Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 25: Lapa le Hudugela Egipita

Kgaolo 25: Lapa le Hudugela Egipita

JOSEFA o ile a se sa kgona go itshwara. O ile a botša bahlanka ba gagwe ka moka gore ba tšwe ka ntlong. Ge Josefa a šetše le bana babo ka moo ntlong, a thoma go lla. Re ka akanya kamoo bana babo ba ilego ba makala ka gona ka ge ba be ba sa tsebe gore o llela eng. Mafelelong o ile a re go bona: “Ke nna Josefa. A tate o sa phela?”

Bana babo ba ile ba makala kudu moo ba ilego ba palelwa ke go bolela. Ba be ba tšhogile. Josefa a re: “Mpatameleng hle.” Ge ba mmatametše a re go bona: “Ke nna morwarrago lena Josefa yoo le mo rekišitšego a išwa Egipita.”

Josefa a bolela le bona gape ka botho a re: ‘Le se ke la ipona molato ge le nthekišitše. Ruri ke Modimo yo a nthometšego mo Egipita gore ke tle ke phološe maphelo a batho. Farao o ntirile mmuši wa naga ye ka moka. Bjale akgofang le boele go tate gomme le mmotše ditaba tše. Le mmotše le gore a tle a dule mo.’

Ke moka Josefa a gokarela bana babo ka moka gomme a ba atla. Ge Farao a ekwa gore bana babo Josefa ba tlile, a re go yena: ‘E re ba tšee dikariki ba ye go nametša tatago bona le malapa a bona gomme ba tle mo. Ke tla ba nea naga e di phalago tšohle mo Egipita.’

Ba ile ba dira sona seo. O ka kgona go bona Josefa mo seswantšhong a gahlanetša tatagwe ge a be a fihla Egipita le lapa la gagwe ka moka.

Lapa la Jakobo le be le godile kudu. E be e le ba 70 ge ba be ba hudugela Egipita go balwa Jakobo, bana ba gagwe le ditlogolo tša gagwe. Eupša lapeng leo go be go bile go na le basadi gomme mohlomongwe le bahlanka ba bantši. Ka moka ga bona ba ile ba dula Egipita. Ba ile ba bitšwa Baisiraele ka ge Modimo a ile a fetoša leina la Jakobo gore e be Isiraele. Baisiraele e ile ya ba setšhaba se se kgethegilego kudu go Modimo go etša ge re tla bona seo ka morago.

Genesi 45:1-28; 46:1-27.

Josefa le lapa labo


Dipotšišo

  • Go ile gwa direga’ng ge Josefa a be a botša bana babo gore ke yena mang?
  • Ke’ng seo Josefa a ilego a se hlalosetša bana babo ka botho?
  • Farao o ile a re’ng ge a be a ekwa gore bana babo Josefa ba tlile Egipita?
  • Lapa la Jakobo e be e le le legolo gakaaka’ng ge le be le hudugela Egipita?
  • Lapa la Jakobo le ile la tla la newa leina lefe, gona ka baka la’ng?

Dipotšišo tša tlaleletšo

  • Bala Genesi 45:1-28.

    Pego ya Beibele ya mabapi le Josefa e bontšha bjang gore Jehofa a ka fetoša seo se reretšwego go gobatša bahlanka ba gagwe gore se be le mafelelo a mabotse? (Gen. 45:5-8; Jes. 8:10; Bafil. 1:12-14)

  • Bala Genesi 46:1-27.

    Jehofa o ile a kgonthišetša Jakobo eng ge a be a eya Egipita? (Gen. 46:1-4)