Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 17: Mafahla ao a Bego a sa Swane

Kgaolo 17: Mafahla ao a Bego a sa Swane
Esau

NA BAŠEMANE ba babedi bao ba lego mo seswantšhong ba a swana? Na o tseba maina a bona? Motsomi yo o mmonago mo ke Esau gomme yo a hlokometšego dinku ke Jakobo.

Esau le Jakobo e be e le bana ba mafahla ba Isaka le Rebeka. Isaka tatago bona o be a rata Esau kudu ka gobane o be a tseba go tsoma gomme a etla le nama gore lapa le je. Eupša Rebeka o be a rata Jakobo kudu ka gobane e be e le mošemane yo a ikhomoletšego le yo a se nago ditshele.

Rakgolo wa bona Aborahama o be a sa phela gomme re ka nagana kamoo Jakobo a bego a rata go mo theetša ge a bolela ka Jehofa. Mafelelong Aborahama o ile a hwa a na le nywaga e 175, nakong ya ge mafahla ao a be a na le nywaga e 15.

Ge Esau a be a na le nywaga e 40, o ile a nyala basadi ba babedi ba nageng ya Kanana. Se se ile sa nyamiša Isaka le Rebeka kudu ka gobane basadi ba ba be ba sa rapele Jehofa.

Ka letšatši le lengwe go ile gwa direga selo se sengwe seo se ilego sa dira gore Esau a galefele Jakobo kudu. Go be go fihlile nako ya gore Isaka a šegofatše morwa wa gagwe yo mogolo. Ka ge Esau a be a feta Jakobo, o be a letetše gore go šegofatšwe yena. Eupša pejana ga moo, Esau o be a ile a rekišetša Jakobo tshwanelo ya go šegofatšwa. Le gona nakong ya ge bašemane ba ba babedi ba be ba belegwa, Modimo o be a boletše gore Jakobo ke yena yo a bego a tla šegofatšwa. Go ile gwa direga sona seo. Isaka o ile a šegofatša morwa wa gagwe Jakobo.

Jakobo

Ka morago ge Esau a ekwa ka seo, o ile a galefela Jakobo. A galefa kudu moo a ilego a re o tlo bolaya Jakobo. Ge Rebeka a ekwa ka se, a tshwenyega kudu. Ka gona a botša Isaka monna wa gagwe a re: ‘Ruri go tla nkweša bohloko ge Jakobo le yena a ka nyala yo mongwe wa basadi ba ba Kanana.’

Ka go re’alo Isaka a bitša morwa wa gagwe Jakobo gomme a re go yena: ‘O se ke wa nyala mosadi wa Kanana. Go e na le moo, eya lapeng la Bethuele rakgolo wa gago kua Harane. O nyale yo mongwe wa barwedi ba Labane morwa wa gagwe.’

Jakobo o ile a theetša tatagwe gomme gateetee a thoma leeto le letelele la go ya moo metswalo ya gagwe e bego e dula gona kua Harane.

Genesi 25:5-11, 20-34; 26:34, 35; 27:1-46; 28:1-5; Baheberu 12:16, 17.



Dipotšišo

  • Esau le Jakobo e be e le bomang, gona ba be ba sa swane ka ditsela dife?
  • Esau le Jakobo ba be ba na le nywaga e mekae ge rakgolo wa bona Aborahama a be a ehwa?
  • Ke’ng seo Esau a ilego a se dira seo se ilego sa nyamiša mmagwe le tatagwe kudu?
  • Ke ka baka la’ng Esau a ile a galefela Jakobo ngwanabo?
  • Ke keletšo efe yeo Isaka a ilego a e nea morwa wa gagwe Jakobo?

Dipotšišo tša tlaleletšo

  • Bala Genesi 25:5-11, 20-34.

    Jehofa o ile a bolela eng e sa le pele mabapi le barwa ba babedi ba Rebeka? (Gen. 25:23)

    Jakobo le Esau ba be ba lebelela tshwanelo ya go ba yo mogolo ka ditsela dife tše di sa swanego? (Gen. 25:31-34)

  • Bala Genesi 26:34, 35; 27:1-46 le 28:1-5.

    Ke’ng seo se ilego sa bontšha gore Esau o be a sa hlomphe dilo tša moya? (Gen. 26:34, 35; 27:46)

    Ke’ng seo Isaka a ilego a re Jakobo a se dire gore Modimo a tle a mo šegofatše? (Gen. 28:1-4)

  • Bala Baheberu 12:16, 17.

    Mohlala wa Esau o bontšha’ng mabapi le ditlamorago tšeo di ka tlelago bao ba sa hlomphego dilo tše kgethwa?