Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 87: Jesu ka Tempeleng

Kgaolo 87: Jesu ka Tempeleng

BONA mošemane yo a bolelago le bakgalabje ba. Ke barutiši ka tempeleng ya Modimo Jerusalema. Mošemane yo ke Jesu. O tloga a godile. Ga bjale o na le nywaga e 12.

Barutiši ba ba makaditšwe ke gore Jesu o tseba ditaba tše dintši kudu ka Modimo le dilo tšeo di ngwadilwego ka Beibeleng. Eupša ke ka baka la’ng Josefa le Maria ba se gona mo? Ba kae? Anke re bone.

Jesu o bolela le barutiši

Ngwaga o mongwe le o mongwe, Josefa o be a etla le lapa la gagwe Jerusalema monyanyeng o kgethegilego wo o bitšwago Paseka. E be e le leeto le letelele go tloga Natsaretha go ya Jerusalema. Go be go se na motho yo a bego a na le koloi e bile le diterene di be di se gona. Batho ba be ba se na tšona mehleng yeo. Batho ba bantši ba be ba sepela ka maoto gomme go be go ba tšea matšatši a e ka bago a mararo gore ba fihle Jerusalema.

Mo nakong ye, Josefa o be a na le lapa le legolo. Ka baka leo, go be go na le bana babo Jesu ba banyenyane bao ba bego ba swanetše go hlokomelwa. Ngwageng wo, Josefa le Maria ba ile ba tloga Jerusalema le bana ba bona gomme ba tšea leeto le letelele la go boela gae Natsaretha. Bona ba be ba nagana gore Jesu o sehlopheng sa batho bao ba sepelago le bona. Eupša ge ba khutša tseleng, ba hwetša a se gona. Ba mo nyaka gare ga metswalo ya bona le bagwera, eupša ba se mo hwetše! Ka gona ba boela Jerusalema ba yo mo nyaka moo.

Mafelelong ba mo hwetša mo a na le barutiši ba. O be a ba theeditše e bile a ba botšiša dipotšišo. Batho ka moka ba be ba makaditšwe ke kamoo Jesu a lego bohlale ka gona. Eupša Maria a re go yena: “Ngwanaka, ke ka baka la’ng o re dirile ka tsela ye? Nna le tatago re be re go nyaka re tshwenyegile kudu.”

Jesu a re go bona: “Ke ka baka la’ng le be le nnyaka? Na le be le sa tsebe gore ke swanetše go ba ntlong ya Tate?”

Ee, Jesu o be a rata go ba moo a ka ithutago ka Modimo. Na ye ga se tsela yeo le rena re swanetšego go ikwa ka yona? Ge Jesu a be a le ga gabo kua Natsaretha, o be a eya dibokeng beke e nngwe le e nngwe. Ka ge ka mehla a be a theetša ka kelohloko, o ile a ithuta dilo tše dintši ka Beibeleng. Anke le rena re swane le Jesu gomme re latele mohlala wa gagwe.

Luka 2:41-52; Mateo 13:53-56.



Dipotšišo

  • Jesu o bonagala a na le nywaga e mekae mo seswantšhong, gomme mo a lego gona ke kae?
  • Josefa o be a dira’ng le lapa la gagwe ngwaga o mongwe le o mongwe?
  • Ka morago ga go fetša letšatši ba le leetong la go boela gae, ke ka baka la’ng Josefa le Maria ba ile ba boela Jerusalema?
  • Josefa le Maria ba ile ba hwetša Jesu kae, gomme ke ka baka la’ng batho moo ba be ba maketše?
  • Jesu o ile a re’ng go Maria mmagwe?
  • Re ka ekiša Jesu bjang tabeng ya go ithuta ka Modimo?

Dipotšišo tša tlaleletšo

  • Bala Luka 2:41-52.

    Gaešita le ge Molao o be o nyaka gore e be banna feela bao ba bago gona menyanyeng ya ngwaga le ngwaga, ke mohlala ofe o mobotse wo Josefa le Maria ba o beetšego batswadi lehono? (Luka 2:41; Doit. 16:16; 31:12; Die. 22:6)

    Jesu o beetše bjang bafsa lehono mohlala o mobotse wa gore ba ikokobeletše batswadi ba bona? (Luka 2:51; Doit. 5:16; Die. 23:22; Bakol. 3:20)

  • Bala Mateo 13:53-56.

    Bana babo Jesu ba bane bao go bolelwago ka bona ka Beibeleng ke bomang, gona ka morago ba babedi ba bona ba ile ba dirišwa bjang ka phuthegong ya Bokriste? (Mat. 13:55; Dit. 12:17; 15:6, 13; 21:18; Bagal. 1:19; Jak. 1:1; Juda 1)

Ithute ka mo go oketšegilego

JESU—TSELA, THEREŠO LE BOPHELO

Lapa Labo Jesu le ya Jerusalema

Josefa le Maria ba a tshwenyega ge ba sa hwetše Jesu, mola yena a makatšwa ke gore ga se ba tseba di tloga fase gore ba mo nyakele kae.