Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 18: Jakobo o ya Harane

Kgaolo 18: Jakobo o ya Harane

NA O a tseba gore banna ba bao ba bolelago le Jakobo ke bomang? Ka morago ga gore Jakobo a sepele matšatši a mantši, o ile a ba hwetša sedibeng. Ba be ba dišitše dinku tša bona. Jakobo o ile a ba botšiša a re: “Le tšwa kae?”

Bona ba re: “Re tšwa Harane.”

Ke moka Jakobo a ba botšiša a re: “Na le tseba Labane?”

Ba re: ‘Ee, re a mo tseba. E bile Ragele morwedi wa gagwe šo o tla le mohlape wa gagwe wa dinku.’ Na o bona Ragele a tšwelela mola kgojana?

Jakobo o kopana le Ragele

Eitše ge Jakobo a bona Ragele a etla le dinku tša Labane malomeagwe, a ya a kgokološa leswika a le tloša sedibeng e le gore dinku di tle di nwe meetse. Ke moka Jakobo a atla Ragele a mmotša gore ke yena mang. Ragele o ile a thaba kudu moo a ilego a kitimela gae a yo botša Labane tatagwe.

Labane o ile a thabela gore Jakobo a dule le yena. Le gona ge Jakobo a be a kgopela go nyala Ragele, Labane o ile a thaba. Eupša o ile a kgopela Jakobo gore a šome tšhemong ya gagwe ka nywaga e šupago pele a ka nyala Ragele. Ka ge Jakobo a be a rata Ragele kudu, o ile a dira seo. Eupša na o a tseba gore go ile gwa direga eng ge nako ya gore a nyale Ragele e fihla?

Labane o ile a nea Jakobo morwedi wa gagwe yo mogolo e lego Lea go e na le go mo nea Ragele. Ge Jakobo a be a dumetše go hlankela Labane nywaga e mengwe e šupago, Labane o ile a mo nea le Ragele gore e be mosadi wa gagwe. Mehleng yeo, Modimo o be a dumeletše banna gore ba be le basadi ba bantši. Eupša go etša ge Beibele e bontšha, mo mehleng ya rena monna o swanetše go ba le mosadi o tee feela.

Genesi 29:1-30.



Dipotšišo

  • Kgarebe yeo e lego mo seswantšhong ke mang, gomme ke eng seo Jakobo a ilego a e direla sona?
  • Ke’ng seo Jakobo a bego a ikemišeditše go se dira gore a tle a nyale Ragele?
  • Ke’ng seo Labane a ilego a se dira ge nako ya gore Jakobo a nyale Ragele e fihla?
  • Jakobo o ile a dumela go dira’ng gore a tle a nyale Ragele?

Dipotšišo tša tlaleletšo

  • Bala Genesi 29:1-30.

    Jakobo o ile a bontšha bjang gore o a botega gaešita le ge Labane a ile a mo radia, gona re ka ithuta’ng go se? (Gen. 25:27; 29:26-28; Mat. 5:37)

    Mohlala wa Jakobo o bontšha bjang phapano magareng ga lerato la kgonthe le lerato la go fo tšeega maikwelong? (Gen. 29:18, 20, 30; Sefela 8:6)

    Ke basadi bafe ba bane bao ba ilego ba ba karolo ya lapa la Jakobo gomme ka morago ba tla ba mmelegela barwa? (Gen. 29:23, 24, 28, 29)