Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 93: Jesu o Fepa Batho ba Bantši

Kgaolo 93: Jesu o Fepa Batho ba Bantši

GO DIREGILE selo se itšego se se šiišago. Johane Mokolobetši o sa tšwa go bolawa. Herodiase mosadi wa kgoši o be a sa mo rate. Ka gona, o ile a dira gore kgoši e laele gore Johane a kgaolwe hlogo.

Ge Jesu a ekwa se, a nyama kudu. A tloga a ya lefelong leo go se nago batho gore a be noši. Eupša batho ba mo šala morago. Eitše ge a bona batho bao ba bantši, a ba šokela. A bolela le bona ka mmušo wa Modimo gomme a fodiša balwetši ba bona.

Mantšiboeng ao barutiwa ba gagwe ba tla go yena ba re: ‘E šetše e le bošego, le gona lefelo le le ka thokwana. Lokolla batho ba e le gore ba yo ithekela dijo metsaneng ya kgauswi.’

Jesu o fepa lešaba

Jesu a re go bona: ‘Ga go nyakege gore ba tloge. Lena ba neeng dijo.’ Jesu a botšiša Filipi a re: ‘Re ka reka kae dijo tše di lekanego tša go fepa batho ba ka moka?’

Filipi a mo araba a re: ‘Go tla nyakega tšhelete e ntši kudu go reka dijo tše di lekanego gore yo mongwe le yo mongwe a tle a hwetše mo gonyenyane.’ Andrea a re: ‘Mošemanyana yo yo a swerego dijo tša rena, o swere feela dinkgwa tše hlano le dihlapi tše pedi. Eupša di tloga di ka se lekane batho ba ka moka.’

Jesu a re: ‘Botšang batho ba gore ba dule bjanyeng.’ Ke moka a leboga Modimo bakeng sa dijo tšeo gomme a thoma go di ngwathaganya. Ka morago ga moo, barutiwa ba gagwe ba abela batho ba ka moka dinkgwa le dihlapi. Go be go na le banna ba 5 000 le basadi ba bantšintši le bana. Ka moka ga bona ba ja ba khora. Ge barutiwa ba gagwe ba topelela marathana ao a bego a šetše, gwa tlala diroto tše 12!

Bjale Jesu a laela barutiwa ba gagwe gore ba namele sekepe ba tshelele ka mošola wa Lewatle la Galilea. Bošegong bjoo gwa tšutla phefo e matla gomme maphoto a tšokotša sekepe seo. Barutiwa ba tšhoga kudu. Ke moka bošegogare ba bona motho yo mongwe a sepela godimo ga meetse a etla go bona. Ba goeletša ka poifo ka gobane ba be ba sa kgolwe seo ba se bonago.

Jesu a re go bona: ‘Le se ke la boifa. Ke nna!’ Ba be ba sa dutše ba sa kgolwe. Ka gona Petro a re go Jesu: ‘Morena, ge e ba e le wena, mpotše gore ke tle go wena ke sepela godimo ga meetse.’ Jesu a re: “Tlaa!” Ka go re’alo Petro a fologa sekepeng a ya go Jesu a sepela godimo ga meetse! Ke moka a tšhoga gomme a thoma go nwelela, eupša Jesu a mo phološa.

Lebakeng le lengwe gape, Jesu o ile a fepa batho ba bangwe ba bantši. Lona lebakeng leo, o ile a ba fepa ka dinkgwa tše šupago le dihlatswana tše sego kae. Le gona moo, go ile gwa ba le dijo tše dintši bakeng sa bohle. Na ga go kgahliše go bona kamoo Jesu a ilego a hlokomela batho ka gona? Nakong ya ge a tla be a buša e le kgoši ya mmušo wa Modimo, re ka se tshwenyege ka selo!

Mateo 14:1-32; 15:29-38; Johane 6:1-21.



Dipotšišo

  • Ke selo sefe se se šiišago seo se ilego sa diragalela Johane Mokolobetši, gomme se ile sa dira gore Jesu a ikwe bjang?
  • Jesu o ile a fepa bjang batho ba bantši bao ba ilego ba mo šala morago, gona go ile gwa šala dijo tše kaaka’ng?
  • Ke ka baka la’ng barutiwa ba Jesu ba ile ba tšhoga bošegong bjo bongwe, gomme Petro o ile a diragalelwa ke eng?
  • Jesu o ile a fepa bjang batho ba bangwe ba bantši ka lekga la bobedi?
  • Ke ka baka la’ng e tla ba mo go kgahlišago ge Jesu a tla be a buša lefase e le Kgoši yeo e kgethilwego ke Modimo?

Dipotšišo tša tlaleletšo

  • Bala Mateo 14:1-32.

    Pego yeo e lego go Mateo 14:23-32 e re thuša bjang go kwešiša semelo sa Petro?

    Mangwalo a bontšha bjang gore Petro o ile a gola tsebong gomme a fenya mokgwa wa gagwe wa go dira dilo ka lepotlapotla? (Mat. 14:27-30; Joh. 18:10; 21:7; Dit. 2:14, 37-40; 1 Pet. 5:6, 10)

  • Bala Mateo 15:29-38.

    Jesu o ile a bontšha bjang gore o be a sa nyatše dijo tšeo di bego di etšwa go Tatagwe? (Mat. 15:37; Joh. 6:12; Bakol. 3:15)

  • Bala Johane 6:1-21.

    Bakriste lehono ba ka latela bjang mohlala wa Jesu mabapi le mebušo ya lefase? (Joh. 6:15; Mat. 22:21; Baroma 12:2; 13:1-4)

Ithute ka mo go oketšegilego

Jesu o Fepa Lešaba le Legolo

Lebelela gore ke eng se se fošagetšego ka seswantšho se gomme o se tsenye mebala.