Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 14: Modimo o Leka Tumelo ya Aborahama

Kgaolo 14: Modimo o Leka Tumelo ya Aborahama

NA O bona seo Aborahama a se dirago mo seswantšhong? O swere thipa gomme go bonagala eka o nyaka go bolaya morwa wa gagwe. Ke ka baka la’ng a ka dira seo? Sa pele, anke re bone kamoo Aborahama le Sara ba hweditšego morwa wa bona ka gona.

Aborahama o dira sehlabelo ka Isaka

Gopola gore Modimo o ile a ba holofetša gore ba be ba tla ba le morwa. Eupša seo se be se bonagala se ka se kgonege ka ge Aborahama le Sara ba be ba tšofetše kudu. Lega go le bjalo, Aborahama o be a dumela gore Modimo a ka kgona go dira selo seo se bonagalago se ka se kgonege. Ka gona go ile gwa direga’ng?

Go ile gwa feta ngwaga Modimo a ba holofeditše gore ba tla ba le morwa. Bjale ge Aborahama a be a na le nywaga e 100 gomme Sara a na le e 90, ba ile ba ba le ngwana wa mošemane ke moka ba mmitša Isaka. Modimo o be a bolokile kholofetšo ya gagwe!

Eupša ge Isaka a godile, Jehofa o ile a leka tumelo ya Aborahama. O ile a re go yena: “Aborahama!” Ke moka Aborahama a re: “Ke nna yo!” Modimo a re: ‘Tšea morwa wa gago yena yoo o tee e lego Isaka gomme o ye thabeng yeo ke tlago go go bontšha yona. Ge o fihla moo o mmolaye ke moka o ntirele sehlabelo ka yena.’

Mantšu ao a ile a kweša Aborahama bohloko ka ge a be a rata morwa wa gagwe kudu. Le gona gopola gore Modimo o be a holofeditše gore bana ba Aborahama ba be ba tla dula nageng ya Kanana. Eupša seo se be se tla direga bjang ge Isaka a be a ka hwa? Aborahama o be a sa kwešiše seo se bego se direga, eupša o ile a kwa Modimo.

Ge Aborahama a fihla thabeng yeo, o ile a tlema Isaka gomme a mmea aletareng yeo a bego a e agile. Ke moka a tšea thipa gore a mmolaye. Eupša ka yona nako yeo, morongwa wa Modimo a mmitša a re: “Aborahama, Aborahama!” Yena a araba a re: “Ke nna yo!”

Modimo a re: ‘O se ke wa bolaya mošemane yo, le gona o se ke wa mo dira selo le gatee. Bjale ke a tseba gore o na le tumelo go nna ka ge o se wa nkgana ka morwa wa gago, yena yo o tee.’

A tumelo e kgolo gakaakang yeo Aborahama a bego a na le yona go Modimo! O be a dumela gore ga go na seo se ka palelago Jehofa, le gore A ka kgona le go tsoša Isaka bahung. Eupša ga se gore Modimo o be a nyaka gore Aborahama a bolaye Isaka. Ka gona Modimo o ile a dira gore nku e tanywe ka dihlašaneng tša kgauswi le moo, ke moka a botša Aborahama gore a dire sehlabelo ka yona go e na le go se dira ka morwa wa gagwe.

Genesi 21:1-7; 22:1-18.



Dipotšišo

  • Modimo o ile a holofetša Aborahama eng, gona o ile a boloka kholofetšo yeo bjang?
  • Go etša ge go bontšhitšwe mo seswantšhong, Modimo o ile a leka tumelo ya Aborahama bjang?
  • Ke’ng seo Aborahama a ilego a se dira gaešita le ge a be a sa kwešiše lebaka la taelo ya Modimo?
  • Go ile gwa direga’ng ge Aborahama a be a ntšha thipa gore a bolaye morwa wa gagwe?
  • Tumelo ya Aborahama go Modimo e be e tiile gakaaka’ng?
  • Ke’ng seo Modimo a ilego a se nea Aborahama gore a dire sehlabelo ka sona, gona Modimo o ile a dira seo bjang?

Dipotšišo tša tlaleletšo

  • Bala Genesi 21:1-7.

    Ke ka baka la’ng Aborahama a ile a bolotša morwa wa gagwe ka letšatši la seswai? (Gen. 17:10-12; 21:4)

  • Bala Genesi 22:1-18.

    Isaka o ile a bontšha bjang gore o hlompha Aborahama tatagwe, gomme se se ile sa swantšhetša bjang tiragalo ya bohlokwa kudu yeo e bego e sa tlo direga? (Gen. 22:7-9; 1 Bakor. 5:7; Bafil. 2:8, 9)

Ithute ka mo go oketšegilego

Aborahama—“Tatago Bohle Bao ba Nago le Tumelo”

Aborahama o bontšhitše tumelo bjang? O ka rata go ekiša tumelo ya Aborahama ka ditsela dife?