Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 99: Phapošing ya ka Godimo

Kgaolo 99: Phapošing ya ka Godimo

GA BJALE e be e le mantšiboa a Labone, ka morago ga ge go fetile matšatši a mabedi ba be ba le thabeng. Jesu le baapostola ba gagwe ba 12 ba tlile ka mo phapošing ye e kgolo ya ka godimo go tlo ja Paseka. Monna yo o mmonago mo seswantšhong a tloga ke Judase Isikariote. O yo botša baperisita kamoo ba ka swarago Jesu ka gona.

Selalelo sa Morena

Letšatši pele ga moo, Judase o ile a ya go baperisita bao gomme a ba botšiša a re: ‘Le tla nnea eng ge nka le thuša go swara Jesu?’ Bona ba re: ‘Re tla go nea ditsekana tše masometharo tša silifera.’ Ka gona Judase gona bjale o be a yo gahlana le baperisita bao e le gore a ba iše go Jesu. Na seo Judase a se dirago ga se se sebe?

Ga bjale ba be ba feditše go ja Paseka. Eupša mo nakong ye Jesu o thoma tiragalo e nngwe e kgethegilego. O ile a nea baapostola ba gagwe senkgwa gomme a re go bona: ‘Se jeng, ka gobane se se bolela mmele wa ka wo o tlago go newa ka baka la lena.’ Ka morago a ba nea le beine ka galase gomme a re go bona: ‘Enwang, ka gobane se se bolela madi a ka ao a tlago go tšhollelwa lena.’ Beibele e bitša tiragalo ye gore ke ‘selalelo sa Morena.’

Baisiraele ba be ba eja Paseka go ikgopotša nako ya ge morongwa wa Modimo a be a ‘feta’ dintlong tša bona kua Egipita gomme a bolaya bana ba maitšibulo dintlong tša Baegipita. Eupša mo nakong ye, Jesu o be a nyaka gore balatedi ba gagwe ba gopole yena le kamoo a ilego a neela bophelo bja gagwe bakeng sa bona. Ke ka baka leo a ilego a ba botša gore ba gopole tiragalo ye e kgethegilego ngwaga o mongwe le o mongwe.

Ka morago ga ge ba jele Selalelo sa Morena, Jesu o ile a botša baapostola ba gagwe gore ba be le sebete le gore ba tie tumelong. Ba ile ba phetha tiragalo ye ka go opelela Modimo dikopelo ke moka ba tloga. E be e šetše e le bošego kudu, mohlomongwe e šetše e le matlagosa. Anke re bone moo ba yago gona.

Mateo 26:14-30; Luka 22:1-39; Johane dikgaolo 13 go ya go 17; 1 Bakorinthe 11:20.



Dipotšišo

  • Go etša ge go bontšhitšwe mo seswantšhong, ke ka baka la’ng Jesu le baapostola ba gagwe ba 12 ba le ka phapošing e kgolo ya ka godimo?
  • Monna yo o mmonago mo a tloga ke mang, gona o yo dira’ng mo a yago?
  • Ke tiragalo efe e kgethegilego yeo Jesu a ilego a e thoma ka morago ga ge yena le baapostola ba gagwe ba feditše go ja Paseka?
  • Paseka e be e gopotša Baisiraele tiragalo efe, eupša tiragalo ye e kgethegilego e gopotša balatedi ba Jesu eng?
  • Ka morago ga Selalelo sa Morena, ke eng seo Jesu a ilego a se botša balatedi ba gagwe, gomme ba ile ba dira’ng ka morago ga moo?

Dipotšišo tša tlaleletšo

  • Bala Mateo 26:14-30.

    Mateo 26:15 e bontšha bjang gore Judase o ekile Jesu ka boomo?

    Madi a Jesu ao a tšholotšwego a phethile merero efe e mebedi? (Mat. 26:27, 28; Jer. 31:31-33; Baef. 1:7; Baheb. 9:19, 20)

  • Bala Luka 22:1-39.

    Ke ka kgopolo efe Sathane a ilego a tsena go Judase? (Luka 22:3; Joh. 13:2; Dit. 1:24, 25)

  • Bala Johane 13:1-20.

    Go ya ka pego yeo e lego go Johane 13:2, na Judase a ka bewa molato ka seo a se dirilego, gona ke thuto efe yeo bahlanka ba Modimo ba ka ithutago yona go se? (Gen. 4:7; 2 Bakor. 2:11; Bagal. 6:1; Jak. 1:13, 14)

    Ke mohlala ofe o matla woo Jesu a re beetšego wona? (Joh. 13:15; Mat. 23:11; 1 Pet. 2:21)

  • Bala Johane 17:1-26.

    Jesu o be a era gore’ng ge a be a rapelela gore balatedi ba gagwe e be “batee”? (Joh. 17:11, 21-23; Baroma 13:8; 14:19; Bakol. 3:14)

Ithute ka mo go oketšegilego

Selalelo sa Morena

Jesu o hloma segopotšo seo balatedi ba gagwe ba swanetšego go se swara ngwaga le ngwaga ka Nisani 14.