Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 27: Kgoši e Mpe e Buša Egipita

Kgaolo 27: Kgoši e Mpe e Buša Egipita

BANNA bao o ba bonago mo seswantšhong ba gapeletša batho go šoma. Bona monna yo a itiago mošomi yo mongwe ka sefepi! Bašomi ba ke ba lapa la Jakobo gomme ba bitšwa Baisiraele. Banna bao ba ba gapeletšago go šoma ke Baegipita. Baisiraele ba ile ba fetoga makgoba a Baegipita. Se se diregile bjang?

Baegipita ba tlaiša Baisiraele

Lapa le legolo la Jakobo le ile la dula ka khutšo Egipita ka nywaga e mentši. Josefa, yoo a bego a latela kgoši Farao ka maemo kua Egipita, o be a ba hlokometše. Eupša Josefa o ile a hwa. Bjale Farao yo mongwe yo a bego a sa tšwa go bewa sedulong sa bogoši, yo a bego a sa rate Baisiraele, o ile a ba kgoši ya Egipita.

Ka gona Farao yo yo mobe o ile a dira Baisiraele makgoba. A ba beela balaodi bao ba bego ba ba hloile e bile ba le sehlogo. Ba gapeletša Baisiraele go šoma ka thata gore ba agele Farao metse. Go dutše go le bjalo, Baisiraele ba ile ba tšwela pele ba ata. Ka morago ga nako e itšego, Baegipita ba ile ba boifa gore Baisiraele e tla ba ba bantšintši le go ba ba matla kudu.

Baegipita ba tlaiša Baisiraele

Na o a tseba gore Farao o ile a dira’ng? O ile a bolela le basadi bao ba bego ba thuša bomma ba Baisiraele go belega, a re go bona: ‘Le bolayeng bana ka moka ba bašemane bao ba belegwago.’ Eupša basadi bao ba be ba lokile, ka gona ga se ba ka ba bolaya bana bao.

Bjale Farao o ile a laela setšhaba sa gagwe ka moka a re: ‘Tšeang bana ka moka ba Baisiraele ba bašemane gomme le ba bolayeng. Eupša bana ba banenyana le se ke la ba bolaya.’ Na seo e be e se selo se sebe kudu gore a laele gore se dirwe? Anke ga bjale re bone kamoo yo mongwe wa bana bao ba bašemane a ilego a phološwa ka gona.

Ekisodo 1:6-22.



Dipotšišo

  • Banna bao ba swerego difepi mo seswantšhong ke bomang, gona ba itia bomang?
  • Ka morago ga ge Josefa a hwile, ke eng seo se ilego sa diragalela Baisiraele?
  • Ke ka baka la’ng Baegipita ba ile ba boifa Baisiraele?
  • Ke taelo efe yeo Farao a ilego a e nea basadi bao ba bego ba thuša basadi ba Baisiraele go belega?

Dipotšišo tša tlaleletšo

  • Bala Ekisodo 1:6-22.

    Jehofa o ile a thoma go phethagatša bjang seo a bego a se holofeditše Aborahama? (Ek. 1:7; Gen. 12:2; Dit. 7:17)

    Babelegiši ba Baheberu ba ile ba bontšha bjang gore ba be ba lebelela bophelo e le bjo bokgethwa? (Ek. 1:17; Gen. 9:6)

    Babelegiši bao ba ile ba putswa bjang ka baka la go botegela ga bona Jehofa? (Ek. 1:20, 21; Die. 19:17)

    Sathane o ile a leka bjang go šitiša morero wa Jehofa mabapi le Peu e holofeditšwego ya Aborahama? (Ek. 1:22; Mat. 2:16)