Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 28: Kamoo Moshe a Phološitšwego ka Gona

Kgaolo 28: Kamoo Moshe a Phološitšwego ka Gona

BONA lesea le leo le llago e bile le swere monwana wa kgarebe. Lesea le ke Moshe. Na o a tseba gore kgarebe ye e botse ke mang? Ke kgošigatšana ya Egipita, morwedi wa Farao.

Morwedi wa Farao o hwetša Moshe

Mmago Moshe o ile a uta lesea le la gagwe go fihlela le na le dikgwedi tše tharo, ka gobane o be a sa nyake gore le bolawe ke Baegipita. Eupša a lemoga gore Moshe a ka tla a hwetšwa, ka go re’alo a dira selo se se latelago gore a mo phološe.

O ile a tšea sešegwana sa mahlaka a se bitiela ka sekontiri le moti gore meetse a se ke a tsena ka go sona. Ke moka a tsenya Moshe ka go sona, a ya a se bea gare ga mabjang a matelele go bapa le Noka ya Nile. Kgaetšedi ya Moshe e lego Miriamo o ile a botšwa gore a emele kgojana gore a bone seo se tlago go diragalela Moshe.

Go se go ye kae, morwedi wa Farao o ile a theogela Nokeng ya Nile go yo hlapa. Gateetee a bona sešegwana ka gare ga mabjang a matelele. A re go yo mongwe wa makgoba a gagwe a basadi: ‘Eya o yo ntšeela sešegwana sela.’ Ge kgošigatšana yeo e se bula, ya bona ngwana yo mobotse kudu! Moshe o be a lla gomme kgošigatšana yeo ya mo šokela. Ya se nyake gore Moshe a bolawe.

Ke moka Miriamo o ile a batamela. O ka mmona mo seswantšhong. Miriamo o ile a botšiša morwedi wa Farao a re: ‘Na nka ya go go biletša mosadi wa Moisiraele gore a tle a go amušetše ngwana yo?’

Kgošigatšana yeo ya re: ‘Ee, eya.’

Gateetee Miriamo a kitima a yo bitša mmagwe. Ge mmago Moshe a fihlile go kgošigatšana ye, ya re go yena: ‘Tšea ngwana yo o yo nkamušetša yena, nna ke tla go lefa.’

Ka gona mmago Moshe o ile a hlokomela ngwana wa gagwe. Ka morago ge Moshe a godile, mmagwe o ile a mo iša go morwedi wa Farao yo a ilego a mo tšea ya ba morwa wa gagwe. Ke kamoo Moshe a ilego a golela ntlong ya Farao.

Ekisodo 2:1-10.



Dipotšišo

  • Ngwana yo a lego mo seswantšhong ke mang, gomme o swere monwana wa mang?
  • Ke’ng seo mmago Moshe a ilego a se dira go mo phološa gore a se ke a bolawa?
  • Ngwanenyana yo monyenyane yo a lego mo seswantšhong ke mang, gona o ile a dira’ng?
  • Ge morwedi wa Farao a be a hwetša ngwana yo, Miriamo o ile a šišinya gore go dirwe eng?
  • Ke’ng seo morwedi wa Farao a ilego a se botša mmago Moshe?

Potšišo ya tlaleletšo

  • Bala Ekisodo 2:1-10.

    Ke sebaka sefe seo mmago Moshe a bilego le sona sa go tlwaetša le go ruta Moshe ge e be e sa le ngwana, gona se se beetše batswadi mohlala ofe lehono? (Ek. 2:9, 10; Doit. 6:6-9; Die. 22:6; Baef. 6:4; 2 Tim. 3:15)

Ithute ka mo go oketšegilego

Moshe o Golela Egipita

Re ka ithuta’ng go Moshe ge e be e sa le yo monyenyane kua Egipita? Taonelouta mešongwana ye gomme le e ahlaahle le lapa.