Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 13: Aborahama —Mogwera wa Modimo

Kgaolo 13: Aborahama —Mogwera wa Modimo

NAGA e nngwe yeo batho ba ilego ba yo dula go yona ka morago ga Meetsefula e be e bitšwa Uri. E ile ya ba motse o mogolo wo o bego o na le dintlo tše dibotse. Eupša batho ba moo ba be ba rapela medimo ya maaka. Se ke seo ba bego ba se dira le kua Babele. Batho ba Uri le Babele ba be ba sa swane le Noa le morwa wa gagwe Sheme, bao ba ilego ba tšwela pele ba hlankela Jehofa.

Mafelelong, ka morago ga nywaga e 350 meetsefula a fetile, Noa yo a botegago o ile a hwa. E bile feela ka morago ga nywaga e mebedi moo monna yo o mmonago mo seswantšhong a ilego a belegwa. Modimo o be a mo rata kudu. Leina la gagwe e be e le Aborahama. O be a dula le lapa la gagwe motseng woo wa Uri.

Aborahama o lebeletše dinaledi

Ka letšatši le lengwe, Jehofa o ile a re go Aborahama: ‘Tloga Uri le go metswalo ya gago o ye nageng yeo ke tlago go go bontšha yona.’ Na Aborahama o ile a theetša Modimo gomme a tlogela dilo ka moka tše dibotse tša Uri? Ee. Le gona Aborahama o ile a tsebja e le mogwera wa Modimo ka ge ka mehla a be a ekwa Modimo.

Ba bangwe ba lapa la Aborahama ba ile ba tloga le yena Uri. Tatagwe e lego Thera o ile a tloga le yena. Lota e lego morwa wa ngwanabo le yena o ile a dira bjalo. Sara mosadi wa Aborahama le yena o ile a tloga. Mafelelong ka moka ga bona ba ile ba fihla nageng yeo e bitšwago Harane, moo Thera a ilego a hwela gona. Ba be ba le kgole kudu le Uri.

Ka morago ga nako e itšego, Aborahama le lapa la gagwe ba ile ba tloga Harane gomme ba tla nageng yeo e bitšwago Kanana. Ge a le moo, Jehofa o ile a re go yena: ‘Ye ke naga yeo ke tlago go e nea bana ba gago.’ Aborahama o ile a dula Kanana ka ditenteng.

Modimo o ile a thuša Aborahama moo a ilego a ba le mehlape e mentši ya dinku le ya diruiwa tše dingwe gotee le bahlanka ba bantši. Eupša Aborahama le Sara ba be ba se na bana.

Ge Aborahama a be a na le nywaga e 99, Jehofa o ile a re go yena: ‘Ke go holofetša gore o tla ba tatago ditšhaba tše dintši.’ Eupša se se be se tla kgonega bjang ka ge Aborahama le Sara ba be ba šetše ba tšofetše kudu gore ba ka ba le ngwana?

Genesi 11:27-32; 12:1-7; 17:1-8, 15-17; 18:9-19.



Dipotšišo

  • Ke batho ba mohuta mang bao ba bego ba dula motseng wa Uri?
  • Monna yo a lego mo seswantšhong ke mang, o belegwe neng, gona o be a dula kae?
  • Ke’ng seo Modimo a ilego a botša Aborahama gore a se dire?
  • Ke ka baka la’ng Aborahama a be a bitšwa mogwera wa Modimo?
  • Ke bomang bao ba ilego ba sepela le Aborahama ge a be a tloga Uri?
  • Ke’ng seo Modimo a ilego a se botša Aborahama ge a fihla nageng ya Kanana?
  • Ke’ng seo Modimo a ilego a se holofetša Aborahama ge a be a na le nywaga e 99?

Dipotšišo tša tlaleletšo

  • Bala Genesi 11:27-32.

    Aborahama le Lota ba be ba tswalana bjang? (Gen. 11:27)

    Gaešita le ge go thwe Thera ke yena yo a ilego a hudušetša lapa la gagwe kgauswi le Kanana, re tseba bjang gore ge e le gabotse ke Aborahama yo a ilego a tla ka kgopolo ye, gona ke ka baka la’ng a ile a dira bjalo? (Gen. 11:31; Dit. 7:2-4)

  • Bala Genesi 12:1-7.

    Jehofa o ile a godiša kgwerano ya Aborahama bjang ka morago ga gore Aborahama a fihle nageng ya Kanana? (Gen. 12:7)

  • Bala Genesi 17:1-8, 15-17.

    Leina la Aborama le ile la fetošwa gore e be mang ge a be a na le nywaga e 99, gona ka baka la’ng? (Gen. 17:5)

    Ke ditšhegofatšo dife tšeo Jehofa a ilego a di holofetša Sara? (Gen. 17:15, 16)

  • Bala Genesi 18:9-19.

    Ke boikarabelo bofe bjo bo neilwego botate go Genesi 18:19? (Doit. 6:6, 7; Baef. 6:4)

    Ke phihlelo efe ya Sara yeo e bontšhago gore ga go na selo seo re ka se utelago Jehofa? (Gen. 18:12, 15; Ps. 44:21)