Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 95: Tsela ya Jesu ya go Ruta

Kgaolo 95: Tsela ya Jesu ya go Ruta

KA LETŠATŠI le lengwe, Jesu o ile a botša monna yo mongwe gore o swanetše go rata moagišani wa gagwe. Monna yoo o ile a botšiša Jesu a re: ‘Moagišani wa ka ke mang?’ Eupša Jesu o be a tseba seo monna yo a bego a se nagana. Monna yo o be a nagana gore baagišani ba gagwe ke feela batho ba morafo wa gabo le bao ba lego bodumeding bjo tee le yena. Bjale anke re bone seo Jesu a ilego a mmotša sona.

Ka dinako tše dingwe, Jesu o be a ruta ka go anega dikanegelo. Ga bjale se ke seo a ilego a se dira. O ile a anega ka Mojuda le Mosamaria. Re šetše re ithutile gore Bajuda ba bantši ba be ba sa rate Basamaria. Kanegelo ya Jesu še:

Go be go na le Mojuda yo mongwe yoo ka letšatši le lengwe a ilego a fologa ka tsela ya thabeng a eya Jeriko. Eupša a gahlana le mahodu. A mo amoga tšhelete ya gagwe gomme a mo itia a mo tlogela a le kgauswi le go hwa.

Ka moragonyana moperisita yo mongwe wa Mojuda a tla ka yona tsela yeo. A bona monna yo yoo a iteilwego. O nagana gore o ile a dira’ng? O ile a fo arogela ka thoko e nngwe ya tsela ke moka a iphetela. Ka morago gwa tla motho yo mongwe yo e bego e le modumedi. E be e le Molefi. Na o ile a ema? Aowa, le yena ga se a ka a ema gore a thuše monna yo yoo a iteilwego. O ka bona moperisita le Molefi mo seswantšhong ba theoga ka tsela.

Eupša bona gore ke mang yo a nago le monna yo yoo a iteilwego. Ke Mosamaria. O thuša Mojuda. O mo tšhela ka dihlare dinthong tša gagwe. Ka morago o ile a mo iša lefelong leo a bego a ka robala go lona gomme a fola.

Mosamaria wa moagišani

Ge Jesu a feditše kanegelo ya gagwe, o ile a re go monna yo a bego a mmotšišitše potšišo: ‘Ke mang wa ba bararo ba yo o naganago gore o itirile moagišani go monna yo yoo a iteilwego? Na ke moperisita, Molefi goba Mosamaria?’

Monna yoo a re: ‘Ke Mosamaria. Ka gobane o bontšhitše monna yo yoo a iteilwego kwelobohloko.’

Jesu a re go yena: ‘O nepile. Bjale le wena sepela o yo swara ba bangwe go swana le Mosamaria yo.’

Na ga o rate tsela yeo Jesu a bego a ruta ka yona? Re ka ithuta dilo tše dintši kudu tše bohlokwa ge e ba re theetša seo Jesu a se bolelago ka Beibeleng, na ga go bjalo?

Luka 10:25-37.



Dipotšišo

  • Ke potšišo efe yeo monna yo mongwe a ilego a e botšiša Jesu, gona ka baka la’ng?
  • Jesu ka dinako tše dingwe o be a diriša’ng ge a ruta, gona ke eng seo re šetšego re ithutile sona ka Bajuda le Basamaria?
  • Kanegelong ya Jesu, Mojuda yo a bego a le tseleng e yago Jeriko o ile a diragalelwa ke eng?
  • Go ile gwa direga’ng ge moperisita wa Mojuda le Molefi ba be ba sepela tseleng yona yeo?
  • Mo seswantšhong, ke mang yo a thušago Mojuda yo a gobetšego?
  • Ge Jesu a feditše kanegelo ya gagwe, ke potšišo efe yeo a ilego a e botšiša monna yo a bego a mmotšišitše potšišo, gona monna yoo o ile a araba bjang?

Dipotšišo tša tlaleletšo

  • Bala Luka 10:25-37.

    Go e na le gore Jesu a nee monna yoo a bego a tseba Molao karabo e lebanyago, o ile a mo thuša bjang gore yena ka boyena a naganišiše ka taba? (Luka 10:26; Mat. 16:13-16)

    Jesu o ile a diriša bjang dipapišo go fediša kgethollo yeo batheetši ba gagwe ba ka bago ba be ba na le yona? (Luka 10:36, 37; 18:9-14; Tito 1:9)

Ithute ka mo go Oketšegilego

JESU—TSELA, THEREŠO LE BOPHELO

Mosamaria o Ipontšha e le Moagišani wa Kgonthe

Jesu o diriša bjang seswantšho sa Mosamaria wa kgaugelo, goba “Mosamaria wa go loka” go ruta thuto e matla?

JESU—TSELA, THEREŠO LE BOPHELO

Morwa yo a Bego a Timetše o a Boa

Re ka ithuta dithuto dife seswantšhong sa Jesu sa mabapi le morwa wa lehlaswa?