Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya ka ya Ditaba tša Beibele

Kgaolo 9: Noa o Aga Areka

Kgaolo 9: Noa o Aga Areka
Batho ba sega Noa

NOA o be a na le mosadi le barwa ba bararo. Maina a barwa ba gagwe e be e le Sheme, Hama le Jafete. Yo mongwe le yo mongwe wa barwa ba o be a na le mosadi. Ka go re’alo, go be go na le batho ba seswai lapeng la Noa.

Bjale Modimo o ile a laela Noa gore a dire selo seo se sa tlwaelegago. O ile a mmotša gore a age areka e kgolo. E be e lekana le sekepe ka bogolo, eupša e swana le lepokisi le legolo le le letelele. Modimo o ile a re: ‘E dire gore e be le mabato a mararo gomme o age diphapoši ka gare ga yona.’ Diphapoši tšeo e be e le tša gore go dule Noa, lapa la gagwe, diphoofolo le go bea dijo tša bona le tša diphoofolo.

Le gona Modimo o ile a botša Noa gore a e manege ka moti ka gare le ka ntle e le gore meetse a se ke a tsena ka go yona. Modimo a re go yena: ‘Ke tlo tliša meetsefula gomme ka fediša lefase ka moka. Selo se sengwe le se sengwe seo se sego ka arekeng se tlo hwa.’

Noa le barwa ba gagwe ba ile ba kwa Jehofa gomme ba thoma go aga areka. Eupša batho ba bangwe ba ile ba fo sega. Ba ile ba tšwela pele ba dira dilo tše mpe. Batho ka moka ba ile ba se dumele Noa ge a be a ba botša seo Modimo a bego a tla se dira.

Lapa la Noa le tsenya diphoofolo le dijo ka arekeng

Go ile gwa tšea nako e telele go aga areka ka gobane e be e le e kgolo kudu. Mafelelong ya fela ka morago ga nywaga e mentši. Bjale Modimo o ile a botša Noa gore a tsenye diphoofolo ka arekeng. Modimo a re a tsenye mehuta e mengwe ya diphoofolo ka dipedi ka dipedi, e tona le e tshadi. Eupša Modimo o ile a botša Noa gore go mehuta e mengwe ya diphoofolo a tsenye tše šupago. Le gona Modimo a mmotša gore a tsenye mehuta ka moka ya dinonyana. Noa a dira tšohle tšeo Modimo a mo laetšego tšona.

Ka morago ga moo, Noa le lapa la gagwe le bona ba ile ba tsena ka arekeng. Ke moka Modimo a tswalela mojako. Noa le lapa la gagwe ba leta ka gare ga areka. Nagana o le ka moo arekeng o na le bona le letile. Na ruri go be go tla ba le meetsefula go etša ge Modimo a be a boletše?

Genesi 6:9-22; 7:1-9.



Dipotšišo

  • Lapa la Noa le be le na le ditho tše kae, gomme maina a barwa ba gagwe ba bararo e be e le bomang?
  • Ke selo sefe se se sa tlwaelegago seo Modimo a ilego a kgopela Noa gore a se dire, gona ka baka la’ng?
  • Batho bao Noa a bego a phela le bona ba ile ba arabela bjang ge a be a ba botša ka areka?
  • Modimo o ile a botša Noa gore a dire’ng ka diphoofolo?
  • Ke’ng seo Noa le lapa la gagwe ba ilego ba swanelwa ke go se dira ka morago ga gore Jehofa a tswalele mojako wa areka?

Dipotšišo tša tlaleletšo

  • Bala Genesi 6:9-22.

    Ke’ng seo se ilego sa dira gore Noa e be mohlala o mobotse kudu wa morapedi wa Modimo wa therešo? (Gen. 6:9, 22)

    Jehofa o ikwa bjang ka bošoro, gona se se swanetše go re thuša bjang ge re kgetha boithabišo? (Gen. 6:11, 12; Ps. 11:5)

    Re ka ekiša Noa bjang ge mokgatlo wa Jehofa o re nea tlhahlo? (Gen. 6:22; 1 Joh. 5:3)

  • Bala Genesi 7:1-9.

    Taba ya gore Jehofa o ile a lebelela monna yo a sa phethagalago Noa e le moloki e re kgothatša bjang lehono? (Gen. 7:1; Die. 10:16; Jes. 26:7)