Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Boela go Jehofa

 KAROLO YA BORARO

Ge re Kgopišitšwe—Ge re na le “Lebaka la go ba le Pelaelo”

Ge re Kgopišitšwe—Ge re na le “Lebaka la go ba le Pelaelo”

“Kgaetšedi yo mongwe ka phuthegong o be a nagana gore ke mo utsweditše tšhelete. Ba bangwe ka phuthegong ba ile ba tseba ka taba yeo gomme ba thoma go tšea lehlakore. Mafelelong, kgaetšedi yoo o ile a lemoga gore ga se nna ke mo utsweditšego tšhelete. Le ge a ile a kgopela tshwarelo, go be go le thata go mo lebalela ka seo a ntirilego sona.”—Linda.

NA O ikwa go swana le Linda, yoo a ilego a kgopišwa ke ditiro tša modumedigotee le yena? Ka manyami ba bangwe ba ile ba kgopišwa ke boitshwaro bja ditho tša phuthego moo tswalano ya bona le Modimo e ilego ya thoma go fokola. Na le wena o diragaletšwe ke se se swanago?

Na go na le yo a ka re ‘Aroganyago le Lerato la Modimo’?

Ke therešo gore re ka hwetša go le thata go lebalela modumedigotee le rena yo a re kgopišitšego. Go ba gona, Bakriste ba swanetše go ratana. (Johane 13:34, 35) Re ka nyama le go kwa bohloko ge re kgopišitšwe ke modumedigotee le rena.—Psalme 55:12.

Beibele e bolela gore go na le dinako tšeo Bakriste ba ka dirago gore ba bangwe ba be le “lebaka la go ba le pelaelo.” (Bakolose 3:13) Lega go le bjalo, re ka thatafalelwa ke go lebeletšana le boemo bjoo ge bo re diragalela. Re ka thušwa ke’ng? Ela hloko melao ya motheo e meraro:

Tatago rena wa legodimong o bona dilo ka moka. Jehofa o bona dilo ka moka tšeo di diregago, go akaretša go hloka toka le tlaišego yeo re lebeletšanago le yona. (Baheberu 4:13) Go feta moo, Jehofa o re kwela bohloko ge re tlaišega. (Jesaya 63:9) Le ka mohla ga a dumelele “tlalelo goba tlaišo” goba selo le ge e le sefe, go akaretša le modumedigotee, go “re aroganya le lerato la Modimo.” (Baroma 8:35, 38, 39) Le rena ga se ra swanela go dumelela selo le ge e le sefe goba motho le ge e le ofe go re aroganya le Jehofa.

Go lebalela ga se phošo. Ge re lebalela bao ba re kgopišitšego, ga se gore re bebofatša le go lokafatša ditiro tša bona goba go di hlokomologa. Gopola gore Jehofa le ka mohla ga a amogele sebe, eupša o a se lebalela ge e ba go na le lebaka le le kwagalago la go dira bjalo. (Psalme 103:12, 13; Habakuku 1:13) Ge e le gabotse, Jehofa o re kgothaletša gore re mo ekiše ka go lebalela ba bangwe. Ga a “dule a befetšwe go iša mehleng ya neng le neng.”—Psalme 103:9; Mateo 6:14.

Re a holega ge re sa boloke sekgopi. Ka tsela efe? Nagana ka boemo bjo bo latelago. O kuka leswika leo le imelago ka letsogo le tee. Go ka ba bonolo go dula o le kukile ka nakwana. Eupša go thwe’ng ge o leka go le kuka ka nako e telele? O be o ka kgotlelela nako e kaakang—metsotso e itšego, iri goba go feta moo? Ga go pelaelo gore letsogo la gago le be le tla lapa! Therešo ke gore, boima bja leswika bo ka se fetoge. Eupša go le kuka ka nako e telele go tla dira gore le imele le go feta. Go bjalo le ka go boloka sekgopi. Ge re dula re bolokile sekgopi, go sa šetšwe gore ke se senyenyane gakaakang—re ikgobatša le go feta. Ga go makatše ge Jehofa a re kgothaletša  gore re se boloke sekgopi. Ruri re a holega ge re sa boloke sekgopi.—Diema 11:17.

Re a holega ge re sa boloke sekgopi

“Go be go le Bjalo ka ge Eka Jehofa o Bolela le Nna”

Linda o thušitšwe ke’ng gore a se boloke sekgopi ka morago ga gore modumedigotee a mo sware gampe? Se sengwe sa dilo tšeo di mo thušitšego e bile go naganišiša ka Mangwalo ao a bolelago ka go lebalela. (Psalme 130:3, 4) Linda o thušitšwe kudu ke go tseba gore Jehofa o a re lebalela ge e ba le rena re lebalela ba bangwe. (Baefeso 4:32–5:2) Ge a hlalosa kamoo mangwalo ao a mo thušitšego, o re: “Go be go le bjalo ka ge eka Jehofa o bolela le nna.”

Ge nako e dutše e eya, Linda o ile a tlogela go boloka sekgopi. O ile a lebalela kgaetšedi yoo ka bolokologi, gomme ga bjale yena le kgaetšedi yoo ke bagwera ba bagolo. Linda o tšwela pele a hlankela Jehofa. Kgodišega gore Jehofa o nyaka go go thuša gore o dire se se swanago.