Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 24: Josefa o Leka Bana Babo

Kgaolo 24: Josefa o Leka Bana Babo

JOSEFA o be a nyaka go bona ge e ba bomogolwagwe ba 10 ba sa dutše ba mo hloile. O ile a re go bona: “Le dihlodi! Le tlile go bona moo naga ya rena e ka šwahlelwago gona gabonolo.”

Bona ba re go yena: ‘Aowa, ga re dihlodi. Re banna ba go botega. Re bana ba motho. Re be re le ba 12. Eupša yo mongwe wa rena ga a sa le gona gomme yo monyenyane o šetše gae le tatago rena.’

Josefa o ile a itira tše ekego ga a ba dumele. A lahlela ngwanabo bona yo a bitšwago Simeone kgolegong gomme a lesa ba bangwe gore ba iše dijo gae. Eupša a re go bona: ‘Ge le boa mo, le tle le ngwanabo lena yo monyenyane.’

Ge ba fihlile gae Kanana, ba botša tatago bona dilo ka moka tšeo di diragetšego. Jakobo o ile a nyama kudu. A lla ka gore: ‘Josefa ga a sa le gona le Simeone ga a sa le gona. Nka se ke ka le tlogela le sepela le Benjamini morwa wa ka yo monyenyane.’ Eupša ge dijo tša bona di thoma go fela, Jakobo o ile a ba dumelela go ya Egipita le Benjamini gore ba yo reka dijo tše dingwe.

Ka gona Josefa o ile a bona bana babo ba tšwelela. A thaba kudu ge a bona ngwanabo yo monyenyane e lego Benjamini. Ge e le gabotse, ga go le o tee wa bona yo a ilego a lemoga gore motho yoo wa maemo e be e le Josefa. Bjale Josefa o ile a dira selo se itšego e le gore a leke bana babo ba 10.

O ile a laela bahlanka ba gagwe gore ba tlatše mekotla ya bona ka moka ka dijo. Le gona a ba laela gore ba tsenye senwelo sa gagwe sa silifera ka mokotleng wa Benjamini ba sa tsebe. Ge ba setše ba tlogile ba le kgojana, Josefa a romela bahlanka ba gagwe gore ba ba rakediše. Ge ba ba hweditše ba re go bona: ‘Ke ka baka la’ng le utswitše senwelo sa silifera sa mong wa rena?’

Ka moka ga bona ba re: ‘Ga se ra utswa senwelo sa mong wa lena. Ge e ba le ka se hwetša go yo mongwe wa rena, anke motho yoo a bolawe.’

Ka gona bahlanka bao ba nyaka senwelo seo ka mekotleng yeo ka moka gomme ba se hwetša ka mokotleng wa Benjamini, bjalo ka ge o bona mo seswantšhong. Bahlanka bao ba re: ‘Lena ba bangwe le ka ya gae, eupša Benjamini yena o swanetše go boela morago le rena.’ Bjale barwarre ba ba 10 ba tla dira’ng?

Ka moka ga bona ba ile ba boela le Benjamini ntlong ya Josefa. Josefa a re go bana babo: ‘Lena ka moka le ka ya gae, eupša Benjamini o swanetše go šala mo gore e be lekgoba la ka.’

Bjale Juda a re: ‘Ge nka boela gae ke se na mošemane yo, tate o tla hwa ka gobane o mo rata kudu. Bjale hle anke go šale nna gore ke be lekgoba la gago eupša o lese mošemane yo a ye gae.’

Josefa o ile a bona gore bana babo ba fetogile. A bona gore ga ba sa mo hloile. Anke re bone seo Josefa a ilego a se dira mo nakong ye.

Genesi 42:9-38; 43:1-34; 44:1-34.

Bomorwarrago Josefa ba pharwa ka molato


Dipotšišo

  • Ke ka baka la’ng Josefa a ile a re bana babo ke dihlodi?
  • Ke ka baka la’ng Jakobo a ile a dumelela morwa wa gagwe yo monyenyane Benjamini gore a ye Egipita?
  • Go tlile bjang gore senwelo sa Josefa sa silifera se feleletše se le ka mokotleng wa Benjamini?
  • Ke’ng seo Juda a ilego a re o tla se dira gore Benjamini a lokollwe?
  • Na bana babo Josefa ba be ba fetogile? Hlalosa.

Dipotšišo tša tlaleletšo

  • Bala Genesi 42:9-38.

    Mantšu a Josefa ao a lego go Genesi 42:18 ke kgopotšo e botse bjang go bao ba nago le boikarabelo ka gare ga mokgatlo wa Jehofa lehono? (Neh. 5:15; 2 Bakor. 7:1, 2)

  • Bala Genesi 43:1-34.

    Gaešita le ge Rubeni e be e le leitšibulo, re tseba bjang gore Juda e be e le mmoleledi wa bana babo? (Gen. 43:3, 8, 9; 44:14, 18; 1 Dikor. 5:2)

    Josefa o ile a leka bana babo bjang, gona ka baka la’ng? (Gen. 43:33, 34)

  • Bala Genesi 44:1-34.

    E le gore bana babo ba se ke ba mo tseba, Josefa o ile a re’ng go bona? (Gen. 44:5, 15; Lef. 19:26)

    Bana babo Josefa ba ile ba bontšha bjang gore ga ba sa mo jela mona? (Gen. 44:13, 33, 34)