Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 29: Lebaka la Gore Moshe a Tšhabe

Kgaolo 29: Lebaka la Gore Moshe a Tšhabe

BONA Moshe mo seswantšhong ge a tšhaba Egipita. Na o a ba bona banna bao ba mo rakedišago? Na o a tseba gore ke ka baka la’ng ba nyaka go mmolaya? Anke re bone ge e ba re ka hwetša karabo.

Moshe o tšhaba Egipita

Moshe o goletše ntlong ya Farao, mmuši wa Egipita. O ile a ba monna yo bohlale kudu le wa maemo. Moshe o be a tseba gore ga se yena Moegipita, eupša seo a bego a se tseba ke gore batswadi ba gagwe ba kgonthe e be e le Baisiraele ba makgoba.

Ka letšatši le lengwe ge Moshe a be a na le nywaga e 40, o ile a yo bona kamoo batho ba gabo ba bego ba phela ka gona. Ba be ba swerwe ka tsela e kwešago bohloko kudu. O ile a bona Moegipita yo mongwe a itia lekgoba la Moisiraele. Moshe o ile a lebelela thoko tšohle gomme ge a bona gore ga go na motho yo a mmonago, a itia Moegipita yoo a mmolaya. Ke moka a epela setopo sa Moegipita yoo lešabašabeng.

Letšatšing le le latelago, Moshe o ile a tšwa gore a yo bona batho ba gabo gape. O be a nagana gore a ka ba thuša gore e se sa hlwa e eba makgoba. Eupša a bona banna ba babedi ba Baisiraele ba elwa ke moka a bolela le yo a bego a fošitše a re: ‘Go re’ng o itia ngwaneno?’

Monna yoo a re: ‘Ke mang yo a go beilego gore o be mmuši le moahlodi wa rena? Na o tlo mpolaya go etša ge o bolaile Moegipita yola?’

Bjale Moshe o ile a thoma go tšhoga. A lemoga gore batho ba be ba tseba seo a se dirilego Moegipita yola. Farao le yena o ile a tseba ka seo gomme a romela banna gore ba yo bolaya Moshe. Ke ka baka leo Moshe a ilego a swanelwa ke go tšhaba Egipita.

Ge Moshe a be a tloga Egipita, o ile a ya nageng ya kgole ya Midiane. Ge a fihla moo, a dula le lapa la Jethero ke moka a nyala yo mongwe wa barwedi ba gagwe yo a bitšwago Tsipora. Moshe e ile ya ba modiši gomme a hlokomela dinku tša Jethero. O ile a dula Midiane nywaga e 40. Ga bjale o be a na le nywaga e 80. Ke moka ka letšatši le lengwe ge Moshe a sa dišitše dinku tša Jethero, go ile gwa direga selo se itšego se se makatšago seo se ilego sa fetoša bophelo bja gagwe ka moka. Anke re bone gore selo se seo se makatšago e be e le eng.

Ekisodo 2:11-25; Ditiro 7:22-29.



Dipotšišo

  • Moshe o goletše kae, eupša ke eng seo a bego a se tseba ka batswadi ba gagwe?
  • Moshe o ile a dira’ng ge a be a na le nywaga e 40?
  • Ke’ng seo Moshe a ilego a se botša monna wa Moisiraele yo a bego a elwa le Moisiraele yo mongwe, gona monna yoo o ile a mo araba bjang?
  • Ke ka baka la’ng Moshe a ile a tšhaba Egipita?
  • Moshe o ile a tšhabela kae, gomme o ile a dula ga mang moo?
  • Ke’ng seo Moshe a ilego a se dira nywageng e 40 ka morago ga gore a tšhabe Egipita?

Dipotšišo tša tlaleletšo

  • Bala Ekisodo 2:11-25.

    Go sa šetšwe nywaga ka moka yeo Moshe a e feditšego a ithuta bohlale bja Baegipita, o ile a bontšha bjang gore o botegela Jehofa le batho ba gagwe? (Ek. 2:11, 12; Baheb. 11:24)

  • Bala Ditiro 7:22-29.

    Re ka ithuta’ng tabeng ya gore Moshe o ile a leka go phološa Baisiraele bokgobeng bja Egipita ka boyena? (Dit. 7:23-25; 1 Pet. 5:6, 10)