Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 20: Dina o Wela Kotsing

Kgaolo 20: Dina o Wela Kotsing

NA O a bona gore ke bomang bao Dina a ba etelago mo seswantšhong? O etela ba bangwe ba basetsana bao ba dulago nageng ya Kanana. Na tatagwe e lego Jakobo o be a thabišwa ke se? Go go thuša gore o arabe potšišo ye, leka go gopola seo Aborahama le Isaka ba bego ba se nagana ka basadi ba Kanana.

Dina o etela banenyana ba Bakanana

Na Aborahama o ile a nyaka gore Isaka morwa wa gagwe a nyale mosetsana wa Kanana? Aowa. Na Isaka le Rebeka ba ile ba nyaka gore Jakobo morwa wa bona a nyale mosetsana wa Mokanana? Aowa. Na o a tseba gore e be e le ka baka la’ng?

E be e le ka gobane batho ba Kanana ba be ba rapela medimo ya maaka. E be e se batho bao motho a ka nyalanago le bona, le gona e be e se batho bao motho a ka gweranago le bona. Ka gona re ka kgodišega gore Jakobo o be a sa thabišwe ke gore morwedi wa gagwe o be a gwerane le basetsana ba ba Bakanana.

Mafelelong Dina o ile a wela kotsing. Na o bona monna yo wa Mokanana yo a lebeletšego Dina mo seswantšhong? Leina la gagwe e be e le Shikeme. Ka letšatši le lengwe ge Dina a be a etetše bagwera ba gagwe, Shikeme o ile a mo tšea gomme a mo gapeletša gore a robale le yena. Se se be se fošagetše ka gobane ke feela banna le basadi bao ba nyalanego bao ba swanetšego go robala gotee. Selo se se sebe seo Shikeme a ilego a se dira Dina se ile sa baka mathata a mangwe a mantši.

Ge dikgaetšedi tša Dina di ekwa ka seo se diragetšego, di ile tša galefa kudu. Tše pedi tša tšona e lego Simeone le Lefi di ile tša galefa kudu moo di ilego tša tšea ditšhoša tša ya motseng wa gabo Shikeme gomme tša hwetša banna ba moo ba sa itebetše. Tšona gotee le bana babo tšona tša bolaya Shikeme le banna ba bangwe ka moka. Jakobo o ile a galefa kudu ka ge barwa ba gagwe ba be ba dirile selo seo se sebe.

Mathata a ka moka a thomile bjang? A thomile ka gore Dina a gwerane le batho bao ba bego ba sa kwe melao ya Modimo. Na re tla rata go gwerana le batho ba bjalo?

Genesi 34:1-31.



Dipotšišo

  • Ke ka baka la’ng Aborahama le Isaka ba be ba sa nyake gore bana ba bona ba nyalane le batho ba nageng ya Kanana?
  • Na Jakobo o ile a dumelela morwedi wa gagwe gore a gwerane le basetsana ba Bakanana?
  • Monna yo a lebeletšego Dina mo seswantšhong ke mang, gona o ile a mo dira selo sefe se sebe?
  • Ke’ng seo dikgaetšedi tša Dina e lego Simeone le Lefi ba ilego ba se dira ge ba be ba ekwa ka seo se diragetšego?
  • Na Jakobo o ile a dumelelana le seo Simeone le Lefi ba ilego ba se dira?
  • Mathata a lapa la Jakobo a thomile bjang?

Dipotšišo tša tlaleletšo

  • Bala Genesi 34:1-31.

    Na Dina o ile a etela basetsana ba nageng ya Kanana gatee feela? Hlalosa. (Gen. 34:1)

    Ke ka baka la’ng Dina a be a ikarabela ka go lahlegelwa ke bokgarebe bja gagwe? (Bagal. 6:7)

    Bafsa lehono ba ka bontšha bjang gore ba ithuta mohlaleng wa temošo wa Dina? (Die. 13:20; 1 Bakor. 15:33; 1 Joh. 5:19)