Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 104: Jesu o Boela Legodimong

Kgaolo 104: Jesu o Boela Legodimong

GE MATŠATŠI a dutše a feta, Jesu o ile a iponagatša go balatedi ba gagwe ka makga a mantši. Lekgeng le lengwe, o ile a bonwa ke barutiwa ba gagwe ba e ka bago ba 500. Na o a tseba gore ge a be a iponagatša go bona o ile a bolela le bona ka eng? O ile a bolela le bona ka mmušo wa Modimo. Jehofa o be a mo rometše mo lefaseng go tlo ruta batho ka Mmušo woo. Le gona o ile a tšwela pele a dira seo le ka morago ga ge a tsošitšwe bahung.

Jesu o boela legodimong

Na o sa gopola gore mmušo wa Modimo ke eng? Ee, Mmušo ke pušo ya kgonthe ya Modimo ya legodimong gomme Jesu ke Yena yo Modimo a mo kgethilego gore e be kgoši ya wona. Go etša ge re šetše re ithutile, Jesu o bontšhitše gore e tla ba kgoši ya go loka ka ge a ile a fepa batho bao ba bego ba swerwe ke tlala, a fodiša balwetši gaešita le go tsoša bahu.

Ge Jesu a tla be a buša e le kgoši legodimong ka nywaga e sekete, mo lefaseng go tla ba bjang? Ee, lefase ka moka le tla dirwa paradeise e botse. Go ka se sa ba le dintwa, bosenyi, bolwetši gaešita le lehu. Re a tseba gore se se tla direga ka gobane Modimo o be a dirile gore lefase e be paradeise yeo batho ba bego ba tla thabela go dula go yona. Ke ka baka leo mathomong a ilego a dira serapa sa Edene. Ka gona Jesu o tla kgonthišetša gore seo Modimo a nyakago se direga, se a phethagala mafelelong.

Ga bjale go be go fihlile nako ya gore Jesu a boele legodimong. Jesu o be a dutše a iponagatša go barutiwa ba gagwe ka matšatši a 40. Ka gona ba be ba kgodišegile gore o tsogile bahung. Eupša pele ga ge a ka ba tlogela, o ile a re go bona: ‘Le dule Jerusalema go fihlela le amogela moya o mokgethwa.’ Moya o mokgethwa ke matla a Modimo a šomago, ao a swanago le phefo e fokago, ao a bego a tla thuša balatedi ba gagwe go dira thato ya Modimo. Mafelelong Jesu o ile a re go bona: ‘Le bolele ka nna go fihla dikarolong tša kgole tša lefase.’

Ka morago ga ge Jesu a boletše se, go ile gwa direga mohlolo. O ile a thoma go rotogela legodimong, bjalo ka ge o mmona mo. Ke moka leru la mo khupetša gomme barutiwa ba gagwe ba se hlwe ba mmona. A tsena legodimong gomme a thoma go buša balatedi ba gagwe ba mo lefaseng a le gona moo.

Barutiwa ba lebeletše godimo

1 Bakorinthe 15:3-8; Kutollo 21:3, 4; Ditiro 1:1-11.



Dipotšišo

  • Lekgeng le lengwe, ke barutiwa ba bakae bao ba ilego ba bona Jesu, gomme o ile a bolela le bona ka eng?
  • Mmušo wa Modimo ke eng, gona bophelo bo tla ba bjang mo lefaseng ge Jesu a tla be a buša e le Kgoši ka nywaga e sekete?
  • Jesu o be a dutše a iponagatša go barutiwa ba gagwe ka matšatši a makae, eupša ga bjale go be go fihlile nako ya gore a dire eng?
  • Pele ga ge Jesu a ka tlogela barutiwa ba gagwe, ke eng seo a ilego a ba botša gore ba se dire?
  • Go direga’ng mo seswantšhong, gona go ile gwa direga’ng gore Jesu a se hlwe a bonagala?

Dipotšišo tša tlaleletšo

  • Bala 1 Bakorinthe 15:3-8.

    Ke ka baka la’ng moapostola Paulo a be a ka bolela ka kgodišego mabapi le tsogo ya Jesu, gomme ke dilo dife tšeo Bakriste lehono ba ka bolelago ka tšona ka kgodišego? (1 Bakor. 15:4, 7, 8; Jes. 2:2, 3; Mat. 24:14; 2 Tim. 3:1-5)

  • Bala Ditiro 1:1-11.

    Bjalo ka ge go boletšwe e sa le pele go Ditiro 1:8, modiro wa go bolela ditaba tše dibotse o ile wa phatlalala go fihla kae? (Dit. 6:7; 9:31; 11:19-21; Bakol. 1:23)

Ithute ka mo go oketšegilego

Kriste a le ka Letsogong le Letona la Modimo

Jesu o tla dira’ng ge a sa letile nako ya go tšea kgato kgahlanong le manaba a gagwe?