Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 85: Jesu o Belegetšwe ka Setaleng

Kgaolo 85: Jesu o Belegetšwe ka Setaleng

NA O a tseba gore lesea le le lego mo ke mang? Ke Jesu. O sa tšwa go belegelwa ka mo setaleng. Setala ke moo go dulago diruiwa. Maria o robatša Jesu ka legopong, e lego lefelo leo go tšhelwago dijo tša dipokolo le diruiwa tše dingwe. Eupša ke ka baka la’ng Maria le Josefa ba le mo gotee le diruiwa? Na le ke lefelo leo ngwana a swanetšego go belegelwa go lona?

Aowa, ga se lona. Eupša lebaka la gore ba be mo še le: Mmuši wa Roma e lego Kesara Augustose o ile a ntšha taelo ya gore motho yo mongwe le yo mongwe a boele motseng woo a belegetšwego go wona gore a yo ngwadišwa. Bjale Josefa o be a belegetšwe mo Betlelehema. Eupša ge yena le Maria ba fihla mo, ba ile ba hwetša go se na phapoši yeo ba ka dulago go yona. Ka gona ba swanelwa ke go tlo dula mo le diruiwa. Lona letšatšing leo, Maria o ile a belega Jesu! Eupša Jesu o be a phetše gabotse, go etša ge o ka mmona mo seswantšhong.

Josefa, Maria le Jesu

Na o a ba bona badiši bao ba tlago go bona Jesu? Ba be ba le merakeng bošego ba dišitše dinku tša bona gomme seetša se se phadimago sa ba phadimela. E be e le morongwa! Badiši ba ba ile ba boifa kudu. Eupša morongwa yoo a re go bona: ‘Se boifeng! Ke le tlišeditše ditaba tše dibotse. Lehono, Kriste Morena o belegwe kua Betlelehema. O tla phološa batho! Le tla mo hwetša a phuthetšwe ka mašela gomme a robetše ka legopong.’ Gateetee gwa tšwelela barongwa ba bantši ke moka ba thoma go tumiša Modimo. Ka yona nako yeo, badiši ba ba akgofa ba yo nyaka Jesu gomme ba mo hwetša.

Na o a tseba gore ke ka baka la’ng Jesu e be e le yo a kgethegilego ka tsela ye? Na o a tseba gore ge e le gabotse ke mang? Gopola gore sehlogong sa mathomo ka pukung ye re boditšwe ka Morwa wa pele wa Modimo. Morwa yoo o šomile gotee le Jehofa ge ba be ba dira magodimo, lefase le dilo tše dingwe ka moka. Jesu yo re bolelago ka yena mo ke yena yoo!

Ee, Jehofa o ile a tšea bophelo bja Morwa wa gagwe legodimong gomme a bo tsenya ka gare ga Maria. Gateetee ngwana a thoma go gola ka mpeng ya gagwe go swana le ge bana ba bangwe ba gola ka gare ga bommago bona. Eupša ngwana yo e be e le Morwa wa Modimo. Mafelelong Jesu o ile a belegelwa mo Betlelehema ka setaleng. Na bjale o kgona go bona lebaka leo ka lona barongwa ba bego ba thabetše go botša batho gore Jesu o belegwe?

Luka 2:1-20.



Dipotšišo

  • Lesea leo le lego mo seswantšhong ke mang, gomme Maria o le robatša kae?
  • Ke ka baka la’ng Jesu a ile a belegelwa ka setaleng?
  • Banna ba ba tsenago ka setaleng mo seswantšhong ke bomang, gomme morongwa o be a ba boditše eng?
  • Ke ka baka la’ng Jesu e be e le yo a kgethegilego?
  • Ke ka baka la’ng Jesu a ka bitšwa Morwa wa Modimo?

Dipotšišo tša tlaleletšo

  • Bala Luka 2:1-20.

    Kesara Augustose o ile a dira’ng go phethagatša boporofeta bjo bo lego mabapi le go tswalwa ga Jesu? (Luka 2:1-4; Mika 5:2)

    Motho a ka dira’ng gore a akaretšwe gare ga bao ba bitšwago gore ke ‘batho bao Modimo a ba amogelago’? (Luka 2:14; Mat. 16:24; Joh. 17:3; Dit. 3:19; Baheb. 11:6)

    Ge e ba badiši bale ba ikokobeditšego ba dinku ba Bajuda ba be ba na le lebaka la go thaba ka baka la go belegwa ga Mophološi, bahlanka ba Modimo lehono ba na le lebaka lefe le legolo le go feta la go thaba? (Luka 2:10, 11; Baef. 3:8, 9; Kut. 11:15; 14:6)

Ithute ka mo go oketšegilego

Jesu o Belegwe Neng?

Ithute lebaka leo Keresemose e ketekwago ka di-25 tša December.