Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 101: Jesu o a Bolawa

Kgaolo 101: Jesu o a Bolawa

BONA selo se bohloko seo se diregago mo! Jesu o a bolawa. Ba mo kokotetše koteng. Dipikiri di kokotetšwe diatleng tša gagwe le maotong a gagwe. Ke ka baka la’ng batho ba ile ba dira se go Jesu?

Jesu o a hwa

Ke ka gobane batho ba bangwe ba be ba mo hloile. Na o a tseba gore e be e le bomang? Yo mongwe wa bona e be e le Sathane Diabolo, morongwa yo mobe. Ke yena yo a ilego a dira gore Adama le Efa ba se ke ba kwa Jehofa. Le gona ke yena yo a ilego a dira gore manaba a Jesu a dire selo se se sešoro.

Gaešita le pele ga ge Jesu a ka kokotelwa mo koteng, manaba a gagwe a ile a mo dira dilo tše mpe. Na o sa gopola nakong ya ge manaba ao a be a etla serapeng sa Getsemane gomme a mo tšea a tloga le yena? Manaba ao e be e le bomang? Ee, e be e le baetapele ba bodumedi. Anke re bone seo se ilego sa direga ka morago.

Eitše ge baetapele bao ba bodumedi ba swara Jesu, baapostola ba gagwe ba tšhaba. Ba mo tlogela le manaba a gagwe ka gobane ba be ba boifa. Eupša moapostola Petro le moapostola Johane ba se tšhabele kgole kudu. Ba šala manaba ao morago gore ba tle ba bone seo se tlago go diragalela Jesu.

Baperisita ba ile ba iša Jesu go mokgalabje Annase, yo e kilego ya ba moperisita yo a phagamego. Lešaba la se ke la dula moo nako e telele. La mo iša ntlong ya Kayafa, yoo ka nako yeo e bego e le moperisita yo a phagamego. Baetapele ba bantši ba bodumedi ba be ba kgobokane moo ntlong yeo.

Ba ile ba sekišetša Jesu moo ntlong ya Kayafa. Gwa tlišwa batho ba bangwe gore ba tlo bolela maaka ka Jesu. Baetapele ka moka ba bodumedi ba re: ‘O swanetše go bolawa.’ Ke moka ba mo tshwela ka mare sefahlegong gomme ba mo itia ka difeisi.

Ge tše ka moka di direga, Petro o be a le ka ntle lapeng. Go be go tonya bošegong bjoo, ka go re’alo batho ba be ba goditše mollo. Ge ba dutše ba ikomoša mollong, ngwanenyana yo mongwe a lebelela Petro gomme a re: ‘Monna yo le yena o be a na le Jesu.’

Petro a araba a re: ‘Aowa, ke be ke se naye!’

Batho bao ba ile ba botša Petro ka makga a mararo gore o be a na le Jesu. Eupša nako le nako ge ba be ba re’alo Petro o be a gana. Ge a be a gana ka lekga la boraro, Jesu a retologa a mo lebelela. Petro a itshola kudu ka ge a boletše maaka a, a tloga gomme a ya a lla gabohloko.

Ge letšatši le hlaba mesong ya Labohlano, baperisita ba ile ba iša Jesu holong e kgolo ya Sanhedrine yeo ba bego ba bokana go yona. Ge ba le moo, ba boledišana ka seo ba tlago go mo dira sona. Ba mo iša go Pontio Pilato, mmuši wa selete sa Judea.

Baperisita bao ba fihla ba re go Pilato: ‘Monna yo ke yo mobe. O swanetše go bolawa.’ Ka morago ga ge Pilato a botšišitše Jesu dipotšišo, a re: ‘Ga ke bone phošo yeo a e dirilego.’ Ke moka a romela Jesu go Heroda Antipase. Heroda e be e le mmuši wa Galilea, eupša a dula Jerusalema. Le yena o ile a se bone Jesu molato, ka go re’alo a mmušetša go Pilato.

Pilato o be a nyaka go lokolla Jesu. Eupša manaba a Jesu a be a nyaka gore go lokollwe mogolegwa yo mongwe go e na le gore go lokollwe Jesu. Mogolegwa yoo e be e le Baraba wa lehodu. Ga bjale e be e le mo e ka bago gare ga mosegare ge Pilato a ntšhetša Jesu ka ntle bathong. A re go bona: “Bonang kgoši ya lena!” Eupša baperisita ba bagolo ba goeletša ba re: ‘Mo tloše! Mmolaye! Mmolaye!’ Ka gona Pilato a lokolla Baraba ke moka ba tšea Jesu gore a yo bolawa.

Thapameng ya letšatši leo la Labohlano, Jesu o ile a kokotelwa koteng. Ka mahlakoreng a gagwe ka bobedi go be go na le disenyi tše pedi tšeo le tšona di bego di bolaelwa koteng, eupša o ka se kgone go di bona mo seswantšhong. Pejana ga ge Jesu a ka hwa, sesenyi se sengwe se ile sa re go yena: “O nkgopole ge o tsena Mmušong wa gago.” Jesu a re go sona: ‘Ke go holofetša gore o tla ba le nna Paradeiseng.’

Na yeo ga se kholofetšo e kgahlišago? Na o a tseba gore ke paradeise efe yeo Jesu a bego a bolela ka yona? Paradeise yeo Modimo a ilego a e dira mathomong e be e le kae? Ee, e be e le mo lefaseng. Bjale ge Jesu a tla be a buša e le kgoši legodimong, o tla tsoša monna yoo bahung gore a tle a thabele go phela Paradeiseng e mpsha mo lefaseng. Na ga re thabišwe ke seo?

Mateo 26:57-75; 27:1-50; Luka 22:54-71; 23:1-49; Johane 18:12-40; 19:1-30.



Dipotšišo

  • Ge e le gabotse, ke mang yo a bego a ikarabela ka lehu la Jesu?
  • Baapostola ba ile ba dira’ng ge baetapele ba bodumedi ba be ba swara Jesu?
  • Go ile gwa direga’ng ntlong ya Kayafa moperisita yo a phagamego?
  • Ke ka baka la’ng Petro a ile a tloga gomme a yo lla gabohloko?
  • Ka morago ga ge Jesu a bušeditšwe go Pilato, baperisita ba bagolo ba ile ba goeletša ka gore’ng?
  • Jesu o ile a diragalelwa ke eng thapameng ya letšatši la Labohlano, gona ke eng seo a ilego a se holofetša se sengwe sa disenyi tšeo di bego di kokotetšwe koteng kgauswi le yena?
  • Paradeise yeo Jesu a boletšego ka yona e tla ba kae?

Dipotšišo tša tlaleletšo

  • Bala Mateo 26:57-75.

    Ditho tša kgorokgolo ya Bajuda di ile tša bontšha bjang gore di be di na le dipelo tše mpe? (Mat. 26:59, 67, 68)

  • Bala Mateo 27:1-50.

    Ke ka baka la’ng re ka re go itshola ga Judase go be go sa tšwe pelong? (Mat. 27:3, 4; Mar. 3:29; 14:21; 2 Bakor. 7:10, 11)

  • Bala Luka 22:54-71.

    Re ka ithuta’ng tabeng ya gore Petro o ile a latola Jesu bošegong bja go ekwa ga gagwe le go swarwa? (Luka 22:60-62; Mat. 26:31-35; 1 Bakor. 10:12)

  • Bala Luka 23:1-49.

    Jesu o ile a arabela bjang ge a be a swarwa ka go hloka toka, gona re ka ithuta’ng go se? (Luka 23:33, 34; Baroma 12:17-19; 1 Pet. 2:23)

  • Bala Johane 18:12-40.

    Ke’ng seo se bontšhwago ke taba ya gore le ge Petro a ile a ikgogela morago ka nakwana ka baka la go boifa batho, o ile a hwetša matla gape gomme ya ba moapostola yo mafolofolo? (Joh. 18:25-27; 1 Bakor. 4:2; 1 Pet. 3:14, 15; 5:8, 9)

  • Bala Johane 19:1-30.

    Jesu o be a na le pono efe e lekalekanego ka dilo tše di bonagalago? (Joh. 2:1, 2, 9, 10; 19:23, 24; Mat. 6:31, 32; 8:20)

    Ke ka tsela efe mantšu ao Jesu a a boletšego ge a be a ehwa e bilego tsebišo e matla ya gore o phagamišitše bogoši bja Jehofa? (Joh. 16:33; 19:30; 2 Pet. 3:14; 1 Joh. 5:4)

Ithute ka mo go oketšegilego

Jesu o Išwa go Annase, ka Morago a Išwa go Kayafa

Tsheko ya Jesu e tloga e bontšha go hloka toka.

O Sekišwa ke Sanhedrine, ke Moka o Išwa go Pilato

Baetapele ba bodumedi ba Bajuda ba bontšha maikemišetšo a bona a kgonthe.

Kgoši e se Nago Molato e Tlaišega Koteng

Jesu o dira kholofetšo e kgomago kudu go se sengwe sa disenyi seo se bolawago le yena.

Swara Johane 3:16 ka Hlogo

Ithute seo Johane 3:16 e se bolelago ke moka o se diriše nakong e tlago ge o eya bodireding.