Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 32: Dikotlo tše 10

Kgaolo 32: Dikotlo tše 10

LEBELELA diswantšho tše. Se sengwe le se sengwe se bontšha kotlo yeo Jehofa a ilego a e tliša Egipita. Seswantšhong sa pele o ka bona Arone a itia Noka ya Nile ka lepara la gagwe. Ge a dirile bjalo, meetse a noka yeo a ile a fetoga madi. Dihlapi tša ka moo nokeng di ile tša hwa gomme noka ya thoma go nkga.

Dikotlo tša Baegipita

Ke moka Jehofa o ile a dira gore digwagwa di tšwe Nokeng ya Nile. Di be di le gohle—ka diobeneng, ka dipaneng le malaong—kae le kae. Ge digwagwa tšeo di hwile, Baegipita ba ile ba di kgobela ya ba mekgobo e megolo gomme naga ya nkga ka baka la tšona.

Ka morago ga moo, Arone o ile a itia mmu ka lepara la gagwe gomme lerole la fetoga menang. Menang ke dikhunkhwane tše dingwe tše dinyenyane tša go loma. Menang e bile kotlo ya boraro nageng ya Egipita.

Dikotlo tše dingwe tšeo di ilego tša latela di ile tša tlaiša Baegipita feela, e sego Baisiraele. Kotlo ya bone e bile ya dintšhi tše dikgolo tšeo di ilego tša tlala ka dintlong ka moka tša Baegipita. Kotlo ya bohlano e ile ya hlasela diruiwa. Dikgomo, dinku le dipudi tše dintši tša Baegipita di ile tša hwa.

Bjale Moshe le Arone ba ile ba tšea molora ba o gašetša godimo. Ka go re’alo ba dira gore dišo tše šoro di tšwe batho le diphoofolo. Ye e be e le kotlo ya botshelela.

Ka morago ga kotlo yeo, Moshe o ile a otlollela seatla sa gagwe godimo gomme Jehofa a romela pula ya magadima le sefako. E be e le sefako se segolo kudu seo se sa kago sa bonwa Egipita.

Kotlo ya seswai e be e le ya ditšie. Go be go se gwa ka gwa ba le ditšie tše dintši ka tsela yeo. Di ile tša ja dimela tšohle tšeo sefako se bego se di šadišitše.

Kotlo ya senyane e be e le ya leswiswi. Leswiswi le leso le ile la aparela naga ka matšatši a mararo, eupša Baisiraele bona ba be ba na le seetša moo ba bego ba dula gona.

Mafelelong, Modimo o ile a botša batho ba gagwe gore ba gaše madi a putšanyana goba a kwana diforeimeng tša mejako ya dintlo tša bona. Ke moka morongwa wa Modimo o ile a feta Egipita. Ge morongwa a be a bona madi ao, o be a sa bolaye motho ka ntlong yeo. Eupša dintlong ka moka tšeo go tšona go bego go se na madi diforeimeng, morongwa yoo o ile a bolaya maitšibulo a batho le a diphoofolo. Ye e be e le kotlo ya lesome.

Ka morago ga kotlo yeo ya mafelelo, Farao o ile a botša Baisiraele gore ba tloge. Batho ba Modimo ka moka ba be ba itokišeleditše go tloga gomme bjona bošegong bjoo ba ile ba thoma leeto la bona la go tšwa Egipita.

Ekisodo dikgaolo 7 go ya go 12.



Dipotšišo

  • O diriša diswantšho tše di bontšhitšwego mo, hlalosa dikotlo tše tharo tša mathomo tšeo Jehofa a ilego a di tliša Egipita.
  • Phapano e be e le efe magareng ga dikotlo tše tharo tša mathomo le dikotlo tše dingwe ka moka?
  • Hlalosa kotlo ya bone, ya bohlano le ya botshelela.
  • Hlalosa kotlo ya bošupa, ya seswai le ya senyane.
  • Ke’ng seo Jehofa a ilego a botša Baisiraele gore ba se dire pele ga kotlo ya lesome?
  • Kotlo ya lesome e bile efe, gomme go ile gwa direga’ng ka morago ga yona?

Dipotšišo tša tlaleletšo

  • Bala Ekisodo 7:19-8:19

    Gaešita le ge boramalea ba Egipita ba ile ba kgona go ekiša dikotlo tše pedi tša pele tša Jehofa, ke eng seo ba ilego ba gapeletšega go se amogela ka morago ga kotlo ya boraro? (Ek. 8:18, 19; Mat. 12:24-28)

    Kotlo ya bone e ile ya bontšha bjang gore Jehofa o kgona go šireletša batho ba gagwe, gomme go tseba se go dira gore batho ba Modimo ba ikwe bjang ge ba lebeletšane le ‘masetlapelo a magolo’ ao a boletšwego e sa le pele? (Ek. 8:22, 23; Kut. 7:13, 14; 2 Dikor. 16:9)

  • Bala Ekisodo 8:24; 9:3, 6, 10, 11, 14, 16, 23-25 le 10:13-15, 21-23.

    Ke dihlopha dife tše pedi tša batho tšeo di ilego tša pepentšhwa ke Dikotlo tše Lesome, gona se se kgoma bjang pono ya rena ka dihlopha tšeo tše pedi lehono? (Ek. 8:10, 18, 19; 9:14)

    Ekisodo 9:16 e re thuša bjang go kwešiša lebaka leo ka lona Jehofa a dumeletšego Sathane gore a be gona go fihlela gona bjale? (Baroma 9:21, 22)

  • Bala Ekisodo 12:21-32.

    Paseka e ile ya dira bjang gore batho ba bantši ba kgone go phologa, gona e be e swantšhetša eng? (Ek. 12:21-23; Joh. 1:29; Baroma 5:18, 19, 21; 1 Bakor. 5:7)

Ithute ka mo go Oketšegilego

MEŠOMO YA BORAPEDI BJA LAPA

Modimo o Roma Moshe Egipita

Moshe le Arone ba ile ba bontšha sebete ge ba be ba bolela le Farao yo matla. Taoneloutang mešomo ye gomme le e ahlaahle le le lapa.