Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 21: Bana Babo Josefa ba mo Hloile

Kgaolo 21: Bana Babo Josefa ba mo Hloile

BONA kamoo mošemane yo a lego mo seswantšhong a nyamilego ka gona. Mošemane yo ke Josefa. Bana babo ba sa tšwa go mo rekišetša banna ba bao ba yago Egipita. Josefa ge a fihla moo e tla ba lekgoba. Ke ka baka la’ng bana babo ka motswadi o tee ba ile ba mo dira selo se se sebe? Ke ka gobane ba be ba mo jela mona.

Josefa o rekišwa ke bana babo

Tatago bona e lego Jakobo o be a rata Josefa kudukudu. O ile a bontšha seo ka go mo direla seaparo se sebotse se setelele. Ge bana babo Josefa ba 10 ba bona kamoo Jakobo a bego a mo rata ka gona, ba ile ba thoma go ba le mona gomme ba mo hloya. Eupša go be go na le lebaka le lengwe leo le bego le dira gore ba mo hloye.

Josefa o ile a lora ditoro tše pedi. Ditorong tšeo tša gagwe, bana babo ba be ba mo khunamela. Ge Josefa a be a ba botša ditoro tšeo, lehloyo la bona le ile la gola le go feta.

Bjale ka letšatši le lengwe ge bomogolwagwe ba be ba dišitše dinku tša tatago bona, Jakobo o ile a kgopela Josefa gore a yo bona kamoo ba phelago ka gona. Ge bana babo ba mmona a etla, ba bangwe ba re: ‘A re mmolayeng!’ Eupša Rubeni mogolwago bona a re: ‘Aowa, le se ke la dira bjalo!’ Go e na le moo, ba ile ba mo swara gomme ba mo lahlela ka mokoting wa meetse wo o bego o omile. Ke moka ba dula fase gore ba boledišane ka seo ba bego ba tla se dira ka yena.

Ka yona nako yeo, gwa tšwelela banna ba bangwe ba Baishimaele. Juda a re go bana babo: ‘A re mo rekišetšeng Baishimaele.’ Ba ile ba dira sona seo. Ba rekiša Josefa ka ditsekana tše 20 tša silifera. A lehloyo le legolo gakaakang le go hloka botho!

Ba be ba tlo re’ng go tatago bona? Ba ile ba bolaya pudi gomme ba ina seaparo se sebotse sa Josefa leboelela mading a yona. Ke moka ba tšea seaparo seo ba se iša gae go Jakobo tatago bona ba re: ‘Re hweditše seaparo se. Se hlahlobe, o bone ge e ba e se sa Josefa.’

Jakobo o ile a bona gore ke sona. A lla a re: ‘Sebata se swanetše go ba se bolaile Josefa.’ Seo ke sona se bana babo Josefa ba bego ba nyaka gore tatago bona a se nagane. Jakobo o ile a nyama kudukudu. A fetša matšatši a mantši a lla. Eupša Josefa o be a se a hwa. Anke re bone seo se ilego sa mo diragalela moo a išitšwego gona.

Genesi 37:1-35.



Dipotšišo

  • Ke ka baka la’ng bana babo Josefa ba be ba mo jela mona, gona ba ile ba dira’ng?
  • Ke’ng seo bana babo Josefa ba bego ba nyaka go mo dira sona, eupša Rubeni o ile a re’ng go bona?
  • Go ile gwa direga’ng ge go be go tšwelela babapatši ba Baishimaele?
  • Ke’ng seo bana babo Josefa ba ilego ba se dira gore tatago bona a nagane gore Josefa o hwile?

Dipotšišo tša tlaleletšo

  • Bala Genesi 37:1-35.

    Bakriste ba ka ekiša bjang mohlala wa Josefa ka go botša bagolo ba phuthego ge e ba motho yo a itšego a dirile sebe? (Gen. 37:2; Lef. 5:1; 1 Bakor. 1:11)

    Ke’ng seo se ilego sa dira gore bana babo Josefa ba mo sware gampe? (Gen. 37:11, 18; Die. 27:4; Jak. 3:14-16)

    Ke’ng seo Jakobo a ilego a se dira seo ka moka ga rena re se dirago ge re nyamile? (Gen. 37:35)

Ithute ka mo go oketšegilego

Josefa o Rekišetšwa Bokgobeng

Taonelouta le go phrintha letlakala le leo le tsenywago mebala ke moka o nyake dilo tše pedi tšeo di sa sepedišanego le kanegelo ye ya Beibele.

Josefa Nageng ya Egipita

O ka thabiša Modimo bjang gaešita le ge go se na motho yo a go bonago? Bala kanegelo ye ya Beibele gomme o ithute mohlaleng wa Josefa.