Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 109: Petro o Etela Koronelio

Kgaolo 109: Petro o Etela Koronelio

MONNA yo a emego mo ke moapostola Petro gomme bao ba lego ka morago ga gagwe ke ba bangwe ba bagwera ba gagwe. Eupša ke ka baka la’ng monna yo yo mongwe a khunamela Petro? Na o swanetše go dira bjalo? Na o a tseba gore ke mang?

Petro o kopana le Koronelio

Ke Koronelio. E be e le molaodi wa madira a Roma. Koronelio o be a sa tsebe Petro, eupša o be a boditšwe gore a mmitše a tle ntlong ya gagwe. Anke re bone kamoo se se ilego sa direga ka gona.

Balatedi ba Jesu ba pele e be e le Bajuda, eupša Koronelio e be e se Mojuda. Lega go le bjalo, o be a rata Modimo, a mo rapela e bile a direla batho dilo tše dintši tše dibotse. Ke moka mathapameng a mangwe, morongwa o ile a tla go yena gomme a re: ‘Modimo o kgahlwa ke wena, le gona o tla araba dithapelo tša gago. Roma banna gore ba yo bitša monna yo a bitšwago Petro. O dula Jopa ntlong ya Simone yo a dulago hleng ga lewatle.’

Gateetee Koronelio a roma banna ba yo nyaka Petro. Letšatšing le le latelago ge banna bao ba le kgauswi le go fihla Jopa, Petro o be a le ka godimo ga ntlo ya Simone. Gona moo Modimo a mmontšha pono yeo go yona a ilego a bona lešela le legolo le theoga legodimong. Ka lešeleng leo go be go na le diphoofolo tša mehuta ka moka. Go ya ka molao wa Modimo, diphoofolo tšeo di be di se tša hlweka gore di ka jewa, eupša lentšu la re go yena: ‘Petro, tsoga. Hlaba o je.’

Petro a re: ‘Aowa! Le ka mohla ga se ka ka ka ja selo se se sa hlwekago.’ Eupša lentšu leo la re go Petro: ‘Kgaotša go bitša seo Modimo ga bjale a rego se hlwekile gore se šilafetše.’ Se se ile sa direga ka makga a mararo. Bjale ge Petro a sa makaditšwe ke seo se ka bago se bolelwa ke pono yeo, banna bao ba bego ba romilwe ke Koronelio ba fihla moo ntlong ya Simone gomme ba nyaka Petro.

Petro a theogela lebatong la ka tlase gomme a re go bona: ‘Ke nna monna yo le mo nyakago. Ke ka baka la’ng le tlile mo?’ Ge banna bao ba mo hlalosetša gore morongwa o boditše Koronelio gore a mmitše a tle ntlong ya gagwe, a dumela go sepela le bona. Letšatšing le le latelago, Petro le bagwera ba gagwe ba tloga ba ya go Koronelio kua Kesarea.

Koronelio o be a biditše metswalo ya gagwe le bagwera ba gagwe ba kgauswi. Ge Petro a tsena, Koronelio a mo gahlanetša. A wela fase dinaong tša Petro gomme a mo khunamela, bjalo ka ge o bona mo seswantšhong. Eupša Petro a re go yena: “Ema; le nna ke fo ba motho.” Ee, Beibele e bontšha gore ke phošo go khunamela motho yo mongwe le go mo rapela. Re swanetše go rapela Jehofa feela.

Ke moka Petro a botša batho bao ba bego ba kgobokane moo ditaba tše dibotse. A re go bona: ‘Bjale ke a bona gore Modimo o amogela batho ka moka bao ba nyakago go mo hlankela.’ Eitše ge a sa bolela ditaba tšeo, Modimo a romela moya wa gagwe o mokgethwa gomme batho bao ba thoma go bolela ka maleme a šele. Se sa makatša barutiwa ba Bajuda bao ba bego ba tlile le Petro ka gobane ba be ba nagana gore Modimo o rata Bajuda feela. Ka gona, seo sa ba ruta gore Modimo ga a lebelele batho ba morafo o itšego e le ba bakaone goba e le ba bohlokwa kudu go yena go phala batho ba morafo o mongwe. Na se ga se selo se bohlokwa seo ka moka ga rena re swanetšego go se gopola?

Ditiro 10:1-48; 11:1-18; Kutollo 19:10.



Dipotšišo

  • Monna yo a khunamego mo seswantšhong ke mang?
  • Ke’ng seo morongwa a ilego a se botša Koronelio?
  • Ke’ng seo Modimo a ilego a se bontšha Petro ge a be a le ka godimo ga ntlo ya Simone kua Jopa?
  • Ke ka baka la’ng Petro a ile a botša Koronelio gore ga se a swanela go mo khunamela le go mo rapela?
  • Ke ka baka la’ng barutiwa ba Bajuda le Petro ba ile ba makala?
  • Ke thuto efe ya bohlokwa yeo re swanetšego go ithuta yona ka seo se diragetšego ge Petro a be a etetše Koronelio?

Dipotšišo tša tlaleletšo

  • Bala Ditiro 10:1-48.

    Mantšu a Petro ao a lego go Ditiro 10:42 a bontšha’ng mabapi le modiro wa go bolela ditaba tše dibotse tša Mmušo wa Modimo? (Mat. 28:19; Mar. 13:10; Dit. 1:8)

  • Bala Ditiro 11:1-18.

    Ke boemo bofe bja kgopolo bjo Petro a ilego a bo bontšha ge go be go eba molaleng gore Jehofa o nyaka eng ka batho ba ditšhaba, gomme re ka ekiša bjang mohlala wa gagwe? (Dit. 11:17, 18; 2 Bakor. 10:5; Baef. 5:17)

Ithute ka mo go oketšegilego

Modimo ga a Bebe Sefahlego

Ke thuto efe ya bohlokwa yeo re swanetšego go ithuta yona ketelong ya Petro go Koronelio?