšeo di ilego tša go thabiša ge o be o thoma go tseba Jehofa. Ka mohlala, o ile wa ikwa bjang ge o be o thoma go ithuta ka leina la Modimo le morero wa gagwe ka batho? Na o gopola kamoo o ilego wa ipshina ka gona ge o na le Bakristegotee dikopanong tše dinyenyane le tše dikgolo? Na o be o sa ikwe o thabile e bile o kgotsofetše ge o boela gae ka morago ga go botša motho yo a bontšhitšego kgahlego ditaba tše dibotse?

O ka ba le lethabo leo gape. Bahlanka ba Modimo ba bogologolo ba rapetše ka gore: “Wena Jehofa, re bušetše go wena gomme re tla boa. Re tlišetše matšatši a mafsa go etša mehleng ya kgalekgale.” (Dillo tša Jeremia 5:21) Jehofa o ile a araba thapelo yeo, gomme batho ba gagwe ba ile ba boela go yena ba mo hlankela ba thabile. (Nehemia 8:17) Jehofa o tla go direla se se swanago.

Lega go le bjalo, go boela go Jehofa ga e nape e le selo se bonolo. Ela hloko tše dingwe tša ditlhohlo tšeo di ka tšwelelago ge o boela go Jehofa le kamoo o ka swaraganago le tšona.