Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 15: Mosadi wa Lota o Lebelela Morago

Kgaolo 15: Mosadi wa Lota o Lebelela Morago

LOTA le lapa la gagwe ba be ba dula gotee le Aborahama nageng ya Kanana. Ka letšatši le lengwe Aborahama o ile a re go Lota: ‘Mo nageng ye ga go na mafulo a lekanego bakeng sa mehlape ya rena ka moka. A re arogane, hle. Ge e ba o eya ka go le letshadi nna ke tla ya ka go le letona.’

Lota o ile a lekola naga. A bona karolo e botse kudu ya naga yeo e bego e na le meetse le mafulo a mantši a matala bakeng sa diruiwa tša gagwe. Karolo ya naga yeo e be e le ya Selete sa Noka ya Jorodane. Ka gona Lota a hudušetša lapa la gagwe le diruiwa tša gagwe moo. Mafelelong ba dula motseng wa Sodoma.

Batho ba Sodoma e be e le ba babe kudu. Se se ile sa kweša Lota bohloko ka gobane e be e le motho wa go loka. Modimo le yena o be a ekwa bohloko. Mafelelong o ile a romela barongwa ba babedi gore ba yo lemoša Lota gore o tlo fediša Sodoma le motse wa kgauswi le moo e lego wa Gomora ka baka la bobe bja yona.

Barongwa bao ba ile ba re go Lota: ‘Akgofa! Tšea mosadi wa gago le barwedi ba gago ba babedi gomme le tšwe mo!’ Lota le lapa la gagwe ba be ba dikadika go tšwa, ka gona barongwa bao ba ba swara ka diatla ba ba ntšha motseng. Yo mongwe wa barongwa bao a re: ‘Tšhabang le phološeng maphelo a lena! Le se ke la lebelela morago. Tšhabelang dithabeng gore le se ke la bolawa.’

Lota le barwedi ba gagwe ba ile ba kwa gomme ba tšhaba Sodoma. Ga se ba ka ba ema le ge e le kae, le gona ga se ba ka ba lebelela morago. Eupša mosadi wa Lota o ile a se kwe. Ge ba šetše ba tšwile Sodoma, o ile a ema gomme a lebelela morago. Ke moka a fetoga sehlwaseeme sa letswai. Na o a mmona mo seswantšhong?

Re ithuta thuto e botse go se. Re ithuta gore Modimo o phološa bao ba mo kwago, eupša bao ba sa mo kwego ba tla loba maphelo a bona.

Genesi 13:5-13; 18:20-33; 19:1-29; Luka 17:28-32; 2Petro 2:6-8.

Lota o tšhaba Sodoma


Dipotšišo

  • Ke ka baka la’ng Aborahama le Lota ba ile ba arogana?
  • Ke ka baka la’ng Lota a ile a kgetha go dula Sodoma?
  • Batho ba Sodoma e be e le ba mohuta mang?
  • Ke temošo efe yeo barongwa ba babedi ba ilego ba e nea Lota?
  • Ke ka baka la’ng mosadi wa Lota a ile a fetoga sehlwaseeme sa letswai?
  • Re ka ithuta thuto efe go mosadi wa Lota?

Dipotšišo tša tlaleletšo

  • Bala Genesi 13:5-13.

    Re ka ithuta’ng go Aborahama mabapi le go rarolla mathata gare ga rena le batho ba bangwe? (Gen. 13:8, 9; Baroma 12:10; Bafil. 2:3, 4)

  • Bala Genesi 18:20-33.

    Tsela yeo Jehofa a ilego a dirišana le Aborahama ka yona e re kgonthišetša bjang gore Jehofa le Jesu ba tla re ahlola ka go loka? (Gen. 18:25, 26; Mat. 25:31-33)

  • Bala Genesi 19:1-29.

    Pego ye ya Beibele e re botša’ng mabapi le pono ya Modimo ka go ratana ga batho ba bong bjo bo swanago? (Gen. 19:5, 13; Lef. 20:13)

    Phapano ke efe tseleng yeo Lota le Aborahama ba ilego ba arabela ka yona tlhahlong ya Modimo, gona re ka ithuta’ng go se? (Gen. 19:15, 16, 19, 20; 22:3)

  • Bala Luka 17:28-32.

    Mosadi wa Lota o be a na le pono efe ka dilo tše di bonagalago, gomme se ke temošo bjang go rena? (Luka 12:15; 17:31, 32; Mat. 6:19-21, 25)

  • Bala 2 Petro 2:6-8.

    Go swana le Lota, re swanetše go lebelela bjang batho bao re phelago le bona bao ba sa ratego Modimo? (Hesek. 9:4; 1 Joh. 2:15-17)

Ithute ka mo go oketšegilego

Mosadi wa Lota o Fetoga Sehlwaseeme sa Letswai

Bala pego ye ya Beibele ke moka o thale godimo ga dikhutlo. O ka ithuta’ng go mosadi wa Lota?

Lota le Lapa la Gagwe—Kanegelo ya Diswantšho

Taonelouta mošomo wo gomme o bone seo o ka ithutago sona go Lota le lapa la gagwe.