Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 98: Thabeng ya Mehlware

Kgaolo 98: Thabeng ya Mehlware

JESU mo o Thabeng ya Mehlware. Banna ba bane bao ba nago le yena ke baapostola ba gagwe. Ke Andrea le Petro ngwanabo, gotee le Jakobo le Johane ngwanabo. Moago wo o o bonago mo ke tempele ya Modimo yeo e lego Jerusalema.

Go be go fetile matšatši a mabedi go tloga ge Jesu a tsene Jerusalema a nametše pokolwana. E be e le Labobedi. Mesong ya letšatši leo, Jesu o be a le tempeleng. Ge a le moo, baperisita ba ile ba leka go mo swara gore ba mmolaye. Eupša ba be ba boifa go dira se ka gobane batho ba be ba rata Jesu.

Jesu le baapostola ba gagwe

Jesu o ile a bitša baetapele bao ba bodumedi gore ke ‘dinoga le bana ba dinoga!’ Ke moka a re Modimo o tla ba otla ka baka la dilo tše mpe ka moka tšeo ba di dirilego. Ka morago ga moo, Jesu a tla Thabeng ya Mehlware gomme baapostola ba ba bane ba thoma go mmotšiša dipotšišo. Na o a tseba gore ba ile ba mmotšiša eng?

Ba ile ba mmotšiša ka dilo tša nakong e tlago. Ba be ba tseba gore Jesu o tla fediša bobe ka moka mo lefaseng. Eupša ba be ba nyaka go tseba nako yeo se se bego se tla direga ka yona. Le gona ba be ba nyaka go tseba gore Jesu o be a tla boa neng gore a tle a buše e le Kgoši.

Jesu o be a tseba gore balatedi ba gagwe ba mo lefaseng ba be ba ka se kgone go mmona ge a boa. Lebaka ke gore o tla be a le legodimong gomme ba ka se kgone go mmona ge a le moo. Ka gona Jesu o ile a botša baapostola ba gagwe tše dingwe tša dilo tšeo di tlago go direga mo lefaseng ge a tla be a buša e le Kgoši legodimong. Tše dingwe tša dilo tšeo ke dife?

Jesu o itše go tla ba le dintwa tše dikgolo, batho ba bantši ba tla babja le go bolawa ke tlala, bosenyi e tla ba bjo bo šiišago e bile go tla ba le ditšhišinyego tše dikgolo tša lefase. Le gona o boletše gore ditaba tše dibotse tša mmušo wa Modimo di tla bolelwa lefaseng ka moka. Na re bona dilo tše di direga mehleng ya rena? Ee! Ka gona re ka kgodišega gore gona bjale Jesu o buša e le Kgoši legodimong. Kgauswinyane o tla fediša bobe ka moka mo lefaseng.

Mateo 21:46; 23:1-39; 24:1-14; Mareka 13:3-10.



Dipotšišo

  • Jesu ke ofe mo seswantšhong, gona o na le bomang?
  • Ke’ng seo baperisita ba ilego ba leka go se dira Jesu ka tempeleng, gomme o ile a re’ng go bona?
  • Ke’ng seo baapostola ba ilego ba se botšiša Jesu?
  • Ke ka baka la’ng Jesu a ile a botša baapostola ba gagwe tše dingwe tša dilo tšeo di bego di tla direga mo lefaseng ge a tla be a buša e le Kgoši legodimong?
  • Jesu o ile a re go tlo direga’ng pele ga ge a ka fediša bobe ka moka mo lefaseng?

Dipotšišo tša tlaleletšo

  • Bala Mateo 23:1-39.

    Gaešita le ge Mangwalo a bontšha gore e ka ba mo go swanetšego go bitša batho ka direto tše di tlwaelegilego, mantšu a Jesu ao a lego go Mateo 23:8-11 a bontšha’ng mabapi le go diriša direto tša go tumiša batho ka phuthegong ya Bokriste? (Dit. 26:25; Baroma 13:7; 1 Pet. 2:13, 14)

    Bafarisei ba be dira’ng go leka go thibela batho go ba Bakriste, gona baetapele ba bodumedi ba dirišitše bjang mekgwa e swanago mehleng yeno? (Mat. 23:13; Luka 11:52; Joh. 9:22; 12:42; 1 Bathes. 2:16)

  • Bala Mateo 24:1-14.

    Mateo 24:13 e gatelela bjang bohlokwa bja kgotlelelo?

    Lentšu leo le rego “bofelong” go Mateo 24:13 le ra gore’ng? (Mat. 16:27; Baroma 14:10-12; 2 Bakor. 5:10)

  • Bala Mareka 13:3-10.

    Ke polelwana efe go Mareka 13:10 yeo e bontšhago gore re swanetše go bolela ditaba tše dibotse ka go akgofa, gomme mantšu a Jesu a swanetše go re kgoma bjang? (Baroma 13:11, 12; 1 Bakor. 7:29-31; 2 Tim. 4:2)

Ithute ka mo go oketšegilego

Baapostola ba Kgopela Pontšho

Boporofeta bja gagwe bo phethagetše la mathomo lekgolong la pele la nywaga. Na bo be bo tla phethagala gape ka morago ka tekanyo e kgolwanyana?

Na Bofelo bo Kgauswi?

Ela hloko dibopego tše nne tša pontšho yeo e nago le dikarolo tše mmalwa ya bofelo yeo e hlaloswago ka Beibeleng yeo e neago karabo.