Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 107: Stefano o Kgatlwa ka Maswika

Kgaolo 107: Stefano o Kgatlwa ka Maswika

MONNA yo a khunamego mo ke Stefano. E be e le morutiwa yo a botegago wa Jesu. Eupša bona seo gona bjale se mo diragalelago! Banna ba ba mo kgatla ka maswika a magolo. Ke ka baka la’ng ba be ba hloile Stefano gakaakaa moo ba bilego ba mo dira selo se se sešoro? Anke re bone.

Stefano o kgatlwa ka maswika

Modimo o be a dutše a thuša Stefano go dira mehlolo e makatšago. Bjale banna ba ba be ba sa rate seo, ka gona ba ile ba ngangišana le yena ka go ruta ga gagwe batho therešo. Eupša Modimo a mo nea bohlale bjo bogolo gomme Stefano a bontšha banna ba gore ke kgale ba ruta batho maaka. Se se ile sa ba galefiša kudu le go feta. Ka gona ba mo swara, ke moka ba bitša batho ba itšego gore ba tle ba bolele maaka ka yena.

Moperisita yo a phagamego a botšiša Stefano a re: ‘Na dilo tše ba di bolelago ka wena ke therešo?’ Stefano a araba ka go nea polelo e botse yeo e theilwego Beibeleng. A phetha polelo yeo ka go bolela gore ke kgale batho ba babe ba hloile baporofeta ba Jehofa. Ke moka a re: ‘Le fo swana le batho bao. Le bolaile Jesu mohlanka wa Modimo e bile ga se la kwa melao ya Modimo.’

Se se ile sa galefiša baetapele bao ba bodumedi kudu! Ba lomaganya meno ka kgalefo. Eupša Stefano a lebelela legodimong gomme a re: ‘Bonang! Ke bona Jesu a eme ka letsogong la le letona la Modimo legodimong.’ Ge banna ba ba ekwa se, ba thiba ditsebe tša bona ke moka ba kitimela go yena. Ba mo swara gomme ba mo gogela ka ntle ga motse.

Banna ba ba apola diaparo tša bona ba di nea lesogana leo le bitšwago Saulo gore le di hlokomele. Na o bona Saulo mo seswantšhong? Ka morago ga moo, ba bangwe ba bona ba thoma go kgatla Stefano ka maswika. Stefano a khunama, bjalo ka ge o mmona mo, ke moka a rapela Modimo a re: ‘Jehofa, o se ke wa ba otla ka baka la sebe se sa bona.’ Stefano o be a tseba gore ba bangwe ba banna ba ba be ba arošitšwe ke baetapele ba bodumedi. Ka morago ga ge a boletše seo, a hwa.

Ge motho yo mongwe a go dirile selo se sebe, na o leka go itefeletša goba wa kgopela Modimo gore a mo otle? Se ga se seo Stefano goba Jesu ba se dirilego. Ba be ba swara batho ba bangwe gabotse gaešita le ge batho bao ba be ba ba swara gampe. Anke le rena re leke go latela mohlala wa bona.

Ditiro 6:8-15; 7:1-60.



Dipotšišo

  • Stefano e be e le mang, gomme Modimo o be a dutše a mo thuša go dira’ng?
  • Ke’ng seo Stefano a ilego a se bolela seo se ilego sa galefiša baetapele ba bodumedi kudu?
  • Ge banna ba bangwe ba be ba gogetše Stefano ka ntle ga motse, ba ile ba mo dira’ng?
  • Monna yo a emego kgauswi le diaparo mo seswantšhong ke mang?
  • Ke’ng seo Stefano a ilego a se botša Jehofa ka thapelo pele ga ge a ka hwa?
  • E le go ekiša Stefano, ke eng seo re swanetšego go se dira ge motho yo mongwe a re dira selo se sebe?

Dipotšišo tša tlaleletšo

  • Bala Ditiro 6:8-15.

    Ke mekgwa efe ya bofora yeo baetapele ba bodumedi ba ilego ba e diriša go leka go emiša modiro wa go bolela ditaba tše dibotse wa Dihlatse tša Jehofa? (Dit. 6:9, 11, 13)

  • Bala Ditiro 7:1-60.

    Ke’ng seo se ilego sa thuša Stefano gore a atlege go lwela ditaba tše dibotse pele ga kgoro ya Sanhedrine, gomme re ka ithuta’ng mohlaleng wa gagwe? (Dit. 7:51-53; Baroma 15:4; 2 Tim. 3:14-17; 1 Pet. 3:15)

    Ke boemo bofe bja kgopolo bjo re swanetšego go ba le bjona ka batho bao ba ganetšago modiro wa rena? (Dit. 7:58-60; Mat. 5:44; Luka 23:33, 34)