Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 12: Batho ba Aga Tora e Kgolo

Kgaolo 12: Batho ba Aga Tora e Kgolo

GO ILE gwa feta nywaga e mentši. Barwa ba Noa ba ile ba ba le bana ba bantši. Le gona bana ba bona ba ile ba gola gomme le bona ba ba le bana ba bantši. Go se go ye kae go be go na le batho ba bantši mo lefaseng.

Yo mongwe wa batho bao e be e le Nimirode setlogolo sa Noa. E be e le motho yo mobe yo a bego a tsoma le go bolaya diphoofolo gotee le batho. Le gona Nimirode o ile a itira kgoši e le gore a tle a buše batho ba bangwe. Modimo o be a sa rate Nimirode.

Ka nako yeo, batho ka moka ba be ba bolela leleme letee. Nimirode o be a nyaka gore batho ka moka ba dule felo gotee gore a tle a ba buše. Na o tseba seo a ilego a se dira? O ile a botša batho gore ba age motse le tora e kgolo go wona. Ba bone mo seswantšhong ge ba dira ditena.

Jehofa Modimo o be a sa thabišwe ke go agwa ga moago wo. Modimo o be a nyaka gore batho ba gašane gomme ba dule lefaseng ka moka. Eupša batho bao ba ile ba re: ‘Tlang re ikageleng motse le tora e telele yeo ntlha ya yona e fihlago magodimong. Ke moo re tlago go tuma!’ Batho ba be ba inyakela botumo, e sego go tumiša Modimo.

Ka gona Modimo o ile a dira gore batho bao ba tlogele go aga tora yeo. Na o a tseba gore o ile a dira seo bjang? O ile a dira gore gateetee batho bao ba bolele maleme a sa swanego, go e na le go bolela leleme letee. Baagi ba motse woo ba ile ba se sa kwana ka polelo. Ke ka baka leo motse woo wa bona o ilego wa bitšwa Babele goba Babilona, e lego leina leo le bolelago gore, “Tharano.”

Bjale batho bao ba ile ba thoma go tloga Babele. Batho bao ba bolelago leleme le le swanago ba ile ba tloga ba yo dula gotee dikarolong tše dingwe tša lefase.

Genesi 10:1, 8-10; 11:1-9.

Bašomi ba aga tora e kgolo


Dipotšišo

  • Nimirode e be e le mang, gomme Modimo o be a ikwa bjang ka yena?
  • Mo seswantšhong, ke ka baka la’ng batho ba ba be ba dira ditena?
  • Ke ka baka la’ng Jehofa a be a sa thabišwe ke modiro wo wa go aga?
  • Modimo o ile a dira’ng gore batho ba ba tlogele go aga tora ye?
  • Motse wo o be o bitšwa eng, gona leina leo le be le bolela gore’ng?
  • Go ile gwa direga’ng ka morago ga gore Modimo a raranye leleme la bona?

Dipotšišo tša tlaleletšo

  • Bala Genesi 10:1, 8-10.

    Nimirode o ile a bontšha dika dife, gomme se se re nea temošo efe? (Die. 3:31)

  • Bala Genesi 11:1-9.

    Ke ka baka la’ng batho ba be ba aga tora ye, gona ke ka baka la’ng modiro wo o be o ka se atlege? (Gen. 11:4; Die. 16:18; Joh. 5:44)