Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 86: Banna Bao ba Hlahlwago ke Naledi

Kgaolo 86: Banna Bao ba Hlahlwago ke Naledi
Balepi ba dinaledi

NA O bona naledi e tagilego yeo yo mongwe wa banna ba ba lego mo a e šupago? Naledi ye e ile ya thoma go tšwelela ge ba be ba tloga Jerusalema. Banna ba ba tšwa ka Bohlabela gomme ke baithuti ba dinaledi. Ba dumela gore naledi ye yeo e sa tšwago go tšwelela e ba iša go motho yo a itšego wa bohlokwa.

Ge banna ba ba fihla Jerusalema, ba ile ba botšiša ba re: ‘O kae ngwana yo e tlago go ba kgoši ya Bajuda?’ “Bajuda” ke leina le lengwe la Baisiraele. Banna ba ba re: ‘Re bone naledi ya ngwana yoo ge re be re le ka Bohlabela gomme re tlile go mo khunamela.’

Ge Heroda, yo e bego e le kgoši ya Jerusalema a ekwa se, a befelwa. O be a sa nyake gore kgoši e nngwe e mo tšeele legato. Ka gona o ile a bitša baperisita ba bagolo gomme a ba botšiša a re: ‘Kgoši e holofeditšwego e tlo belegelwa kae?’ Ba araba ba re: ‘Beibele e re kua Betlelehema.’

Ka gona Heroda a bitša banna ba ka Bohlabela gomme a re go bona: ‘Eyang le nyake ngwana yoo. Ge le mo hweditše le tle le ntsebiše. Le nna ke nyaka go yo mo khunamela.’ Eupša ge e le gabotse, Heroda o be a nyaka go hwetša ngwana yoo gore a tle a mmolaye!

Ke moka naledi ye ya eta banna ba pele ya ba iša Betlelehema gomme ya fihla ya ema moo ngwana yoo a bego a le gona. Ge ba tsena ka ntlong, ba hwetša Maria le Jesu yo monyenyane. Ba ntšha dimpho ba di nea Jesu. Eupša ka morago Jehofa a ba lemoša torong gore ba se ke ba boela go Heroda. Ka gona ba boela nageng ya gabo bona ka tsela e nngwe.

Ge Heroda a ekwa gore banna ba ba boetše ga gabo bona, a galefa kudu. A laela gore bašemane ka moka ba Betlelehema bao ba nago le nywaga e mebedi le ya ka tlase ba bolawe. Eupša Jehofa a lemoša Josefa e sa le pele torong ka taba yeo, ke moka Josefa a tloga le lapa la gagwe ba ya Egipita. Ka morago ge Josefa a ekwa gore Heroda o hwile, a tšea Maria le Jesu ba boela Natsaretha. Mo ke moo Jesu a ilego a golela gona.

O nagana gore ke mang yo a bego a dirile gore naledi ye e tagilego e tšwelele? Gopola gore banna ba ba ka Bohlabela ba thomile ka go ya Jerusalema ka morago ga gore ba bone naledi ye. Sathane Diabolo o be a nyaka go bolaya Morwa wa Modimo, le gona o be a tseba gore Kgoši Heroda wa Jerusalema o tla leka go mmolaya. Ka gona Sathane ke yena a swanetšego go ba a ile a dira gore naledi ye e tšwelele.

Mateo 2:1-23; Mika 5:2.



Dipotšišo

  • Banna ba ba lego mo seswantšhong ke bomang, gomme ke ka baka la’ng yo mongwe wa bona a šupile naledi e tagilego?
  • Ke ka baka la’ng Kgoši Heroda a ile a befelwa, gona o ile a dira’ng?
  • Naledi ye e tagilego e ile ya iša banna ba kae, eupša ke ka baka la’ng ba ile ba boela nageng ya gabo bona ka tsela e nngwe?
  • Ke taelo efe yeo Heroda a ilego a e ntšha, gona ka baka la’ng?
  • Jehofa o ile a botša Josefa gore a dire’ng?
  • Ke mang yo a bego a dirile gore naledi ye e tagilego e tšwelele, gomme ka baka la’ng?

Potšišo ya tlaleletšo

  • Bala Mateo 2:1-23.

    Jesu o be a na le nywaga e mekae ge balepi ba dinaledi ba be ba mo etela, gona o be a dula kae? (Mat. 2:1, 11, 16)

Ithute ka mo go oketšegilego

Balepi ba Dinaledi ba Etela Jesu

Ke ka baka la’ng naledi yeo ba e bonego mathomong ka Bohlabela e ba lebišitše go Kgoši Heroda wa mmolai, e sego go Jesu?