Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 84: Morongwa o Etela Maria

Kgaolo 84: Morongwa o Etela Maria

MOSADI yo yo mobotse ke Maria. E be e le Moisiraele yo a bego a dula motseng wa Natsaretha. Modimo o be a tseba gore ke motho yo a itshwerego gabotse kudu. Ke ka baka leo a ilego a romela morongwa wa gagwe Gabariele gore a tlo bolela le yena. Na o a tseba gore Gabariele o be a tlo mmotša eng? Anke re bone.

Gabariele o ile a re go Maria: “Dumela, wena yo a ratilwego kudu. Jehofa o na le wena.” Maria o be a se a ka a bona motho yo. O ile a tshwenyega ka gobane o be a sa tsebe gore motho yo o be a e ra go reng. Eupša gateetee Gabariele a re a se ke a tšhoga.

Maria

A re go yena: ‘Se boife, Maria. Jehofa o go ratile kudu. Ke ka baka leo a tlago go go direla selo se se kgahlišago. Kgauswinyane o tla ba le ngwana. O mmitše Jesu.’

Gabariele a tšwela pele a re: ‘Ngwana yoo e tla ba yo mogolo gomme o tla bitšwa Morwa wa Yo Godimodimo. Jehofa o tla mo dira kgoši go swana le Dafida. Eupša Jesu e tla ba kgoši ka mo go sa felego gomme mmušo wa gagwe o ka se fele!’

Maria a botšiša a re: ‘Se se tla direga bjang? Le go nyalwa ga se ka nyalwa. Ga se ka ka ka dula le monna, ka gona nka ba le ngwana bjang?’

Gabariele a mo araba a re: ‘Matla a Modimo a tla tla go wena. Ka baka leo, ngwana yoo o tla bitšwa Morwa wa Modimo.’ Ke moka morongwa a re go yena: ‘Gopola motswalo wa gago Elisabetha. Batho ba be ba re o tšofetše kudu gore a ka ba le bana. Eupša kgauswinyane o tla ba le morwa. Bjale o ka bona gore ga go na selo seo se palelago Modimo.’

Gateetee Maria a re: ‘Ke nna lekgoba la Jehofa! Anke go ntiragalele go ya ka moo o boletšego.’ Ke moka morongwa yoo a tloga.

Maria a akgofa a etela Elisabetha. Ge Elisabetha a ekwa lentšu la Maria, ngwana yo a bego a le ka mpeng ya gagwe a tshela ka lethabo. Elisabetha a tlala moya wa Modimo gomme a re go Maria: “O šegofaditšwe gare ga basadi.” Maria o ile a dula le Elisabetha dikgwedi tše e ka bago tše tharo, ka morago ga moo a boela Natsaretha ga gabo.

Maria o be a le kgauswi le go nyalwa ke monna yo a bitšwago Josefa. Eupša ge Josefa a tsebile gore Maria o tlo ba le ngwana, a nagana gore a se sa mo nyala. Ke moka morongwa wa Modimo a re go yena: ‘O se ke wa tšhaba go nyala Maria. Ka gobane ke Modimo a mo neilego morwa.’ Ka gona Maria le Josefa ba ile ba nyalana gomme ba letela gore Jesu a belegwe.

Luka 1:26-56; Mateo 1:18-25.



Dipotšišo

  • Mosadi yo a lego mo seswantšhong ke mang?
  • Ke’ng seo Gabariele a ilego a se botša Maria?
  • Gabariele o ile a hlalosetša bjang Maria gore o tla ba le ngwana gaešita le ge a be a se a ka a dula le monna?
  • Go ile gwa direga’ng ge Maria a be a etetše Elisabetha motswalo wa gagwe?
  • Josefa o ile a nagana go dira’ng ge a tsebile gore Maria o tlo ba le ngwana, eupša ke ka baka la’ng a ile a fetoša monagano?

Dipotšišo tša tlaleletšo

  • Bala Luka 1:26-56.

    Luka 1:35 e re go be go tla direga’ng ka go se phethagale le ge e le gofe mo go bakilwego ke Adama ka popelong ya Maria ge bophelo bja Morwa wa Modimo bo be bo tla ba bo fetišeditšwe ka popelong ya Maria go tšwa lefelong la moya? (Hag. 2:11-13; Joh. 6:69; Baheb. 7:26; 10:5)

    Jesu o ile a newa bjang kgodišo gaešita le pele ga ge a ka belegwa? (Luka 1:41-43)

    Ke mohlala ofe o mobotse woo Maria a o beetšego Bakriste bao lehono ba amogelago ditokelo tše di kgethegilego tša tirelo? (Luka 1:38, 46-49; 17:10; Die. 11:2)

  • Bala Mateo 1:18-25.

    Gaešita le ge Jesu a se a ka a bitšwa ka leina la Imanuele, dilo tšeo a ilego a di dira ge a be a le mo lefaseng di ile tša phethagatša bjang seo se bolelwago ke leina leo? (Mat. 1:22, 23; Joh. 14:8-10; Baheb. 1:1-3)

Ithute ka mo go Oketšegilego

JESU—TSELA, THEREŠO LE BOPHELO

Melaetša e Mebedi e Tšwago go Modimo

Morongwa Gabariele o ile a rola melaetša e mebedi yeo go bego go le thata go e dumela.

DIKARATA TŠA BATHO BA KA BEIBELENG

Karata ya Beibele ya Maria

Ithute gore Maria o ile a iša Jesu kae ge a be a na le matšatši a 40. Phrintha, sega gomme o boloke karata ye ya Beibele.

EKIŠA TUMELO YA BONA

Maria—“Bona, Nna Lekgoba la Jehofa!”

Tsela yeo Maria a ilego a araba morongwa ka yona e re botša’ng ka tumelo ya gagwe? Ke dika dife tše dingwe tšeo a ilego a di bontšha?