Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 112: Sekepe Seo se Robegilego Sehlakahlakeng

Kgaolo 112: Sekepe Seo se Robegilego Sehlakahlakeng

BONA! Sekepe se se kotsing. Se pšhatlagana ka diripana! Na o a ba bona batho bao ba itahletšego ka mo meetseng? Ba bangwe ba šetše ba le kgauswi le go fihla lebopong. Na yo ke Paulo? Anke re bone seo se bego se mo diragalela.

Bao ba phologilego sekepeng sa go robega

Gopola gore e be e šetše e le nywaga e mebedi Paulo e le mogolegwa Kesarea. Ke moka yena le bagolegwa ba bangwe ba ile ba nametšwa sekepe ba išwa Roma. Ge ba feta kgauswi le sehlakahlaka sa Kereta, ba gahlana le phefo e matla. Phefo yeo e be e tšutla ka matla moo banna bao ba bego ba palelwa ke go sepediša sekepe. Ba be ba sa kgone go bona letšatši mosegare goba dinaledi bošego. Mafelelong ka morago ga matšatši a mantši, batho ka moka bao ba bego ba le ka sekepeng se ba ile ba felelwa ke kholofelo ya gore ba tla phologa.

Ke moka Paulo a ema gomme a re: ‘Ga go le o tee wa lena yo a tlago go hwa; go tla senyega sekepe feela. Gobane bošegong bja maabane morongwa wa Modimo o tlile go nna a re: “Paulo, o se ke wa boifa! O swanetše go ema pele ga Kesara mmuši wa Roma. Le gona Modimo o tla phološa bohle bao ba nametšego sekepe le wena.”’

Mo e ka bago bošegogare letšatšing la bo-14 ka morago ga ge phefo e thomile go tšutla, basesiši ba sekepe ba lemoga gore meetse ga a sa iša fase kudu. Ka ge ba be ba boifa gore sekepe se ka thula maswika leswiswing, ba lahlela ditšhipi tša go se emiša ka meetseng. Mesong e latelago ba bona lebopo. Ba phetha ka gore ba leke go iša sekepe se moo.

Ge ba batamela lebopo, sekepe sa thula mokgobo wa lešabašaba gomme sa tanywa. Ke moka maphoto a se itia gomme sa thoma go pšhatlagana ka diripana. Molaodi wa madira a re: ‘Lena ka moka bao le kgonago go rutha, itahleleng pele ka lewatleng gomme le lebe lebopong. Lena ba bangwe ba lateleng gomme le tšee diripana tša sekepe le itshwareletše ka tšona.’ Ba ile ba dira sona seo. Ka tsela ye, batho ka moka ba 276 bao ba bego ba le ka sekepeng se ba fihla lebopong ba sa phela, go etša ge morongwa a be a holofeditše.

Sehlakahlaka se se be se bitšwa Melite. Batho ba mo ba be ba lokile kudu gomme ba ile ba hlokomela batho bao ba bego ba nametše sekepe se. Ge boemo bja leratadima bo kaonefala, Paulo a nametšwa sekepe se sengwe gomme a išwa Roma.

Ditiro 27:1-44; 28:1-14.



Dipotšišo

  • Go ile gwa direga’ng ka sekepe seo Paulo a bego a se nametše ge se be se feta kgauswi le sehlakahlaka sa Kereta?
  • Ke’ng seo Paulo a ilego a se botša bao ba bego ba le ka sekepeng?
  • Go tlile bjang gore sekepe se pšhatlagane ka diripana?
  • Ke ditaelo dife tšeo molaodi wa madira yo a bego a hlokometše bagolegwa a ilego a di nea, gomme ke batho ba bakae bao ba ilego ba fihla lebopong ba sa phela?
  • Sehlakahlaka seo ba fihletšego go sona se be se bitšwa’ng, gona Paulo o ile a diragalelwa ke eng ge boemo bja leratadima bo kaonefala?

Dipotšišo tša tlaleletšo

  • Bala Ditiro 27:1-44.

    Go kgodišega ga rena ka go nepagala ga pego ya Beibele go tiišwa bjang ge re bala pego ya leeto la Paulo la ka lewatleng la go ya Roma? (Dit. 27:16-19, 27-32; Luka 1:3; 2 Tim. 3:16, 17)

  • Bala Ditiro 28:1-14.

    Ge e ba badudi ba Melite ba baheitene ba ile ba tutueletšega go swara moapostola Paulo le batho bao a bego a sepela le bona ge ba be ba robegetšwe ke sekepe ka “botho bjo bo fetago bjo bo tlwaelegilego,” Bakriste ba swanetše go tutueletšega go bontšha’ng le gona ka tsela efe? (Dit. 28:1, 2; Baheb. 13:1, 2; 1 Pet. 4:9)

Ithute ka mo go oketšegilego

Karata ya Beibele ya Paulo

Paulo o be a iphediša ka’ng bodireding bja gagwe? Bala karata ye ya Beibele gore o hwetše karabo.