Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 96: Jesu o Fodiša Balwetši

Kgaolo 96: Jesu o Fodiša Balwetši

GE JESU a dutše a sepela le naga ka moka, o be a fodiša balwetši. Ditaba tša mabapi le mehlolo ye di be di bolelwa gohle metseng le metsaneng. Ka gona batho ba ile ba tliša go yena digole, difofu, difoa le balwetši ba bangwe ba bantši. Jesu o be a ba fodiša ka moka.

Ga bjale go be go fetile nywaga e meraro ga e sa le Johane a kolobeditše Jesu. Jesu o ile a botša baapostola ba gagwe gore kgauswinyane o tla rotogela Jerusalema moo a tlago go bolawa ke moka a tsoga bahung. Ge a sa letile nako yeo, Jesu o be a dutše a fodiša balwetši.

Jesu o fodiša mosadi yo a babjago

Bjale, ka letšatši le lengwe Jesu o be a ruta ka Sabatha. Sabatha e be e le letšatši la Bajuda la go khutša. Mosadi yo o mmonago mo, o be a babja kudu. O feditše nywaga e 18 a kobegile a sa kgone go ema ka go otlologa. Ka gona Jesu a bea diatla tša gagwe godimo ga mosadi yo gomme a otlologa. A fola!

Se se ile sa galefiša baetapele ba bodumedi. Yo mongwe wa bona a goeletša a re go lešaba: ‘Go na le matšatši a tshelelago ao re swanetšego go šoma ka ona. Ao ke matšatši a le ka tlago go fodišwa ka ona, e sego ka Sabatha!’

Eupša Jesu a mo araba a re: ‘Lena batho ba babe. Akere yo mongwe le yo mongwe wa lena o be a ka tlemolla pokolo ya gagwe a e iša go yo nwa meetse ka Sabatha. Bjale na mosadi yo wa batho yo a feditšego nywaga e 18 a babja ga se a swanela go fodišwa ka Sabatha?’ Karabo ya Jesu e ile ya dira gore batho bao ba babe ba hlabje ke dihlong.

Ka morago Jesu le baapostola ba gagwe ba ile ba tšea leeto la go ya Jerusalema. Ge ba be ba sa le ka ntle ga motse wa Jeriko, bakgopedi ba bangwe ba babedi ba difofu ba kwa gore Jesu o a feta. Ba goeletša ba re: ‘Jesu, re thuše!’

Jesu a bitša difofu tšeo gomme a re go tšona: “Le nyaka gore ke le direle’ng?” Tša re go yena: ‘Morena, hle bula mahlo a rena.’ Jesu a kgwatha mahlo a tšona gomme gateetee tša bona! Na o a tseba gore ke ka baka la’ng Jesu a be a dira mehlolo ye ka moka e makatšago? Ke ka gobane o be a rata batho gomme a nyaka gore ba be le tumelo go yena. Ka gona re ka kgodišega gore nakong ya ge a tla be a buša e le Kgoši, ga go na motho yo a tlago go babja mo lefaseng.

Mateo 15:30, 31; Luka 13:10-17; Mateo 20:29-34.



Dipotšišo

  • Ke’ng seo Jesu a bego a tšama a se dira ge a dutše a sepela le naga ka moka?
  • Ke’ng seo Jesu a ilego a se botša baapostola ba gagwe nywaga e meraro ka morago ga gore a kolobetšwe?
  • Batho bao ba lego mo seswantšhong ke bomang, gomme ke eng seo Jesu a ilego a se direla mosadi yo?
  • Ke ka baka la’ng karabo yeo Jesu a ilego a e nea baetapele ba bodumedi ge ba be ba gana a fodiša batho ka Sabatha e ile ya ba dira gore ba hlabje ke dihlong?
  • Ge Jesu le barutiwa ba gagwe ba be ba le kgauswi le motse wa Jeriko, ke eng seo Jesu a ilego a se direla bakgopedi ba bangwe ba babedi ba difofu?
  • Ke ka baka la’ng Jesu a be a dira mehlolo?

Dipotšišo tša tlaleletšo

  • Bala Mateo 15:30, 31.

    Jesu o ile a bonagatša bjang matla a Jehofa a makatšago, gona seo se swanetše go kgoma bjang kwešišo ya rena ka seo Jehofa a se holofeditšego ka lefase le lefsa? (Ps. 37:29; Jes. 33:24)

  • Bala Luka 13:10-17.

    Taba ya gore Jesu o ile a dira e mengwe ya mehlolo ya gagwe e makatšago ka Sabatha, e bontšha bjang tokologo yeo a tlago go e tlišetša batho nakong ya Pušo ya gagwe ya Nywaga e Sekete? (Luka 13:10-13; Ps. 46:9; Mat. 12:8; Bakol. 2:16, 17; Kut. 21:1-4)

  • Bala Mateo 20:29-34.

    Pego ye e bontšha bjang gore le ka mohla Jesu o be a sa itire yo a swaregilego kudu go ka thuša batho, gomme re ka ithuta’ng go se? (Doit. 15:7; Jak. 2:15, 16; 1 Joh. 3:17)

Ithute ka mo go oketšegilego

Mehlolo—E Dirwa ka Matla a Mang?

Barwarre ba Jesu ba dumela gore o hlakane hlogo.