Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 91: Jesu o Ruta Thabeng

Kgaolo 91: Jesu o Ruta Thabeng

BONA Jesu mo o dutše fase. O be a ruta batho ba ka moka thabeng yeo e lego Galilea. Batho ba ba dutšego kgauswiuswi le yena ke barutiwa ba gagwe. O be a kgethile ba 12 ba bona gore e be baapostola. Baapostola e be e le barutiwa ba Jesu ba kgethegilego. Na o tseba maina a bona?

Jesu o a ruta

E be e le Simone Petro le Andrea ngwanabo. Ba bangwe e be e le Jakobo le Johane bao le bona e bego e le bana ba motho. Moapostola yo mongwe le yena o be a bitšwa Jakobo gomme yo mongwe gape le yena a bitšwa Simone. Baapostola ba bangwe ba babedi ba be ba na le leina la go swana la Judase. Yo mongwe e be e le Judase Isikariote gomme yo mongwe e le Judase yo a bego a bile a bitšwa Thadeo. Ke moka go be go na le Filipi le Nathaniele (yo a bego a bile a bitšwa Baratholomeo), gotee le Mateo le Thomase.

Ge Jesu a boile Samaria, o ile a thoma go ruta ka lekga la pele gore: Mmušo wa magodimo o batametše.” Na o a tseba gore mmušo woo ke eng? Ke mmušo wa kgonthe wa Modimo. Jesu ke kgoši ya wona. O tla buša a le legodimong gomme a tliše khutšo mo lefaseng. Mmušo wa Modimo o tla dira gore lefase ka moka e be paradeise e botse.

Jesu mo o be a ruta batho ka mmušo woo. O itše: ‘Le swanetše go rapela ka tsela ye: “Tatago rena wa magodimong, leina la gago a le retwe. Mmušo wa gago a o tle. Thato ya gago a e direge mo lefaseng go etša ge e direga legodimong.”’ Batho ba bantši ba bitša thapelo ye gore ke ‘Thapelo ya Morena.’ Ba bangwe ba e bitša ‘Tata Wešo.’ Na o ka bolela thapelo ye ka moka?

Le gona Jesu o be a ruta batho ba kamoo ba bego ba swanetše go swarana ka gona. O itše: ‘Dirang ba bangwe seo le nyakago ba le dira sona.’ Na ga o rate ge batho ba bangwe ba go swara gabotse? Ka gona, Jesu o re re swanetše go swara batho ba bangwe gabotse. Na e ka se be mo go kgahlišago lefaseng la paradeise ge batho ka moka ba tla be ba dira se?

Mateo dikgaolo 5 go ya go 7; 10:1-4.



Dipotšišo

  • Jesu o ruta a le kae mo seswantšhong, gomme ke bomang bao ba dutšego kgauswiuswi le yena?
  • Maina a baapostola ba 12 ke afe?
  • Mmušo woo Jesu a bego a ruta ka wona ke eng?
  • Ke’ng seo Jesu a ilego a ruta batho gore ba se rapelele?
  • Jesu o itše’ng mabapi le kamoo batho ba swanetšego go swarana ka gona?

Dipotšišo tša tlaleletšo

  • Bala Mateo 5:1-12.

    Re ka bontšha ka ditsela dife gore re lemoga go nyaka ga rena dilo tša moya? (Mat. 5:3; Baroma 10:13-15; 1 Tim. 4:13, 15, 16)

  • Bala Mateo 5:21-26.

    Mateo 5:23, 24 e gatelela bjang gore tswalano ya rena le bana babo rena e kgoma tswalano ya rena le Jehofa? (Mat. 6:14, 15; Ps. 133:1; Bakol. 3:13; 1 Joh. 4:20)

  • Bala Mateo 6:1-8.

    Ke mekgwa efe e mengwe ya go itira baloki yeo Bakriste ba swanetšego go e phema? (Luka 18:11, 12; 1 Bakor. 4:6, 7; 2 Bakor. 9:7)

  • Bala Mateo 6:25-34.

    Jesu o rutile eng mabapi le go nyakega ga gore re kgodišege gore Jehofa o tla re hlokomela? (Ek. 16:4; Ps. 37:25; Bafil. 4:6)

  • Bala Mateo 7:1-11.

    Papišo e kwagalago gabotse yeo e lego go Mateo 7:5 e re ruta eng? (Die. 26:12; Baroma 2:1; 14:10; Jak. 4:11, 12)

Ithute ka mo go oketšegilego

Thuto e Tumilego ya Thabeng

Hwetša tlhaloso ya dintlha tša motheo thutong ya Jesu.

Bophelo bjo bo Nago le Morero—Jesu o Bontšha Tsela

Diphihlelo tšeo di diregilego e le ka kgonthe di bontšha kamoo go diriša mantšu a Jesu a tšwago Thutong ya Thabeng go ka thušago go ba le bophelo bjo bo nago le morero.