Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 105: Ba Letile Jerusalema

Kgaolo 105: Ba Letile Jerusalema

BATHO bao ba lego mo ke balatedi ba Jesu. Ba dirile seo a ba boditšego sona gomme ba leta Jerusalema. Eitše ge ba sa letile mo, lešata le legolo la tlala ntlo ka moka. Lešata leo le be le kwagala bjalo ka ledimo le matla. Ke moka dilo tšeo ekego ke maleme a mollo tša thoma go bonala hlogong ya yo mongwe le yo mongwe wa bona. Na o bona mollo wo o lego godimo ga yo mongwe le yo mongwe wa bona? Go be go direga’ng?

Moya o mokgethwa go barutiwa ba lekgolong la pele la nywaga

Wo e be e le mohlolo! Jesu o be a boetše legodimong go Tatagwe gomme a tšhollela moya o mokgethwa wa Modimo godimo ga balatedi ba gagwe. Na o a tseba gore moya woo o ile wa dira gore ba dire eng? O ile wa dira gore ba thome go bolela ka maleme a šele.

Batho ba bantši mo Jerusalema ba ile ba kwa lešata leo le legolo ke moka ba tla gore ba bone seo se diregago. Ba bangwe ba bona ba be ba etšwa ditšhabeng tše dingwe gomme ba tlile monyanyeng wa Baisiraele wo o bitšwago Pentekoste. Baeng ba ba ile ba makala kudu! Ba ile ba kwa barutiwa ba ba bolela ka maleme a gabo bona mabapi le dilo tše di kgahlišago tšeo Modimo a di dirilego.

Baeng bao ba ile ba re: ‘Batho ba ka moka ke Bagalilea. Bjale go tla bjang gore ba kgone go bolela maleme ka moka a dinageng tšeo re tšwago go tšona?’

Ka gona Petro a emelela gore a ba hlalosetše lebaka la seo. A hlaboša lentšu gomme a ba botša kamoo Jesu a bolailwego ka gona le gore Jehofa o mo tsošitše bahung. A re: ‘Gona bjale Jesu o dutše ka letsogong le letona la Modimo legodimong. Ke yena yo a re tšholletšego moya o mokgethwa wo o holofeditšwego. Ke ka baka leo le bonago mehlolo ye le go ekwa.’

Eitše ge Petro a boletše dilo tše, batho ba bantši ba itshola kudu ka baka la seo se dirilwego Jesu. Ba botšiša ba re: ‘Re swanetše go dira’ng?’ Petro a re go bona: ‘Le swanetše go fetoša maphelo a lena gomme le kolobetšwe.’ Ka go re’alo, lona letšatšing leo batho ba e ka bago ba 3 000 ba kolobetšwa ke moka ya ba balatedi ba Jesu.

Ditiro 2:1-47.



Dipotšišo

  • Bjalo ka ge seswantšho se se bontšha, balatedi ba Jesu bao ba bego ba letile Jerusalema ba ile ba diragalelwa ke eng?
  • Ke mohlolo ofe woo batho bao ba bego ba etetše Jerusalema ba ilego ba o bona?
  • Ke’ng seo Petro a ilego a se hlalosetša batho bao?
  • Batho ba ile ba ikwa bjang ka morago ga gore ba theetše Petro, gomme o ile a ba botša gore ba dire’ng?
  • Ke batho ba bakae bao ba ilego ba kolobetšwa ka lona letšatši leo la Pentekoste ya 33 C.E.?

Dipotšišo tša tlaleletšo

  • Bala Ditiro 2:1-47.

    Mantšu a Petro ao a lego go Ditiro 2:23, 36 a bontšha bjang gore setšhaba ka moka sa Bajuda se be se ikarabela ka lehu la Jesu? (1 Bathes. 2:14, 15)

    Petro o beile bjang mohlala o mobotse wa go nea mabaka ka Mangwalo? (Dit. 2:16, 17, 29, 31, 36, 39; Bakol. 4:6)

    Petro o ile a diriša bjang senotlelo sa pele sa “dinotlelo tša Mmušo wa magodimo” tšeo Jesu a bego a holofeditše go mo nea tšona? (Dit. 2:14, 22-24, 37, 38; Mat. 16:19)

Ithute ka mo go oketšegilego

Batho ba Makgolo ba Mmona Pele ga Pentekoste

Lebakeng la ka morago ga ge Jesu a tsošitšwe bahung le pele ga ge a ka rotogela legodimong, o gatelela leboelela go barutiwa ba gagwe selo seo ba tlago go se amogela le kamoo ba swanetšego go se diriša ka gona.