Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Boela go Jehofa

 KAROLO YA BOBEDI

Dipelaelo—“Re Gateletšwe ka Ditsela Tšohle”

Dipelaelo—“Re Gateletšwe ka Ditsela Tšohle”

“Nna le monna wa ka re ile ra hlalana ka morago ga nywaga e 25. Bana ba ka ba ile ba tlogela phuthego. Ke ile ka ba le malwetši a mantši a šoro. Ke moka ka ba le kgateletšego ya monagano. Ke be ke nagana gore ke paletšwe ke bophelo le gona ke be ke sa hlwe ke sa kgona go kgotlelela. Ke ile ka tlogela go ya dibokeng, gomme ka fola moyeng.”—June.

BATHO ka moka ba tshwenywa ke dipelaelo—go akaretša le batho ba Modimo. Mopsalme o ngwadile gore: “Dikgopolo [goba, “dipelaelo”] tša ka tše di mpherekanyago di be di ata ka go nna.” (Psalme 94:19) Le gona Jesu o itše mehleng ya bofelo, “dipelaelo tša bophelo” di be di tla dira gore go be thata go hlankela Jehofa. (Luka 21:34) Go thwe’ng ka wena? Na o tshwenywa ke mathata a tša ditšhelete, a lapa goba malwetši a itšego? Jehofa a ka go thuša bjang go lebeletšana le ona?

“Matla a Fetago a Tlwaelegilego”

Re ka se kgone go lebeletšana le dipelaelo ka borena. Moapostola Paulo o ngwadile gore: “Re gateletšwe ka ditsela tšohle, . . . re a gakantšhwa . . . ; re lahlelwa fase ke mathata.” Eupša gape o itše ga se ra “pitlaganywa wa go palelwa ke go šutha,” “ga se gore ga re na tsela ya go tšwa” le gona “ga re senywe.” Re thušwa ke’ng gore re kgotlelele? Ke “matla a fetago a tlwaelegilego,” e lego matla a tšwago go Modimo Ramatlaohle, Jehofa.—2 Bakorinthe 4:7-9.

Gopola kamoo nakong e fetilego o ilego wa hwetša “matla a fetago a tlwaelegilego.” Na o sa gopola kamoo polelo e kgothatšago e ilego ya dira gore o tšeele godimo kamoo o ratago Jehofa ka gona? Na tumelo ya gago dikholofetšong tša Jehofa e ile ya matlafala ge o be o ruta ba bangwe ka kholofelo ya Paradeise? Ge re eya dibokeng tša Bokriste gomme re bolela le ba bangwe ka tumelo ya rena, re ba le matla a go kgotlelela dipelaelo tša bophelo le khutšo ya monagano e le gore re hlankele Jehofa re thabile.

‘Latswa o be o Bone Gore Jehofa o Lokile’

Ke therešo gore o ka bona go na le dilo tše dintši tšeo o swanetšego go di dira. Ka mohlala, Jehofa o re kgopela gore re tsome Mmušo pele le gore re ithute ka mehla. (Mateo 6:33; Luka 13:24) Eupša go thwe’ng ge e ba o feditšwe matla ke kganetšo, go se phele gabotse mmeleng, goba mathata a lapa? Goba go thwe’ng ge e ba o se na nako le matla a go ba le phuthego ka baka la mošomo wa gago wa boiphedišo? O ka ikwa o imetšwe ka ge go na le dilo tše dintši tšeo o swanetšego go di dira gomme o se na nako le matla a go di dira. Mohlomongwe o kile wa nagana gore Jehofa o nyaka mo gontši go wena.

Jehofa o kwešiša maemo a rena. Le ka mohla ga a nyake seo se fetago matla a rena. Le gona o a tseba gore go tšea nako gore motho a boele sekeng ka morago ga go ba le mathata le kgateletšego.—Psalme 103:13, 14.

Ka mohlala, ela hloko kamoo Jehofa a ilego a hlokomela moporofeta Eliya. Ge Eliya a be a nolegile moko le go boifa go fihla bokgoleng bja gore a tšhabele lešokeng, na Jehofa o ile a kgalemela moporofeta yo gomme a mo laela gore a boele kabelong ya gagwe? Aowa. Jehofa o ile a romela morongwa wa gagwe gabedi gore a mo tsoše gomme  a mo fe dijo. Le ge Jehofa a dirile seo, ka morago ga matšatši a 40, Eliya o be a sa tshwenyegile e bile a boifa. Jehofa o ile a mo thuša bjang gape? Sa pele, Jehofa o ile a mmontšha gore a ka kgona go mo šireletša. Sa bobedi, Jehofa o ile a kgothatša Eliya ka “lentšu la tlasana.” Mafelelong Jehofa o ile a utolla gore go na le batho ba diketekete bao ba bego ba hlankela Modimo ka potego. Go se go ye kae, Eliya e be e le moporofeta yo a fišegago gape. (1 Dikgoši 19:1-19) Re ithuta’ng go se? Ge Eliya a be a imetšwe ke dipelaelo, Jehofa o ile a se mo felele pelo gomme a mo kwela bohloko. Jehofa ga se a fetoga. Ka mo go swanago, o tshwenyegile ka rena.

Nea Jehofa seo o ka se kgonago. O se ke wa bapetša seo o kgonago go se dira gona bjale le seo o bego o kgona go se dira nakong e fetilego. Ka mohlala: Mokitimi yo a kgaoditšego go kitima ka dikgwedi goba nywaga e mmalwa go tla mo tšea nako gore a kitime go etša nakong e fetilego. Ka gona, o thoma ka go kitima ganyenyane gore a tlwaele le gona a kgone go kgotlelela. Bakriste ba swana le bakitimi. Ba ipeela pakane yeo ba ka e fihlelelago. (1 Bakorinthe 9:24-27) Ke ka baka la’ng o sa ipeele pakane e itšego ya moya yeo ga bjale o ka kgonago go e fihlelela? Ka mohlala, o ka ipeela pakane ya go ya dibokeng. Kgopela Jehofa gore a go thuše go fihlelela pakane yeo. Ge o thoma go batamela kgauswi le Modimo, o tla ‘latswa o be o bone gore Jehofa o lokile.’ (Psalme 34:8) Gopola gore selo le ge e le sefe seo o se dirago go bontšha gore o rata Jehofa, go sa šetšwe gore ke senyenyane gakaakang, se bohlokwa go yena.—Luka 21:1-4.

Le ka mohla Jehofa ga a nyake seo se fetago matla a rena

“Kgothatšo Yeo ke Bego ke e Hloka”

Jehofa o ile a matlafatša bjang June gore a kgone go boela go Yena? June o re: “Ga se ka tlogela go rapela Jehofa le go mo kgopela gore a nthuše. Ke moka ngwetši ya ka e ile ya mpotša ka kopano yeo e tlago go ba gona mo motseng. Ke ile ka ba gona kopanong yeo ka letšatši le tee. Ruri go be go le bose go ba gare ga batho ba Jehofa gape! Kopano yeo e be e le kgothatšo yeo ke bego ke e hloka. Ke boetše ke hlankela Jehofa ke thabile. Ga bjale bophelo bja ka bo na le morero. Ke ithutile gore ke hloka bana bešo le dikgaetšedi le gore ke swanetše go amogela thušo ya bona. Ke leboga gore go be go sa na le nako ya gore ke boe ka phuthegong.”

Ithute ka mo go oketšegilego

Dulang le Batamela Jehofa

Re ka batamela bjang kgauswi le Jehofa ka go bea thekinolotši, boemo bja tša maphelo, tšhelete le boikgantšho maemong a swanetšego?