Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 11: Molalatladi wa Pele

Kgaolo 11: Molalatladi wa Pele

NA O tseba selo sa pele seo Noa a ilego a se dira ge yena le ba lapa la gagwe ba tšwile ka arekeng? O ile a neela Modimo sebego goba mpho. O ka mmona ge a dira se seswantšhong seo se lego ka mo tlase. Noa o ile a neela Modimo mpho ye ya diphoofolo go mo leboga ge a phološitše lapa la gagwe meetsefuleng a magolo.

Areka le molalatladi

Na o nagana gore Jehofa o ile a thabišwa ke mpho yeo? Ee, e ile ya mo thabiša. Ka gona o ile a holofetša Noa gore a ka se tsoge a fedišitše lefase gape ka meetsefula.

Go se go ye kae, naga ka moka ke ge e omile gomme Noa le ba lapa la gagwe ba thoma go phela bophelo bjo bofsa ka ntle ga areka. Modimo o ile a ba šegofatša gomme a re go bona: ‘Le be le bana ba bantši. Le ate go fihlela batho ba dula lefaseng ka moka.’

Eupša ka morago ge batho ba be ba tlo kwa ka meetsefula ao a magolo, ba be ba ka tšhoga gore meetsefula a swanago le ao a be a ka ba gona gape. Ka gona Modimo o ile a nea batho selo seo se bego se tla ba gopotša kholofetšo ya gagwe ya gore a ka se tsoge a fedišitše lefase gape ka meetsefula. Na o tseba selo seo a ilego a ba nea sona go ba gopotša kholofetšo yeo? O ile a ba nea molalatladi.

Noa le lapa la gagwe

Gantši molalatladi o bonwa leratadimeng ge letšatši le hlabile ka morago ga ge pula e nele. Melalatladi e na le mebala e mentši e mebotse. Na o kile wa bona molalatladi? Na o a o bona wo o lego mo seswantšhong?

Modimo o ile a re: ‘Ke holofetša gore batho ka moka le diphoofolo ba ka se tsoge ba fedišitšwe gape ka meetsefula. Ke bea molalatladi wa ka marung. E tla re ge molalatladi o tšwelela, ka o bona gomme ka gopola kholofetšo ye ya ka.’

Ka gona, ke eng seo o swanetšego go se gopola ge o bona molalatladi? Ee, o swanetše go gopola kholofetšo ya Modimo ya gore a ka se tsoge a fedišitše lefase gape ka meetsefula.

Genesi 8:18-22; 9:9-17.



Dipotšišo

  • Go etša ge go bontšhitšwe mo seswantšhong, ke selo sefe sa pele seo Noa a ilego a se dira ge a tšwile ka arekeng?
  • Ke taelo efe yeo Modimo a ilego a e nea Noa le lapa la gagwe ka morago ga Meetsefula?
  • Modimo o ile a holofetša eng?
  • Re swanetše go gopola’ng ge re bona molalatladi?

Dipotšišo tša tlaleletšo

  • Bala Genesi 8:18-22.

    Rena lehono re ka nea Jehofa “monko o bose” bjang? (Gen. 8:21; Baheb. 13:15, 16)

    Jehofa o ile a lemoga eng ka seo se lego ka pelong ya motho, gona re swanetše go itiša malebana le eng? (Gen. 8:21; Mat. 15:18, 19)

  • Bala Genesi 9:9-17.

    Ke kgwerano efe yeo Jehofa a e dirilego le diphedi ka moka tša mo lefaseng? (Gen. 9:10, 11)

    Kgwerano ya molalatladi e tla šoma go fihlela neng? (Gen. 9:16)

Ithute ka mo go oketšegilego

Noa o Ile a ‘Lotwa le ba Bangwe ba Šupago’

Noa le ba lapa la gagwe ba ile ba kgotlelela bjang nakong ya mathata a magolo kudu ao a kilego a wela batho?