Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 16: Isaka o Hwetša Mosadi wa go Loka

Kgaolo 16: Isaka o Hwetša Mosadi wa go Loka

NA O a tseba gore mosadi yo a lego mo seswantšhong se ke mang? Leina la gagwe ke Rebeka. Monna yo a tlogo gahlana le yena ke Isaka. Rebeka e tlo ba mosadi wa Isaka. Se se diregile bjang?

Aborahama e lego tatago Isaka o be a nyaka go hweletša morwa wa gagwe mosadi wa go loka. O be a sa nyake gore Isaka a nyale yo mongwe wa basadi ba Kanana ka gobane batho ba moo ba be ba rapela medimo ya maaka. Ka gona Aborahama o ile a bitša mohlanka wa gagwe a re go yena: ‘Ke nyaka gore o ye Harane moo metswalo ya ka e dulago gona gomme o hweletše morwa wa ka Isaka mosadi.’

Gateetee mohlanka yoo wa Aborahama o ile a tšea dikamela tše lesome gomme a sepela leeto le letelele. Ge a fihla kgauswi le lefelo leo metswalo ya Aborahama e bego e dula go lona, a ema sedibeng. E be e le mantšiboa, ka nako yeo basadi ba motse ba bego ba etla go ga meetse sedibeng. Ka gona mohlanka wa Aborahama a rapela Jehofa a re: ‘Anke mosadi yo a tlago go nkgela meetse a gela le dikamela tša ka e be yena yo o mo kgethago go ba mosadi wa Isaka.’

Rebeka o kopana le Isaka

Go se go ye kae, Rebeka o ile a tla go ga meetse. Ge mohlanka yoo a mo kgopela gore a mo nweše meetse, o ile a mo nweša. Ke moka a ya a gela dikamela ka moka meetse go fihlela di kgotšwe. Woo e be e le mošomo o thata ka gobane dikamela di nwa meetse a mantši.

Ge Rebeka a feditše go dira se, mohlanka wa Aborahama o ile a mmotšiša leina la tatagwe. Le gona a mmotšiša ge e ba a ka robala ga gabo. Rebeka o ile a re: ‘Tate ke Bethuele, le gona re na le mo o ka robalago gona.’ Mohlanka wa Aborahama o be a tseba gore Bethuele e be e le morwa wa Nahoro ngwanabo Aborahama. Ka gona a khunama a leboga Jehofa ka ge a mo išitše metswalong ya Aborahama.

Wona mantšiboeng ao, mohlanka wa Aborahama o ile a botša Bethuele le Labane kgaetšedi ya Rebeka lebaka leo a tlilego ka lona. Bobedi bja bona ba ile ba dumela gore Rebeka a sepele le yena gomme a nyalwe ke Isaka. Rebeka o ile a re’ng ge ba be ba mmotšiša gore na o tla rata go sepela? O ile a re: ‘Ee,’ o tla rata go sepela. Ka gona, letšatšing le le latelago ba namela dikamela gomme ba thoma leeto le letelele la go boela Kanana.

E be e le mantšiboa ge ba fihla. Rebeka o ile a bona monna yo mongwe a itshepelela nageng. E be e le Isaka. O ile a thaba ge a bona Rebeka. Mmagwe e lego Sara o be a hwile nywageng e meraro e fetilego, ka gona o be a sa kwešitšwe bohloko ke seo. Eupša Isaka o ile a rata Rebeka kudu gomme a boela a thaba.

Genesi 24:1-67.



Dipotšišo

  • Monna le mosadi bao ba lego mo seswantšhong ke bomang?
  • Aborahama o ile a dira’ng gore a hweletše morwa wa gagwe mosadi, gona ka baka la’ng?
  • Thapelo ya mohlanka wa Aborahama e ile ya arabja bjang?
  • Rebeka o ile a re’ng ge a be a botšišwa gore na o tla rata go nyalwa ke Isaka?
  • Ke’ng seo se ilego sa dira gore Isaka a boele a thabe?

Dipotšišo tša tlaleletšo

  • Bala Genesi 24:1-67.

    Ke mekgwa efe e mebotse yeo Rebeka a ilego a e bontšha ge a be a kopana le mohlanka wa Aborahama sedibeng? (Gen. 24:17-20; Die. 31:17, 31)

    Seo Aborahama a ilego a se direla Isaka se beetše Bakriste mohlala ofe o mobotse lehono? (Gen. 24:37, 38; 1 Bakor. 7:39; 2 Bakor. 6:14)

    Ke ka baka la’ng re swanetše go ipha nako ya go naganišiša, go etša ge Isaka a ile a dira? (Gen. 24:63; Ps. 77:12; Bafil. 4:8)

Ithute ka mo go oketšegilego

RUTA BANA BA GAGO

Rebeka o be a Nyaka go Thabiša Jehofa

Re ka dira eng gore re swane le Rebeka? Bala taba ye gore o ithute ka yena.