Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 100: Jesu ka Serapeng

Kgaolo 100: Jesu ka Serapeng

KA MORAGO ga ge ba tlogile phaphošing ya ka godimo, Jesu le baapostola ba gagwe ba ile ba ya serapeng sa Getsemane. Ba be ba fela ba etla mo gantši. Bjale Jesu o ile a ba botša gore ba dule ba phakgame gomme ba rapele. Ke moka yena a fetela pejana a khunama a rapela.

Ka moragonyana ga moo, Jesu o ile a boela moo baapostola ba gagwe ba bego ba le gona. O nagana gore o ile a hwetša ba dira’ng? O ile a ba hwetša ba robetše! Jesu o ile a ba botša gararo gore ba dule ba phakgame, eupša nako le nako ge a boela go bona o be a ba hwetša ba robetše. Ge Jesu a boela go bona la mafelelo a re: ‘Le ka robala bjang ka nako e bjalo ka ye? Nako ya gore ke gafelwe manabeng a ka e fihlile.’

Ka yona nako yeo gwa kwala lešata la lešaba le legolo. Bona! Go be go etla banna bao ba swerego melamo le ditšhoša! Le gona ba be ba swere dirumola gore ba kgone go bona. Ge ba batamela, motho yo mongwe a tšwa lešabeng gomme a leba go Jesu. A fihla a mo atla go etša ge o ka bona mo seswantšhong. Monna yo a atlago Jesu ke Judase Isikariote! Ke ka baka la’ng a be a atla Jesu?

Judase o eka Jesu

Jesu o ile a mmotšiša a re: ‘Judase, na o nkeka ka go nkatla?’ Ee, go atla moo e be e le leswao. Go ile gwa dira gore banna bao ba bego ba na le Judase ba tsebe Jesu yo ba bego ba mo nyaka. Ka gona manaba a Jesu a batamela gore a mo sware. Eupša Petro o be a ka se a tlogele a tšea Jesu ka ntle le go mo lwela. A khwamola tšhoša ya gagwe yeo a bego a tlile le yona gomme a rema monna yo a bego a le kgauswi le yena. Tšhoša yeo ya feta kgauswi le hlogo ya monna yoo ya mo kgaola tsebe ya le letona. Eupša Jesu a kgwatha tsebe ya monna yoo gomme a e fodiša.

Jesu a re go Petro: ‘Bušetša tšhoša ya gago lefelong la yona. Na o nagana gore nka se kgone go kgopela Tate gore a nthomele barongwa ba bantši gore ba tle ba mphološe?’ Ee, Jesu o be a ka kgona go dira seo! Eupša Jesu ga se a ka a kgopela Modimo gore a mo romele barongwa, ka gobane o be a tseba gore nako ya gore manaba a gagwe a mo sware e be e fihlile. Ka gona Jesu a ba lesa ba tloga le yena. Anke re bone seo ga bjale se mo diragalelago.

Mateo 26:36-56; Luka 22:39-53; Johane 18:1-12.



Dipotšišo

  • Jesu le baapostola ba gagwe ba ile ba ya kae ka morago ga gore ba tloge ka phapošing ya ka godimo, gona o ile a ba botša gore ba dire’ng?
  • Jesu o ile a hwetša baapostola ba gagwe ba dira’ng ge a be a boela go bona, gomme se se ile sa direga ka makga a makae?
  • Go ya ka seswantšho se, ke bomang gape bao ba ilego ba tla mo serapeng, gomme Judase Isikariote o ile a dira’ng?
  • Ke ka baka la’ng Judase a ile a atla Jesu, gona Petro o ile a dira’ng?
  • Jesu o ile a re’ng go Petro, eupša ke ka baka la’ng Jesu a ile a se kgopele Modimo gore a mo romele barongwa?

Dipotšišo tša tlaleletšo

  • Bala Mateo 26:36-56.

    Tsela yeo Jesu a ilego a eletša barutiwa ba gagwe ka yona e beetše bagolo ba Bakriste lehono mohlala ofe o mobotse? (Mat. 20:25-28; 26:40, 41; Bagal. 5:17; Baef. 4:29, 31, 32)

    Jesu o ile a lebelela bjang taba ya ge motho a diriša sebetša go gobatša motho yo mongwe? (Mat. 26:52; Luka 6:27, 28; Joh. 18:36)

  • Bala Luka 22:39-53.

    Ge morongwa a be a iponagatša go Jesu kua serapeng sa Getsemane gore a mo matlafatše, na se se be se bontšha gore Jesu o be a fokola tumelong? Hlalosa. (Luka 22:41-43; Jes. 49:8; Mat. 4:10, 11; Baheb. 5:7)

  • Bala Johane 18:1-12.

    Jesu o ile a šireletša bjang barutiwa ba gagwe go manaba a gagwe, gomme re ka ithuta’ng mohlaleng wo? (Joh. 10:11, 12; 18:1, 6-9; Baheb. 13:6; Jak. 2:25)

Ithute ka mo go oketšegilego

JESU—TSELA, THEREŠO LE BOPHELO

O Rapela a le Bohlokong bjo Šoro

Ke ka baka la’ng Jesu a rapela ka gore: “Tloša senwelo se go nna”? Na o tšhaba go kgatha tema ya gagwe ya go ba topollo?

JESU—TSELA, THEREŠO LE BOPHELO

Kriste o a Ekwa le go Golegwa

Judase o hwetša Jesu gaešita le ge e le gare ga mpa ya bošego.