Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 19: Jakobo o na le Lapa le Legolo

Kgaolo 19: Jakobo o na le Lapa le Legolo
Jakobo le barwa ba gagwe

BONA lapa le le legolo. Ba ke barwa ba Jakobo ba 12. O be a bile a na le barwedi. Na o tseba maina a ba bangwe ba bana ba gagwe? Anke re ithute a mangwe a ona.

Lea o ile a belega Rubeni, Simeone, Lefi le Juda. Ge Ragele a be a bona gore ga a be le bana, o ile a nyama kudu. Ka gona a nea Jakobo mohlanka wa gagwe wa mosadi e lego Biliha gomme a mmelegela barwa ba babedi bao ba bitšwago Dani le Nafutali. Ke moka Lea le yena a nea Jakobo mohlanka wa gagwe wa mosadi e lego Silipa gomme a mmelegela Gada le Ashere. Mafelelong Lea a ba le barwa ba bangwe ba babedi e lego Isakara le Sebulone.

Mafelelong Ragele o ile a ba le ngwana gomme a mmitša Josefa. Ka moragonyana re tlo ithuta mo gontši ka Josefa ka gobane o ile a ba motho wa maemo a phagamego kudu. Bao ke bona barwa ba 11 bao ba ilego ba belegelwa Jakobo nakong ya ge a be a dula le Labane tatago Ragele.

Jakobo o be a bile a na le barwedi, eupša Beibele e re botša leina la o tee feela wa bona. Leina la gagwe e be e le Dina.

Go ile gwa tla nako yeo ka yona Jakobo a ilego a phetha ka gore a tlogele Labane gomme a boele Kanana. Ka gona o ile a kgoboketša lapa la gagwe le legolo le mehlape ya gagwe e megolo ya dinku le ya dikgomo ke moka a thoma leeto le letelele.

Ka morago ga ge Jakobo le lapa la gagwe ba na le lebakanyana ba boetše Kanana, Ragele o ile a belega morwa yo mongwe. O mmelege ge ba be ba le leetong. Ragele o ile a belega morwa yoo ka bothata gomme mafelelong a hwa nakong ya ge a be a belega. Eupša ngwana yoo wa mošemane o be a phetše gabotse. Jakobo o ile a mmitša Benjamini.

Re nyaka go gopola maina a barwa ba 12 ba Jakobo ka gobane setšhaba sa Isiraele ka moka se tšwile go bona. Ge e le gabotse, meloko e 12 ya Isiraele e reeletšwe ka barwa ba 10 ba Jakobo le barwa ba babedi ba Josefa. Isaka o ile a phela nywaga e mentši ka morago ga ge bašemane ba ka moka ba belegwe gomme o swanetše go ba a ile a thabišwa ke go ba le ditlogolo tše dintši kudu. Eupša anke re bone seo se ilego sa diragalela setlogolo sa gagwe e lego Dina.

Genesi 29:32-35; 30:1-26; 35:16-19; 37:35.



Dipotšišo

  • Maina a barwa ba tshelelago bao Jakobo a bilego le bona le Lea mosadi wa gagwe wa pele ke bomang?
  • Ke barwa bafe ba babedi bao Silipa mohlanka wa Lea wa mosadi a ba belegetšego Jakobo?
  • Maina a barwa ba babedi bao Biliha mohlanka wa Ragele wa mosadi a ba belegetšego Jakobo e be e le bomang?
  • Ke barwa bafe ba babedi bao Ragele a ilego a ba belega, eupša go ile gwa direga’ng ge a be a belega morwa wa bobedi?
  • Go ya ka seswantšho se, Jakobo o be a na le barwa ba bakae, gona go ile gwa tšwa eng go bona?

Dipotšišo tša tlaleletšo

  • Bala Genesi 29:32-35; 30:1-26 le 35:16-19.

    Go etša ge go bontšhitšwe tabeng ya barwa ba Jakobo ba 12, gantši bašemane ba Baheberu kgale ba be ba rewa maina a mohuta mang?

  • Bala Genesi 37:35.

    Gaešita le ge ka Beibeleng go bolelwa ka Dina feela, re tseba bjang gore Jakobo o be a na le barwedi ba bangwe? (Gen. 37:34, 35)

Ithute ka mo go oketšegilego

Kanegelo ya Barwa ba Jakobo

O swanetše go arabela bjang ge ngwaneno, kgaetšedi’ago goba mogwera wa gago a hwetša selo seo o dumago go ba le sona?