Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 106: Ba Lokollwa Kgolegong

Kgaolo 106: Ba Lokollwa Kgolegong

BONA morongwa mo o butše mejako ya kgolego. Batho bao a ba lokollago ke baapostola ba Jesu. Anke re bone seo se dirilego gore ba lahlelwe kgolegong.

Morongwa o lokolla baapostola

Go be go fetile matšatši a sego kae feela ga e sa le moya o mokgethwa o tšholletšwe godimo ga barutiwa ba Jesu. Ke moka gwa direga selo se se latelago: Thapameng e nngwe, Petro le Johane ba ile ba tsena tempeleng ya Jerusalema. Kgauswi le mojako wa tempele go be go dutše monna yo mongwe yo a belegwego e le segole. Batho ba be ba mo tliša mo letšatši le letšatši e le gore a tle a kgopele tšhelete go bohle bao ba bego ba tsena ka tempeleng. Ge a bona Petro le Johane, a ba kgopela gore ba mo nee selo le ge e le sefe seo ba nago le sona. Baapostola ba ba be ba tla dira’ng?

Ba ile ba ema gomme ba lebelela monna yoo yo a bego a kweša bohloko. Petro a re go yena: ‘Ga ke na tšhelete, eupša ke tla go nea seo ke nago le sona. Ka leina la Jesu, ema o sepele!’ Petro a mo swara ka seatla sa le letona gomme gateetee a tshelatshela a thoma go sepela. Ge batho ba bona se, ba makala le go thabišwa kudu ke mohlolo wo.

Petro a re go bona: ‘Re dirile mohlolo wo ka matla a Modimo yo a tsošitšego Jesu bahung.’ Eitše ge yena le Johane ba sa bolela, gwa fihla baetapele ba bangwe ba bodumedi. Ba be ba galefile ka gobane Petro le Johane ba be ba botša batho gore Jesu o tsošitšwe bahung. Ka gona ba ba swara ba ba lahlela kgolegong.

Letšatšing le le latelago, baetapele bao ba bodumedi ba swara seboka se segolo. Gwa tlišwa Petro le Johane gotee le monna yo ba mo fodišitšego. Ba ba botšiša ba re: ‘Mohlolo wo le o dirile ka matla a mang?’

Petro a ba botša gore ba o dirile ka matla a Modimo yo a tsošitšego Jesu bahung. Baperisita bao ba se sa tseba seo ba ka se dirago, ka gobane ba be ba ka se gane gore mohlolo woo o diregile e le ka kgonthe. Ka gona ba tšhošetša baapostola gore ba se sa bolela ka Jesu, ke moka ba ba lokolla.

Ge matšatši a dutše a eya, baapostola ba ile ba tšwela pele ba bolela ka Jesu le go fodiša balwetši. Ditaba tša mabapi le mehlolo ye tša tsebja gohle. Ka gona gaešita le batho bao ba tšwago metseng ya kgauswi le Jerusalema ba be ba tliša balwetši ba bona gore baapostola ba ba fodiše. Se se ile sa galefiša baetapele ba bodumedi, ka go re’alo ba swara baapostola ba ba lahlela kgolegong. Eupša ga se ba ka ba dula moo nako e telele.

Bošegong bjoo, morongwa wa Modimo o ile a tla gomme a bula mejako ya kgolego, bjalo ka ge o bona mo seswantšhong. A re go baapostola: ‘Sepelang le ye le eme tempeleng gomme le botše batho ditaba tše dibotse.’ Mesong e latelago ge baetapele ba bodumedi ba romela banna kgolegong gore ba tle le baapostola, ba hwetša ba se gona. Ka moragonyana ba ba hwetša ba ruta tempeleng ke moka ba ba tliša holong ya Sanhedrine.

Baetapele bao ba bodumedi ba re: ‘Re le laetše ka matla gore le se sa bolela ka Jesu. Eupša le tladitše Jerusalema ka thuto ya lena.’ Ke moka baapostola ba araba ba re: “Modimo ke mmuši yo re swanetšego go mo kwa go e na le go kwa batho.” Ka go re’alo, ba tšwela pele ba bolela “ditaba tše dibotse.” Na wo ga se mohlala o mobotse woo re swanetšego go o latela?

Ditiro dikgaolo 3 go ya go 5.



Dipotšišo

  • Petro le Johane ba ile ba diragalelwa ke eng thapameng e nngwe ge ba be ba tsena tempeleng?
  • Ke’ng seo Petro a ilego a se botša monna yoo wa segole, gomme Petro o ile a mo nea selo sefe se bohlokwa go feta tšhelete?
  • Ke ka baka la’ng baetapele ba bodumedi ba ile ba galefa, gona ke eng seo ba ilego ba se dira Petro le Johane?
  • Ke’ng seo Petro a ilego a se botša baetapele bao ba bodumedi, gona ke temošo efe yeo baapostola ba ilego ba e newa?
  • Ke ka baka la’ng baetapele ba bodumedi ba be ba na le mona, eupša go ile gwa direga’ng ge baapostola ba be ba golegilwe ka lekga la bobedi?
  • Baapostola ba ile ba araba bjang ge ba be ba tlišitšwe holong ya Sanhedrine?

Dipotšišo tša tlaleletšo

  • Bala Ditiro 3:1-10.

    Gaešita le ge lehono re se ra fiwa matla a go dira mehlolo, mantšu a Petro ao a begilwego go Ditiro 3:6 a re thuša bjang go kwešiša bohlokwa bja molaetša wa Mmušo wa Modimo? (Joh. 17:3; 2 Bakor. 5:18-20; Bafil. 3:8)

  • Bala Ditiro 4:1-31.

    Ge re lebeletšane le kganetšo bodireding, re swanetše go ekiša bana babo rena ba Bakriste ba lekgolong la pele la nywaga ka tsela efe? (Dit. 4:29, 31; Baef. 6:18-20; 1 Bathes. 2:2)

  • Bala Ditiro 5:17-42.

    Nakong e fetilego le gona bjale, batho ba bangwe bao e sego Dihlatse ba bontšhitše bjang gore ba thekga modiro wa go bolela ditaba tše dibotse? (Dit. 5:34-39)

Ithute ka mo go oketšegilego

Karata ya Beibele ya Petro

Ithute ka mo go oketšegilego ka moapostola yo a botegago.